كەنەپتەگى بوياۋى كەپپەگەن تۋىندىسىندا سۋرەتشى تەمىرتاۋ قالاسىنداعى مەتاللۋرگيالىق كومبيناتتىڭ ءتۇتىنى بۋداقتاعان ءتورت مۇرجاسىن, ساتىمەن جوعارىعا ورمەلەپ شىعىپ, كوك اسپاندى تۇمشالاعان قويۋ قارا ءتۇتىننىڭ ۇستىنە كۇننىڭ سۋرەتىن سالىپ جاتقان ادامدى بەينەلەگەن. مۇنىسىمەن سۋرەتشى جارىق پەن تۇنەكتىڭ ارپالىسىن قىلقالام تىلىمەن ايتقىسى كەلگەن.
كارىپبەك ءوزىن كەيىنگى كەزدە ەكولوگيا ماسەلەسىنىڭ قاتتى تولعاندىرىپ جۇرگەنىن ايتادى.
– مەن بۇل كارتينامدا تەمىرتاۋ قالاسىنىڭ ەكولوگيالىق اپاتتىڭ الدىندا تۇرعانىن ايتقىم كەلىپ, دابىل قاقتىم. كۇننەن-كۇنگە ۋشىعىپ بارا جاتقان ماسەلەنىڭ الدىن الماساق, قالانىڭ اپاتتى اۋماققا اينالارى ءسوزسىز, – دەيدى سۋرەتشى.
سونىمەن قاتار, قوعام بەلسەندىسىن ءوزىنىڭ تۋىپ-وسكەن جەرى – ەگىندىبۇلاق كەنتىنىڭ قازىرگى جاعدايى دا از تولعاندىرمايدى. سەمەي يادرولىق سىناق پوليگونىنان 200 شاقىرىم جەردە ورنالاسقان بۇل ەلدى مەكەننىڭ ب ۇلىڭعىر بولاشاعىن ويلاپ قاتتى ۋايىمدايدى ەكەن قوعام بەلسەندىسى.
– كەزىندە ەگىندىبۇلاق 35 مىڭ ادام تۇراتىن, جاعدايى وتە جاقسى اۋدان ورتالىعى بولاتىن. قازىر مۇندا بار-جوعى 2,5 مىڭ ادام تۇرادى. جەرگىلىكتى بيلىك تۇرمىستى تۇزەيمىن دەپ جوقتان بار جاساعانىمەن جاستار اۋىلعا تۇراقتاماي, قالاعا قونىس اۋدارىپ جاتىر, – دەپ مۇڭايادى كارىپبەك.
جاقىن كۇندەرى كارىپبەك «نەۆادا-سەمەي» حالىقارالىق انتيادرولىق قوزعالىسىنىڭ 30 جىلدىعىنا وراي ەلوردادا وتەتىن ۇلكەن شاراعا قاتىسپاقشى. سونىمەن قاتار ول ۇلىبريتانيا جەرىندە, اتاپ ايتقاندا لوندون مەن مانچەستەر قالالارىندا وتەتىن ءوزىنىڭ جەكە كورمەسىنە بارۋدى دا جوسپارلاپ وتىر.
ەسكە سالساق, سۋرەتشى كارىپبەك كۇيىكوۆتىڭ «جارىلىس» اتتى كارتيناسىن ەلباسى ن.نازارباەۆ ۆاشينگتوندا وتكەن يادرولىق قاۋىپسىزدىك سامميتىندە اقش-تىڭ سول كەزدەگى پرەزيدەنتى ب.وباماعا سىيعا تارتقان بولاتىن.
قاراعاندى وبلىسى
