كوپشىلىككە تارالعان ءبىر مينۋتتىق بەينەجازبادان جالىنا قول تيمەگەن اساۋدىڭ تارپىعان ءساتىن كورگەندە توبە شاشىڭ تىك تۇرادى. ويتكەنى جىلقىنىڭ سىرىن بىلەتىن جىگىتتەر ايعىر الدىڭعى اياعىمەن تارپىپ كوكجال قاسقىردىڭ بەلىن سىندىرا الادى دەگەندى ايتادى. ال سول تاس تۇياق جازاتايىم باتىردىڭ سۇيەگىنە تيسە وڭدىرماسى انىق ەدى. بىراق نامىستى جىگىت اساۋدى كۇشپەن باعىندىردى.
وسى كورىنىستەر قولايىمىزعا جاققان سوڭ, سۇراستىرا كەلە اساۋدى جالاڭ قولمەن جونگە سالىپ, ىرقىنا كوندىرگەن ازامات جاس بالۋان ابىلاي سەرىك ەكەنىن ءبىلىپ, دەرەۋ تەلەفونىن تاۋىپ, حابارلاستىق.
باقساق, ۇشقوڭىردىڭ ەتەگىندەگى جايلاۋىندا جىل سايىن اعايىندارى مەن تىلەكشىلەرىن جيناپ ەرۋلىك بەرەتىن قازاقتىڭ داڭقتى ۇلى, وليمپيادا چەمپيونى جاقسىلىق ۇشكەمپىروۆتىڭ بيىلعى تويىندا ۇلتتىق ويىنداردىڭ نەبىر تورەسى وينالىپتى. قازاقستاننىڭ ەڭبەك ەرى اۋدارىسپاق, قازاق كۇرەسى, كوكپار سىندى ۇلتتىق ويىنداردىڭ جەڭىمپازدارى مەن جۇلدەگەرلەرىنە تۇگەلدەي بايگە تىككەن. ال اساۋ ۇيرەتۋ سايىسىندا كوپتىڭ ىشىنەن بىرەۋ: «وۋ, اعايىن! وسى تاۋدىڭ ەتەگىندە سپورتتىق قارىمىن شىڭداپ جاتقان بالۋاندار تويعا كەلىپ ەدى, ارالارىندا اساۋعا قۇرىق سالاتىن باتىرلارى با ما؟» دەپ داۋىستاعان ساتتە, زامانداستارىنىڭ اراسىنان سۋىرىلىپ شىققان ابىلاي قولىنا قىل ارقاندى ىلە سالا, اساۋ ۇيىرگە تۇرا ۇمتىلعان. بىراق تاياعان ساتتە ءبىر جىلقىنىڭ ءسال سۇرىنگەنىن بايقاپ قالىپ, دەرەۋ ارقانىن تاستاي سالا جالىنا جارماسقان.
ابىلاي سەرىك شىعىس قازاقستان وبلىسى, جارما اۋدانى قالباتاۋ اۋىلىندا تۋىپ-وسكەن. جاسى جيىرما بەستە. گرەك-ريم كۇرەسىنە اقتوبە وبلىسىنىڭ اتىنان قاتىسادى جانە قازاقستان بىرىنشىلىگىنىڭ جۇلدەگەرى اتانعان. باپكەرلەرى بورانبەك قوڭىراتوۆ پەن ءالىم قويلىباەۆ قيادان قىران الاتىنداي, قارسىلاسىن الىپ ۇراتىنداي جۇرەگى مەن بىلەگى بار جىگىتتى جازباي تانىپ, ۇلكەن دودالارعا قوسىپ كەلەدى.
ال جاقسىلىق ۇشكەمپىروۆتىڭ تويىنا قاتىسقان بەلگىلى بوكسشى قانات يسلامعا ەرە بارعان امەريكالىق پروموۋتەرلەر, ياعني تالايدى كورگەن امەريكانىڭ ۇلتتىق سيمۆولىنا اينالعان قالپاقتى «كوۆبويلارىنىڭ» ۇرپاقتارى دا قازاقتىڭ ەرجۇرەك جىگىتتەرىنىڭ ەپتىلىگى مەن قايسارلىعىن كورگەندە باستارىن شايقاپ, كوزدەرىن جۇمىپتى دەسەدى.
