مەموراندۋم قورشاعان ورتانىڭ ساپاسىن جاقسارتۋ, ەكولوگيالىق قاۋىپسىزدىكتى قامتاماسىز ەتۋ جانە ىنتىماقتاستىقتى نىعايتۋعا باعىتتالعان. قۇجاتقا سايكەس, قمگ ەنشىلەس كاسىپورىندارى – «قاراجانباسمۇناي» اق, «ماڭعىستاۋمۇنايگاز» اق جانە «وزەنمۇنايگاز» اق – كەلىسىمشارت اۋماقتارى شەگىندە مۇنايمەن لاستانعان جەرلەردى تازالاۋ, سونداي-اق جابدىقتالماعان شلام جيناعىشتارىندا ورنالاستىرىلعان قالدىقتاردى كادەگە جاراتۋ جانە قايتا وڭدەۋ جونىندەگى مىندەتتەردى قابىلدايدى. ماڭعىستاۋ وبلىسىندا مۇناي كەن ورىندارىن پايدالانۋ وتكەن عاسىردا باستالعانىن اتاپ وتكەن ءجون, بۇل مۇنايمەن لاستانعان اۋقىمدى جەرلەردىڭ پايدا بولۋىنا اكەلىپ سوقتى ء(تۇرلى ءوندىرىس قالدىقتارى جانە ەسكى مۇناي توگىلۋلەرى). قازىرگى ۋاقىتتا قمگ كومپانيالارى توبى تاريحي لاستانعان جەرلەردى كادەگە جاراتۋ تۋرالى شەشىم قابىلدادى.
مەموراندۋمعا سايكەس قمگ ءوزىنىڭ ەنشىلەس جانە تاۋەلدى ۇيىمدارىمەن بىرلەسىپ, ەكولوگيالىق تالاپتار مەن ستاندارتتاردىڭ مىندەتتى ساقتالۋىن قامتاماسىز ەتەدى, كەلىسىمشارت اۋماقتارىندا قالدىقتاردى تۇگەندەيدى, قالدىقتاردى قايتا وڭدەۋ, مۇنايمەن لاستانعان جەرلەردى قالپىنا كەلتىرۋ بويىنشا وزىق ادىستەر مەن ەكولوگيالىق قاۋىپسىز تەحنولوگيالاردى ەنگىزەدى. سونداي-اق, قالدىقتاردى قايتا وڭدەۋ ونىمدەرىن (تازارتىلعان توپىراق) كەيىننەن شارۋاشىلىق قىزمەتتە پايدالانۋدى قامتاماسىز ەتەدى.
ەكولوگيا مينيسترلىگى ءوز كەزەگىندە ەكولوگيالىق زاڭناما تالاپتارىنىڭ ساقتالۋىنا باقىلاۋ جۇرگىزەدى, قمگ كومپانيالار توبى قىزمەتىنىڭ قورشاعان ورتاعا جاعىمسىز اسەرىن ازايتۋ جونىندەگى شارالاردىڭ ىسكە اسىرىلۋىن ۇيلەستىرەدى. ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ ايتۋى بويىنشا, قازاقستاندا العاش رەت كومپانيا وزىنە مۇنداي كولەمدەگى مىندەتتەردى قابىلداۋدا.
«بۇل قۇجاتتى ىسكە اسىرۋ ەلىمىزدىڭ باتىسىنداعى مۇنايمەن لاستانعان جەرلەردى ەداۋىر تازارتۋعا, ءوڭىردىڭ جاعىمدى ەكولوگيالىق احۋالىن قولداپ تۇرۋعا مۇمكىندىك بەرەدى. سونداي-اق, مينيسترلىك قورشاعان ورتانى قورعاۋعا باعىتتالعان تۇتاس ءبىر شارالار كەشەنىن ورىنداۋدى جوسپارلاپ وتىر», - دەپ اتاپ ءوتتى م. مىرزاعاليەۆ.
«قازمۇنايگاز» كومپانيالار توبىنىڭ قىزمەتى قورشاعان ورتاعا اسەر ەتۋىمەن تىكەلەي بايلانىستى. سول سەبەپتى ءبىز ەلىمىزدىڭ بايتاق تابيعاتىن, تابيعي رەسۋرستاردى ساقتاۋعا, قورشاعان ورتانىڭ تاريحي لاستانعان جەرلەرىن جويۋعا, قالدىقتاردى ازايتۋعا مۇددەلىمىز. بۇگىنگى مەموراندۋم ەكولوگيا مينيسترلىگىمەن كۇش-جىگەرىمىزدى بىرىكتىرىپ, «قازمۇنايگاز» قىزمەتىن جۇرگىزەتىن وڭىرلەردە ەكولوگيالىق احۋالدى بارىنشا جاقسارتۋعا مۇمكىندىك بەرەدى, دەدى قمگ باسقارما توراعاسى اليك ايدارباەۆ.
ماڭعىستاۋ وبلىسى
