ابدىساعيت تاتىعۇلوۆ – وزىنە كاسىپ رەتىندە تاڭداپ العان قۇرىلىس ينجەنەرى ماماندىعى بويىنشا قازاقستاننىڭ ساۋلەت-قۇرىلىس ىسىنە ءوزىنىڭ تىڭ دا قۋاتتى باستامالارىمەن جالىنداپ كىرگەن مامان. ساۋلەت, قالا قۇرىلىسى جانە قۇرىلىس سالاسىندا بۇگىندە اتاعى ەلىمىز بەن شەتەلدەرگە بىردەي تانىمال «KAZGOR» جوبالاۋ اكادەمياسىن ۇزبەي 35 جىل باسقاردى. ونىڭ باسشىلىعىمەن وسى ۇزاق جىلداردا تالاي كوز تارتار, كوڭىل سۇيسىنتەر سارايلار مەن عيماراتتار سالىندى, قازاق ۇلتتىق ساۋلەت ونەرى الەمدىك دەڭگەيگە كوتەرىلىپ, باسقالاردىڭ كوزايىمىنا اينالدى. ابدىساعيت شايمۇحانبەت ۇلى – ءوزىنىڭ تىنىمسىز عىلىمي ىزدەنىستەرىنىڭ ارقاسىندا وسى سالانىڭ تاريحى مەن تەورياسىنا دەربەس ۇلەسىن قوسقان ساۋلەت ونەرىنىڭ قايراتكەرى جانە ونىڭ جەتەكشى ۇجىمىنىڭ باسشىسى رەتىندە جەكە ءوزىنىڭ قولتاڭباسىن قالدىرعان ازامات.
ۇلتتىق ساۋلەت ونەرىن دۇرىس قالىپتاستىرۋ ءۇشىن ەڭ الدىمەن ەل تاعدىرىن, ۇلت نامىسىن ويلايتىن ماماندار, ازاماتتار كەرەك دەيمىز. مىنە, وسىنداي ازاماتىمىز – ابدىساعيت تاتىعۇلوۆ. ارقيلى وتكەلدەردەن دە بىرگە ءوتىپ كەلە جاتىرمىز. ابدىساعيتتىڭ باباسى, كەنەسارىنىڭ سان جورىقتاعى سەنىمدى سەرىگى, ۇزەڭگىلەسى جاۋكە باتىردىڭ ەسىمىن تورعاي ءوڭىرى ۇلكەن قۇرمەتپەن اتايدى. اتاقتى باتىر بابانىڭ ۇرپاعى وزىنە تارتا ءبىلدى. ابدىساعيتتىڭ اتاسى تاتىعۇل قاجى ەل اعاسى بولعان, مەشىت سالدىرىپ, بالالاردى وقىتقان. كەشەگى تورعاي دالاسىندا بولعان اتاقتى دۇبىردە تاتىعۇل قاجى ەل نامىسى ءۇشىن تۋ كوتەرىپ, بالالارى نۇرمۇحانبەت پەن شايمۇحانبەت تە (ابدىساعيتتىڭ اكەسى) اكەلەرىمەن بىرگە ءجۇردى. سول ءۇشىن قاجى بالالارىنىڭ ەكەۋى دە كەڭەس وكىمەتى تاراپىنان قۋعىن كورىپ, تۋعان جەرىن, قىستاۋىن تاستاپ, باسقا وڭىرگە كەتۋگە ءماجبۇر بولعان. سول باسقا وڭىردە دۇنيەگە كەلگەن ابدىساعيت اتا مەن اكەنىڭ باسىنا تۇسكەن قيىندىقتى سولارمەن بىرگە اتقاردى, سول دۇربەلەڭ كەزەڭنىڭ ىستىعى مەن سۋىعىن قاتار كورە ءجۇرىپ بوي تۇزەدى, ازاماتتىق تۇلعاسى قالىپتاستى. ال ەندى ونىڭ ۇلتجاندىلىعى اتاسى كوتەرگەن تۋمەن, اكە ونەگەسىمەن, انا سۇتىمەن قالىپتاسقان دەۋىمىزگە جوعارىدا ايتقاندارىمىز نەگىز بولا الادى.
مەن ابەكەڭدى كوپتەن بەرى بىلەمىن. ءبىر جەردە تۋىپ, ءبىر زاماندا وستىك. ابەكەڭنىڭ ساۋلەتشى ونەرىن تاڭداۋىنا تۋعان ەلىنىڭ تىلسىم سىرىنىڭ اسەرى بولدى دەۋىمىزگە بولادى. سوناۋ ۇلىتاۋدان باستاۋ الىپ قۇردىمعا كەتكەنشە وزەكتى ەلدىڭ ومىرىنە ءمان مەن ءسان سىيلاپ كەلە جاتقان قاسيەتتى تورعاي وزەنىنىڭ قوس جاعالاۋىندا تاريحي, مادەني ەسكەرتكىشتەردىڭ ءانسامبلى قونىس تەپكەن دەرسىڭ. حVIII-ءحىح عاسىرلاردا كۇيدىرىلگەن قىزىل كىرپىشتەن ورىلگەن ەڭسەلى عيماراتتار سان عاسىرلىق وقيعالاردىڭ كۋاسى ىسپەتتى الىستان قول بۇلعايدى. ولاردىڭ ءبىرازى رەسپۋبليكانىڭ تاريحي-مادەني ەسكەرتكىشتەرىنىڭ تىزبەسىنە الىنعان. بالا ابدىساعيت ولار تۋرالى اڭىز-اڭگىمەلەردى ەستىپ وسسە, ەسەيە كەلە ولاردى ءوزىنىڭ زەرتتەۋ نىساناسى ەتتى.
XX عاسىردىڭ ۇلى ارحيتەكتورى لە كوربيۋزەنى بارشا الەم بىلەدى. سول ايتقان ەكەن: «ساۋلەتشى سەزىمتال, ءارى ونەردىڭ تاجىريبەلى ءبىلىمپازى بولۋى كەرەك. ول تەك قانا ينجەنەر, قۇرىلىسشى ەمەس, دارىگەر, پسيحولوگ جانە مىندەتتى تۇردە اقىن بولۋعا ءتيىس». وسى قاسيەتتەردىڭ ءبارى بولماسا دا, دەنى ابدىساعيتتا بار. ەرەكشە سەزىمتالدىعىنا ونىڭ جوباسىمەن سالىنعان سۇلۋ عيماراتتار كۋا. مايتالمان ينجەنەر, تاجىريبەلى قۇرىلىسشى ەكەنىن بارشامىز مويىنداپ, وسى سالاداعى ەلەۋلى جوبالاردى ىسكە اسىرۋ ءۇشىن باسشى دا, قوسشى دا ونىڭ اقىل-كەڭەسىنە قۇلاق تۇرەدى. اقىندىعى تاعى بار. ءسويتىپ, لە كوربيۋزە ايتقانداي, ابەكەڭ دە ساۋلەت ونەرىنىڭ قادىرىن, قاسيەتىن جان دۇنيەسىمەن تۇسىنەتىن سەگىز قىرلى, ءبىر سىرلى ازامات.
جالپى, ساۋلەتشىلەردىڭ ءوز شەبەرلىكتەرىن سىنايتىن جۇمىستارىنىڭ ءبىرى – مەملەكەت استاناسىنىڭ ساۋلەتىن قالىپتاستىرۋ جۇمىستارىنا قاتىسۋ. الماتى ەلىمىزدىڭ استاناسى بولىپ تۇرعان جىلدارى ابەكەڭنىڭ تىكەلەي باسشىلىعىمەن «KAZGOR» جوبالاۋ اكادەمياسى رەسپۋبليكا سارايىنىڭ, 25 قاباتتى «قازاقستان» قوناقۇيىنىڭ, ورتالىق ستاديوننىڭ, «الاتاۋ» شيپاجايىنىڭ تاعى دا باسقا اتى ايگىلى عيماراتتاردىڭ جوباسىن ۇسىندى. بۇگىندە ولار قالامىزدىڭ قايتالانباس كەلبەتىن اشاتىن بىرەگەي ساۋلەت ەسكەرتكىشتەرى. قازىرگى زامان تالابىنا ساي ءارى جاڭا تەحنولوگيالاردى پايدالانىپ جاساعان «نۇرلى تاۋ» كوپفۋنكتسيونالدى كەشەنىنىڭ جوباسى يەلەنگەن قازاقستان ساۋلەتشىلەر وداعىنىڭ گران-پري جۇلدەسى مەن التىن مەدالى – بۇل ەڭبەككە ەستەتيكالىق تا, قولدانىس جاعىنان دا بەرىلگەن ۇلكەن باعا. قازىرگى كەزگە دەيىن ابەكەڭ باسقارعان اكادەميا الماتى قالاسىنداعى بارلىق ساۋلەتتى عيماراتتاردىڭ جوباسىن جاساۋعا بەلسەنە ارالاسىپ كەلەدى. سوندىقتان دا بارشامىز ماقتان ەتەتىن اسەم قالامىز الماتىنىڭ كەلىستى كەلبەتى ابەكەڭ مەن ول باسقارعان جوبالاۋ اكادەمياسىنىڭ شىعارماشىلىق ۇجىمىنىڭ كەلىستى جۇمىسىنىڭ ناتيجەسى دەسەك, قاتەلەسپەسپىز.
مەملەكەتىمىزدىڭ بۇگىنگى جاس استاناسىنىڭ كوركەيۋىنە دە ابەكەڭ باستاعان ۇجىمنىڭ قوسقان ۇلەسى از ەمەس. ونىڭ «استانا الدىمەن قازاق رۋحىنا ساي كەلەتىندەي, ەكولوگيالىق تازا, الەۋمەتتىك ماسەلەلەرى وڭتايلى شەشىلگەن قالا بولىپ كوركەيۋى كەرەك. قازاقستاندى اسەم ءارى ۇلتتىق سيپاتتاعى عيماراتتارىمىز بار ەل رەتىندە الەمگە تانىتقىمىز كەلسە, بار كۇشىمىزدى استانا عيماراتتارىنىڭ سۇلۋ جوبالارىنا جۇمساۋىمىز كەرەك. ارحيتەكتۋرالىق شىعارمالار تەك پراكتيكالىق ماقساتتار ءۇشىن ەمەس, قورشاعان ورتانىڭ ەستەتيكاسىن قالىپتاستىراتىن, قوعامنىڭ بەلگىلى ءبىر يدەيالىق ماقسات-مۇراتىن, ەستەتيكالىق مۇقتاجىن بەينەلى تۇردە بايانداۋ كەرەكتىگىن دە ەستەن شىعارماۋىمىز كەرەك» دەگەن وي-تولعامى اسەم جوبالاردى دۇنيەگە اكەلدى. اكادەميا ساۋلەتشىلەرى نۇر-سۇلتان قالاسىنىڭ بۇگىنگى كوز سۇيسىنتەرلىك كەلبەتىن جاساۋعا اتسالىسۋدا. قالامىزداعى «نۇرسايا», «تريۋمفالنىي» تۇرعىن ءۇي كەشەندەرىنىڭ, ازىرەت سۇلتان مەشىتىنىڭ, كەنەسارى حان ەسكەرتكىشىنىڭ جوبالارىندا ابەكەڭنىڭ قولتاڭباسى بار.
«KAZGOR» جوبالاۋ اكادەمياسىن ابدىساعيت تاتىعۇلوۆتىڭ 35 جىل ۇزبەي باسقارعانىن جوعارىدا ايتتىق. وسى جىلدارى «KAZGOR» قاتارداعى جوبالاۋ ينستيتۋتىنان اكادەميا دارەجەسىنە, ءوز سالاسىندا ەلىمىزدەگى جەتەكشى كاسىپورىن دارەجەسىنە كوتەرىلە ءبىلدى. كەشەگى زامان وزگەرىپ, ەگەمەندىكتىڭ العاشقى جىلدارىندا وسى سياقتى ۇجىمدار كۇنىن كورە الماي, جاپپاي جابىلىپ جاتقاندا, «KAZGOR» ءوز ماماندارىن, ءوز قالپىن ساقتاپ قالا الدى.
ال بۇگىن بۇل – الەمگە اتى ايگىلى جوبالاۋ اكادەمياسى. ابەكەڭمەن ۇزاق جىلدار قىزمەتتەس بولعان ارىپتەستەرى ونىڭ باسشىعا ءتان ءۇش قاسيەتىن ايتادى. بىرىنشىدەن, ول مىقتى قۇرىلىس ينجەنەرى جانە ۇيىمداستىرۋشى رەتىندە ماڭايىنا دارىندى مامانداردى توپتاستىرا ءبىلدى. ەكىنشىدەن, وسى ۇجىمنىڭ باستى ءىس-باعىتتارىن انىقتاپ, ونىڭ زامان تالابىنا ساي بولۋىن قامتاماسىز ەتتى. ۇشىنشىدەن, ۇجىم مۇشەلەرىنە ادال بولدى, ولاردىڭ ەڭبەگىن باعالاي ءبىلدى. باسشىلارىنىڭ وسىنداي ىزگىلىكتەرىنە كوزى جەتكەن ۇجىم جىل ساناپ ىستەگەن ءىستىڭ, ۇسىنعان قۇرىلىس جوبالارىنىڭ ساپاسىن ارتتىرا بەردى.
اتالعان اكادەميا نارىق زامانىندا تالاي سىناقتان ابىرويلى ءوتىپ كەلەدى. نارىق تالابىنا سايكەس ءوزىنىڭ ىشكى قۇرىلىمىن كۇردەلى تۇردە قايتا جاسادى. جاڭا قۇرىلىس ماتەريالدارى جانە اقپاراتتىق تەحنولوگيانىڭ ومىرگە كەلۋىنە بايلانىستى جوبالاۋ تاسىلدەرى جاڭاردى. وسى سالاداعى الەمنىڭ وزىق ۇلگىلەرى مەن جوبالاۋ ستاندارتتارى ەنگىزىلدى. بۇگىن وسى اكادەميا دارىندى ساۋلەتشى, وسى سالانىڭ نوقتا اعاسى شوتا ىدىرىس ۇلى ءۋاليحان ايتقانداي, ساۋلەتشىلەر مەن ينجەنەرلەردىڭ «ارۋاناسى» (الما-ماتەر) دارەجەسىنە كوتەرىلىپ, باسقا جوبالاۋ مەكەمەلەرىنە كوشباسشى بولىپ كەلەدى. كوش باستاۋ – ۇلكەن ەڭبەك پەن ۇجىمنىڭ بىرلىگىن تالاپ ەتەتىن ەرەن جۇمىس, ونى ابىرويمەن ورىنداۋ كەمەل كۇش-جىگەردى, ءبىلىمدى قاجەت ەتەدى. ابەكەڭ مەن ول باعىت سالعان «KAZGOR» جوبالاۋ اكادەمياسىنىڭ وسىنداي بەدەلى مەن ىزگىلىكتى ىستەرى ەلەنبەي قالعان ەمەس. سوناۋ كەڭەس داۋىرىندە بۇكىلوداقتىق سوتسياليستىك جارىستىڭ باس بايگەسىن ون بەس رەت جەڭىپ العان ەكەن. ەگەمەندىك العان تۇسىمىزدا اكادەميا قازاقستان پرەزيدەنتىنىڭ «التىن ساپا» بەلگىسىمەن ماراپاتتالدى. وسىنداي زور تابىسقا جەتۋدە ۇزاق جىلدار باسشىلىق ەتكەن ابدىساعيت شايمۇحانبەت ۇلىنىڭ دا ەڭبەگى جوعارى باعالانىپ وتىر. ول – قازاقستاننىڭ قۇرمەتتى قۇرىلىسشىسى, قۇرمەتتى ينجەنەرى, مادەنيەت قايراتكەرى اتاقتارىنىڭ يەگەرى, سان رەت وردەن-مەدالدارمەن دە ماراپاتتالعان, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى.
ءبىزدىڭ داۋىرىمىزگە دەيىنگى ءى عاسىردا ءومىر سۇرگەن ساۋلەتشى مارك ۆيترۋۆي پولليون: ء«تۇرلى سالانىڭ قاتىسۋىمەن پايدا بولعان جۇمىستاردىڭ دا ەڭ سوڭىندا ساۋلەتشىنىڭ كوزىنەن وتەتىندىگى تەگىننەن بولماسا كەرەك. ساۋلەتشى عىلىمدى قابىلداي الاتىنداي تابيعاتىنان تالانتتى ادام بولۋى كەرەك» دەگەن ەكەن. ابدىساعيت تاتىعۇلوۆ تا بۇل تۇرعىدان ءوز ورنىن تاپقان ادام دەپ ايتۋعا ابدەن بولادى. ينجەنەرلىكتى مامان رەتىندە تەرەڭ مەڭگەرۋىمەن قاتار ول – ساۋلەت جانە قۇرىلىس سالاسىن عىلىمي جاعىنان تالداپ جۇرگەن كوزى قاراقتى عالىم. ونىڭ قالامىنان 400-گە جۋىق عىلىمي ەڭبەك پەن ماقالا جارىق كورگەن ەكەن. ول – تەحنيكا عىلىمدارىنىڭ كانديداتى, پروفەسسور. ماسكەۋدەگى حالىقارالىق ساۋلەتشىلەر اكادەمياسىنىڭ اكادەميگى. 2001-2005 جىلدارى ابەكەڭ ءوزى باسشىلىق ەتىپ, ستۋدەنتتەر مەن وقىتۋشىلارعا, جالپى سالاعا قىزىعۋشىلىق تانىتاتىن كوپشىلىككە ارنالعان 4 تومدىق «ارحيتەكتۋرا جانە جوبالاۋ نەگىزدەرى» اتتى عىلىمي ەڭبەكتى جاريالادى. «ساۋلەتشى – 2001» اتتى حالىقارالىق ساۋلەتشىلەر فەستيۆالىندە وسى ەڭبەك ساۋلەت ونەرى تۋرالى جازىلعان ەڭ ماڭىزدى ەڭبەك رەتىندە تانىلىپ, ءا.تاتىعۇلوۆ ارحيتەكتورلار وداعىنىڭ حالىقارالىق اسسوتسياتسياسىنىڭ I دارەجەلى ديپلومىمەن ماراپاتتالدى. ەنتسيكلوپەديا دارەجەسىندەگى بۇل ەڭبەك بۇگىنگە دەيىن وقىرمانداردىڭ قولىنان تۇسكەن ەمەس.
ابەكەڭنىڭ «ساۋلەت كونسترۋكتسيالارىنىڭ نەگىزى جانە ازاماتتىق عيماراتتاردى جوبالاۋ» اتتى مونوگرافياسى وسى سالادا ءبىلىم الىپ جاتقان جاستار ءۇشىن ماڭىزدى وقۋ قۇرالى بولىپ سانالادى. باسقا دا ون شاقتى مونوگرافيالارىنىڭ ساپاسى مەن ماڭىزدىلىعىن وسى سالانىڭ ماماندارى وزدەرىنىڭ جوعارى باعاسىمەن تانىتىپ كەلەدى. كوپشىلىك, اسىرەسە ماماندار, ولاردىڭ نازارىن اۋدارعان جوبالارى ارقىلى, تاباندى عىلىمي ىزدەنىستەرىنىڭ ناتيجەسىندە تاتىعۇلوۆ ەسىمى الەم ەلدەرىنە تانىلا باستادى. تالانتتى ينجەنەر, دارىندى ساۋلەتشى رەتىندە تالاي حالىقارالىق كونگرەستەرگە قاتىسىپ, مىنبەدەن ءوزىنىڭ عىلىمي جاڭالىقتارىن جاريا ەتتى. اقش, شۆەيتساريا, يتاليا, گەرمانيا, كانادا, رەسەي, قىتاي, تۇركيا, انگليا, كورەيا ەلدەرىندە, باسقا ەلدەردە وتكەن حالىقارالىق ساۋلەتشىلەر كونگرەسىنىڭ تۇراقتى مۇشەسى. ارحيتەكتورلار وداعىنىڭ حالىقارالىق اسسوتسياتسياسىنىڭ گران-پري جۇلدەسى مەن التىن مەدالىنىڭ ءبىر ەمەس, بىرنەشە مارتە يەگەرى. ول باسقارعان اكادەميا الەمدەگى ەڭ تانىمال جوبالاۋ كومپانيالارىمەن, مىسالى اقش-تاعى «Som», «LERA», «Ramse», انگلياداعى «Foster+Purtners», «Buro Happold», «Arup», وڭتۇستىك كورەياداعى «Space Group», تاعى باسقالارىمەن قويان-قولتىق جۇمىس ىستەي باستادى. ولاردىڭ بىرىگىپ جاساعان قۇرىلىس جوبالارى ىسكە اسۋدا. ءسويتىپ اتالعان اكادەميانىڭ الەم دەڭگەيىندەگى كەلبەتى قالىپتاسىپ كەلە جاتىر. قازىر وسى اكادەميانىڭ ديرەكتورلار كەڭەسىن باسقاراتىن ابدىساعيت تاتىعۇلوۆ – بۇگىنگى تاڭدا قازاق ساۋلەت ونەرىن الەمگە تانىتىپ, ونىڭ الەم قاۋىمداستىعىندا ەلەۋلى ورىن الۋىنا اتسالىسىپ جۇرگەن بىردەن ءبىر ازاماتىمىز.
تەك قانا ساۋلەت ونەرىندە ەمەس, جالپى ومىرىندە سەزىمتال, قايىرىمى مول, قولىنان كەلگەن جاردەمىن ەشكىمنەن ايامايتىن ازامات ەكەندىگىن تىنباي كورسەتىپ ءجۇر ابەكەڭ. اتامەكەنى باتپاققارا ەلىنە (قازىرگى امانگەلدى اۋدانى), بوزتۇبەك پەن حانشابىلعانداعى ەسكى تاريحتى تىرىلتۋگە جاساعان كومەگى قانشاما؟! تاريحىمىزدىڭ دارا تۇلعالارى يمان, قوشقار, جاۋكە باتىرلارعا قويعان ەسكەرتكىشتەر ەلدى قۋانتتى. عۇلاما عالىمدار, ارداقتى اعالارىمىز, اكادەميكتەر ماناش قوزىباەۆ پەن ومىرزاق سۇلتانعازين ومىردەن وتكەندە, ءوزى جوباسىن جاساپ, ولاردىڭ باستارىنا كەسەنە ورناتقان دا تاتىعۇلوۆ بولاتىن. وسىنداي شەكسىز قايىرىمدىلىعىمەن, جاقسىعا قوشەمەت كورسەتىپ, قورشاعان ورتاسىنىڭ اۋىرتپالىعىن باسقالارمەن بىرگە كوتەرۋگە دايىن تۇراتىندىعىمەن دە ابەكەڭ ەل الدىندا ابىرويلى.
ءوزىنىڭ باستاماسىمەن ءارى ساۋلەت سالاسىنا دەگەن قۇرمەتىمەن ابەكەڭنىڭ جاساپ جۇرگەن تاعى ءبىر يگى جۇمىسىن اتاپ وتكەن ءجون. ول – ساۋلەتشىلەر تۋرالى جازۋشى بىردەن-ءبىر اۆتور. قازاقستان ساۋلەتشىلەرى تۋرالى ەستەلىكتەر جازىلمايتىنىن ايتىپ قىنجىلادى ول. سول ولقىلىقتىڭ ورنىن تولتىرۋ ماقساتىمەن ءوزى كوزىن كورگەن ۇستازدارى تۋرالى, زامانداس ارىپتەستەرى تۋرالى كوپتەگەن پۋبليتسيستيكالىق ماقالالارىن جاريالاپ كەلەدى. ت.باسەنوۆ, م.مەڭدىقۇلوۆ, ن.ريپينسكي, ا.دەەۆ, ا.قاپانوۆ, ت.ءجۇنىسوۆ, ق.مونتاقاەۆ, س.رۋستامبەكوۆ, ت.ەراليەۆ جانە تاعى باسقا ساۋلەتشىلەر تۋرالى ماقالالارى كوپشىلىكتىڭ ىقىلاسىنا بولەنىپ, جاستارعا قازاق ساۋلەت مەكتەبىنىڭ تاريحى تۋرالى سىر شەرتەدى. سونىمەن قاتار ساۋلەتشىلەردىڭ مەرەيتويلارىن اتاپ ءوتۋ دە – ابەكەڭنىڭ وزىنە مىندەت ەتىپ العان يگىلىكتى جۇمىستارىنىڭ ءبىرى. مۇنداي جومارتتىق, مارتتىك تەك وسىنداي ۇلكەن جۇرەگىمەن ۇلتىن سۇيگەن ازاماتتىڭ بويىنا بىتەدى دەپ ويلايمىن.
ابەكەڭ – ءوز وتباسى ءۇشىن دە ۇلگى. بايبىشەسى ماعريپامەن بىرگە تاربيەلەپ-وسىرگەن ۇلدارى بۇگىندە ءوز شاڭىراقتارىنىڭ يەسى, ۇلگىلى ازاماتتار, اكە جولىن قۋىپ, ساۋلەت ونەرىنىڭ بىلىكتى ماماندارى بولىپ قالىپتاسىپ كەلەدى. ءبىرى اكادەميانىڭ بۇگىنگى باسشىلىعىندا وتىرسا, ەكىنشىسى ونىڭ كەڭەسشىسى, كومەكشىسى رەتىندە, اكەلەرى جوعارى دارەجەگە جەتكىزىپ بەرگەن مەكەمەنىڭ ابىرويىن ودان ءارى اسقاقتاتىپ ءجۇر. جوعارىدا ايتىلعان بيىك باعا العان ءتورت تومدىق ەنتسيكلوپەديالىق عىلىمي ەڭبەكتى جازۋعا ابەكەڭمەن قوسا وسى بالالارى دا قاتىستى. ولاردى وسىرگەن, قازاق قىزىنىڭ بارلىق جارقىن مىنەزى بويىنا بىتكەن انالارى, ابەكەڭنىڭ جۇبايى ماعريپا, وكىنىشكە قاراي, دۇنيەدەن ەرتە كەتتى. ال شاڭىراق يەسى ابەكەڭ بۇگىن نەمەرەلەرىنىڭ قىزىعىنا بولەنىپ, ولار ءۇشىن ەل ازاماتىنىڭ جارقىن ۇلگىسى بولىپ وتىر. ارتىندا تابىستى جىلدارى, الدىندا سول جىلداردىڭ جەمىسى بار. قازاقتىڭ ساۋلەت مەكتەبىن قۇرعان ۇلى ۇستازدارىنىڭ ۇلاعاتىن كەيىنگى ۇرپاققا جەتكىزىپ, مەكتەپ باسپالداعىنىڭ جاڭا ساتىلارىندا ءوز قولتاڭباسىمەن ەرەكشەلەنەتىن دارىندى ازاماتىمىز – ەلىمىزدىڭ ماقتانىشى.
كەنجەعالي ساعاديەۆ,
اكادەميك
