جول – ەكونوميكانىڭ كۇرەتامىرى. ساپالى جول ورتا ەسەپپەن 17-20 جىلعا جاراۋى ءتيىس. دۇنيەجۇزىلىك بانكتىڭ دەرەكتەرىنە سۇيەنسەك, جولدىڭ تالاپقا ساي سالىنباۋى ونىڭ جارامدىلىعىن 40 پايىزعا دەيىن تومەندەتىپ جىبەرەدى ەكەن. ياعني جۇمىس ساپاسىنا نازار اۋدارمايتىن بولساق, ءار 10 جىل سايىن قازاقستاننىڭ اۋا رايىنىڭ ەرەكشەلىگىن ەسكەرسەك, ءتىپتى 4-5 جىل سايىن كۇردەلى جوندەۋ جۇمىستارىن جۇرگىزۋگە تۋرا كەلەدى. ءبىزدىڭ ماقساتىمىز سول ساپاسىزدىققا جول بەرمەۋ بولىپ وتىر.
ەىدۇ ەلدەرىنىڭ (اۋستراليا, ۇلىبريتانيا, گەرمانيا, فرانتسيا, جاپونيا جانە ت.ب.) تاجىريبەسىنە سايكەس 1980 جىلداردان باستاپ «جول اكتيۆتەرىن باسقارۋ جۇيەلەرى» قۇرىلا باستادى. ءبىز وسى حالىقارالىق تاجىريبەگە سايكەس اۋا رايىنىڭ ۇقساستىعىن ەسكەرە كەلە, كورشىلەس بەلارۋس ەلىنىڭ ادىستەرىن پايدالانعاندى ءجون سانادىق. مىسالى, بەلارۋس مەملەكەتىندە اۆتوموبيل جولدارى مەن كوپىرلەردى سالۋ, جوندەۋ جانە كۇتۋ سالاسىنداعى جەتەكشى «بەلدورتسەنتر» كاسىپورنى جۇمىس ىستەيدى. اتالعان كاسىپورىننىڭ بارلىق جۇيەسى تولىعىمەن تسيفرلاندىرىلعان. اۆتوموبيل جولدارى مەن ونىڭ قۇرىلىستارىنىڭ, سونداي-اق پايدالانۋشىلارعا اقپارات بەرەتىن اقپاراتتىق جۇيەلەردىڭ بىرىڭعاي دەرەكقورى بار. سونىمەن قاتار جولدارداعى اۋا رايى جانە جوندەۋ جۇمىستارى تۋرالى, اۆتوموبيل جولدارى مەن كوپىر قۇرىلىستارىن ماۋسىمدىق تەكسەرۋ ناتيجەلەرى جانە جول-كولىك وقيعالارى مەن ولاردىڭ شوعىرلانۋ ايماقتارى تۋرالى اقپاراتتى تۇتىنۋشىنىڭ ونلاين رەجىمدە كورۋىنە مۇمكىندىك جاسالعان.
جول اكتيۆتەرى ساپاسى ورتالىعى جاڭا فورماتسياداعى مەملەكەتتىك كاسىپورىن بولىپ سانالادى. بۇل ناتيجەگە نازار اۋدارۋ, جاريالىلىق, سىبايلاس جەمقورلىققا توزبەۋشىلىك, ساپا مەن تيىمدىلىككە ۇمتىلۋ, كاسىبي كوماندالىق جۇمىستى قالىپتاستىرۋ, ءوزىن-ءوزى تانۋ جانە ءوز بەتىمەن جۇمىس ىستەۋ, قاعازباستىلىقتان ارىلۋ سياقتى 7 قاعيداتقا نەگىزدەلگەن.
جول اكتيۆتەرى ۇلتتىق ساپا ورتالىعى يندۋستريا جانە ينفراقۇرىلىم مينيسترلىگى اۆتوموبيل جولدارى كوميتەتىنە قاراستى كاسىپورىن. ونىڭ 14 وبلىس ورتالىعى مەن 3 رەسپۋبليكالىق ماڭىزى بار قالالاردا فيليالدارى بار. كومپانيادا قىزمەتكەرلەرىنىڭ اۆتوجول سالاسىن دامىتۋعا دەگەن ىنتا, تىلەكتەرى مەن ۇسىنىستارى ەسكەرىلە كەلە, «ساپالى جولدان – ساپالى ومىرگە» دەگەن قاعيدا قالىپتاسىپ وتىر.
2015-2019 جىلدارعا ارنالعان ينفراقۇرىلىمدى دامىتۋدىڭ مەملەكەتتىك باعدارلاماسىن ىسكە اسىرۋ كەزەڭىندە جالپىعا ورتاق پايدالانىلاتىن اۆتوموبيل جولدارىنىڭ ساپالىق كورسەتكىشتەرى ەداۋىر جاقساردى, الايدا جەرگىلىكتى جولدار مەن ونداعى جاساندى قۇرىلىستاردىڭ تەحنيكالىق جاعدايىنىڭ ناشارلىعى كوپتەگەن ايماق ءۇشىن بۇگىنگە دەيىن وزەكتى بولىپ وتىر. بۇل پروبلەما حالىقتىڭ ءومىر ءسۇرۋ دەڭگەيىنە تىكەلەي اسەر ەتىپ, نەگىزگى الەۋمەتتىك قىزمەتتەرگە, ءبىلىم بەرۋ جانە دەنساۋلىق ساقتاۋ وبەكتىلەرىنە, جۇمىس ورىندارىنا, الەۋمەتتىك, مەملەكەتتىك جانە قىزمەت كورسەتۋ ورتالىقتارىنا قولجەتىمدىلىكتى شەكتەيدى. وسى ماسەلەنى شەشۋ جولىندا جول اكتيۆتەرىنىڭ ۇلتتىق ساپا ورتالىعى تومەندەگىدەي مىندەتتەردى العا قويىپ وتىر.
- اۆتوموبيل جولدارىن پايدالانۋ پروتسەسىن ودان ءارى جەتىلدىرۋ ماقساتىندا اقپاراتتىق تەحنولوگيالاردى پايدالانۋ, بەينەباقىلاۋ جانە سالماقتىڭ ديناميكالىق باقىلاۋ جۇيەلەرىن (WIM) قولدانۋ اۋقىمىن كەڭەيتۋ.
- تەحنيكالىق باقىلاۋ جانە قاداعالاۋ تۇرعىسىندا جولداردى سالۋ, قايتا قۇرۋ جانە جوندەۋدىڭ بارلىق كەزەڭدەرىندە باقىلاۋ, ادامي فاكتور ادىستەرىنە اسەر ەتپەيتىن تەحنولوگيالارىن ەنگىزۋ.
- جول-قۇرىلىس تەحنيكاسىنىڭ جۇمىسىن جەرگىلىكتى ساندىق مودەلدەردىڭ نەگىزىندە ۇيىمداستىرۋ.
- جالپىعا ورتاق پايدالانىلاتىن اۆتوموبيل جولدارى مەن ەلدى مەكەندەردىڭ كوشەلەرىن سالۋ, قايتا قۇرۋ, جوندەۋ جانە كۇتىپ ۇستاۋ ساپاسىن جاقسارتۋ ماقساتىندا نورماتيۆتىك-تەحنيكالىق بازانى جەتىلدىرۋ.
- جاڭا تەحنولوگيالاردى ەنگىزۋ, سونىڭ ىشىندە «جول اكتيۆتەرىن باسقارۋ» تۇجىرىمداماسى نەگىزىندە زەرتتەۋلەردى جالعاستىرۋ.
- جول سالاسىندا جاڭا ماتەريالدار مەن تەحنولوگيالاردى ءتيىمدى ەنگىزۋ, جول جۇمىستارىنىڭ قۇنىن تومەندەتۋ, جوندەۋ جانە كەپىلدىك مەرزىمدەرىن ۇلعايتۋ, جول ينفراقۇرىلىمىنىڭ قاۋىپسىزدىگىن ارتتىرۋ.
جول سالاسىندا سىبايلاس جەمقورلىق فاكتىلەرىنىڭ الدىن الۋ ماقساتىندا سىبايلاس جەمقورلىققا قارسى ءىس-قيمىل اگەنتتىگىمەن بىرلەسە وتىرىپ, كاسىپورىن بازاسىندا «ساپالى جول – ادالدىق الاڭى» جوبالىق كەڭسەسىن قۇردىق. جوبالىق كەڭسەنىڭ نەگىزگى مىندەتى – سىبايلاس جەمقورلىق قۇقىق بۇزۋشىلىقتىڭ كەز كەلگەن قاۋىپ-قاتەرىن ازايتۋ, بيزنەس-پروتسەستەردى اۆتوماتتاندىرۋ, قابىلداناتىن شەشىمدەردىڭ اشىقتىعىن قامتاماسىز ەتۋ.
سونداي-اق ورتالىققا قىزمەتكەرلەردى جۇمىسقا قابىلداۋ تەتىگى تۇبەگەيلى وزگەرۋدە. بىرىنشىدەن, مەملەكەتتىك قىزمەتتىڭ پەرسونالىن باسقارۋ ۇلتتىق ورتالىعىندا تەستىلەۋ وتكىزىلەدى. ەكىنشىدەن, پرەزيدەنت جانىنداعى مەملەكەتتىك باسقارۋ اكادەمياسىنىڭ تاۋەلسىز ساراپشىلارى باعالاۋىمەن ەسسە جازۋ ەنگىزىلەدى. ءارى قاراي كاسىبي ەمتيحان وتكىزىلىپ, ونى قوعام مۇشەسى باسقاراتىن كوميسسيا باعالايدى. بۇل كوميسسيا قىزمەتكەردى جۇمىسقا قابىلداۋ تۋرالى تۇپكىلىكتى شەشىم قابىلدايدى.
ءبىز قازاقستان ازاماتتارىن جول سالاسىنداعى جاعدايعا بەيجاي قاراماي, بىرلەسىپ جول ساپاسىن ارتتىرۋعا اتسالىسۋعا شاقىرامىز. وسى ماقساتتا كەز كەلگەن ءوتىنىش پەن ۇسىنىستارىڭىزدى +7 (7172) 739-760 بايلانىس ءنومىرى ارقىلى حابارلاي الاسىزدار.
زامير ساگينوۆ,
«جول اكتيۆتەرى ۇلتتىق ساپا ورتالىعى» رمم باس ديرەكتورىنىڭ مىندەتىن اتقارۋشى
