رۋحانيات • 06 تامىز، 2019

سارابدال دا سيقىر ءسوز يەسى

269 رەت كورسەتىلدى

الاش ارداعى، قايراتكەر-قالامگەر، اقىن-اۋدارماشى ءھام ۇستاز-عالىم جۇسىپبەك ايماۋىت ۇلى قوعامدىق قىزمەتىمەن قاتار، قازاق رۋحانياتىن ۇلتتىق مۇرات پەن ەلدىك مۇددەگە نەگىزدەلگەن، ءداستۇر مەن ءدىن بايلانىسىن بەرىك ۇستانعان، تاريح پەن تانىم توعىسىن تەرەڭ تارازىلاعان، ءبىلىم مەن عىلىم ساباقتاستىعىن سارابدال سارالاعان، ءتىل تۇعىرى مەن ءتالىم-تاربيە ارنالارىنا ءجىتى نازار اۋدارعان – «سەگىز قىرلى، ءبىر سىرلى» دارا دارىن يەسى.

انىعىندا، جۇسىپبەك اي­ماۋىت­­ ۇلى ۇلت رۋحانياتىنا، ونىڭ ىشىندە ءسوز ونەرىنىڭ ءداس­تۇر­لى جانرلارىنىڭ دامۋى جولىندا ەرەن ەڭبەك ەتىپ، سۇبەلى ۇلەس قوستى. باق جۇيەسىنە ەركىن ارالاسىپ، جاۋاپتى قىزمەتتەر اتقاردى. ءارى وسى تۇستا ەل-جەر، ادام ءومىرى مەن ەڭبەگى، تۇرمىس-تىرلىك كورىنىستەرى بىرقاتار ماقالا، كوسەمسوزدەرى – «الاش»، «اقجول»، «قازاق»، «قازاق ءتىلى»، «كەدەي ءسوزى» گازەتتەرى مەن «اباي»، «جاڭا مەكتەپ»، «جاس قازاق» جۋرنالدارىندا جاريالاندى. تاقىرىپتىق ءمانى، كوكەيكەستىلىگى دە جۇرت نازارىن اۋدارادى.

ال «ەڭبەكشى قازاق» گازەتىن – 1921 جىلدىڭ اقپانىنان باس­تاپ، سول جىلدىڭ قازان ايىنا دەيىن باسقاردى. ءارى الەۋمەتتىك ءھام قوعامدىق باعىتى، ەلدىك ءمانى، مادەني-رۋحاني سيپاتى جو­عا­رى، ءبىلىمي-عىلىمي ءھام ءتالىم-تاربيەلىك ءنارى مول كوپتەگەن ماقا­لا­لارى جاريالاندى.

سونداي-اق ج.ايماۋىت ۇلى «اباي» جۋرنالىنىڭ نەگىزىن قا­لادى (م.اۋەزوۆپەن بىرگە). 12-ءشى سانى جارىق كورگەن باسىلىم بەتتەرىندە – «ابايدىڭ ونە­رى ءھام قىزمەتى»، «ابايدان سوڭعى اقىندار»، «قازاق ايەلى»، «ما­دە­ن­يەت ءھام ۇلت»، «عىلىم»، «عىلىم ءتىلى»، «فيلوسوفيا جايىنان»، «وقۋ ءىسى» ت.ت.ماڭىزدى ماتەريال­دار جاريالاندى. اسىرەسە، ج.اي­ماۋىت­ ۇلى مەن م.اۋەزوۆتىڭ بىر­لە­سىپ جازعان – «ابايدان سوڭعى اقىن­دار»، «قازاقتىڭ وزگەشە مىنەزدەرى» سىندى ماقالالارىنان ەل-جەر، ۇلتتىق مۇرات، ءداستۇر ساباقتاستىعى ماسەلەلەرىنەن وزگە ورتاق باعىتتارى مەن ماقسات-مۇددە بىرلىگى، دۇنيەتانىم ۇندەس­تى­گى، دوس-سىرلاس كوڭىلدەرى، تانىم-تالعام ءمانى تەرەڭ تانىلادى.

بۇدان باسقا، قازاق كوميتەتى، «الاش» پارتياسى، سەمەي گۋبەر­نيا­لىق اتقارۋ كوميتەتى (جەر، ادى­لەت، حالىق اعارتۋ بولىمدەرى)، حالىق اعارتۋ كوميسسارياتىندا ەڭبەك ەتتى. ۇستازدىق قىزمەتى – سەمەي، قارقارالى، ورىنبور، تاشكەنت، شىمكەنت قالالارىمەن بايلانىستى بولدى (1917-1920).

شىعارماشىلىق عۇمىر­بايا­نى­­نىڭ جارقىن بەتتەرىنىڭ ءبىرى – قازاق ادەبيەتىنىڭ شاعىن جانە ورتا ءھام كولەمدى جانرلارىن­دا جانكەشتى ەڭبەگى. ونىڭ ءاربىر شىعار­ماسىنان ۇلتتىق مۇرات، ەلدىك مۇددە، ادام ەڭبەگى مەن تۇر­مىسى كەڭىنەن كورىنىس بەردى. قوعامدىق-الەۋ­مەت­تىك ماسەلەلەر، باي-كەدەي قاتى­نا­سى، ايەل تەڭسىز­دى­گى، ءبىلىم-عىلىم ءىسى، ءالىپبي ءمانى، ءسوز ونەرى، مادەني-رۋحاني ارنالار كەڭ ورىن الدى.

كوسەمسوزدىك مۇراسى مەن پە­دا­گوگيكا ءھام پسيحولوگيا با­عى­تىنداعى ەڭبەكتەرى تانىم­دىق ءنارى، ءتالىم-تاربيەلىك ءمانى تۇر­عىسىنان قازىرگى كەزەڭدە دە قۇندىلىعىن جويعان جوق. ونەر­پاز­دىق قىرلارىن ەسكە الساق، بۇدان اكتەرلىك ءھام رەجيسسەرلىك سيپاتتارى، ءان-ولەڭ مۇراسى مەن سازگەرلىك تۇستارى تەرەڭ تانىلار ەدى. بۇدان باسقا، «...اعاشتان ءتۇيىن تۇيەتىن، ەر شاباتىن، دوم­بىرا جاساپ، ەتىك تىگەتىن» ەرەك­شە­لىگى مەن قىرلارى دا بولعان (ز.اقىشەۆ. جۇسىپبەك جانە ونىڭ «قارتقوجاسى». – «جۇلدىز»، 1990، №8. - 185-186 بەتتەر). اقىن ءا.تاجiباەۆ: «جۇسiپبەك – باياناۋىلدىق، 1896 جىلى تۋعان، مۇحتار اۋەزوۆپەن قاتار وقىپ، ادەبيەتكە دە قاتار كەلگەن، تالانت، ءبىلىم جاعىنان دا تەڭ، ەڭ جاقىن دوسى بولعان جازۋشى»، دەگەندى ماقتانىشپەن دە، ساعىنىشپەن دە ەسكە الادى.

اقيقاتىن ايتۋ كەرەك، كور­نەك­تi قا­لامگەردiڭ ءومiر­بايانى حا­­­قىن­دا ءار الۋان پiكiرلەر مەن قيلى كوزقاراستار بار. كورنەكتى قا­­لامگەر س.مۇقانوۆ «XX عاسىر­دا­­عى قازاق ادەبيەتi» اتتى ەڭبە­گiن­دە كوپتەگەن قازاق زيالىلارى – ا.بايتۇرسىنوۆ، م.جۇماباەۆ، م.دۋلاتوۆ، س.دونەنتاەۆ، ب.كۇلەەۆ، ع.قاراشەۆپەن بiرگە ج.ايماۋىت­ ۇلىنىڭ ءومiرi مەن قا­لامگەرلiك قىزمەتi حاقىندا ما­ڭىزدى مالiمەتتەر بەرەدi. ج.ايماۋىت ۇلىنىڭ اكەسi، رۋى، ۇرپاقتارى تۋرالى دالەلدى دە­رەك-دايەكتەردى العا تارتادى. باس­تاپقى تۇستا-اق: «جۇسىپبەك ايماۋىت­ ۇلى 1893 جىلى بۇ­رىن­عى كەرەكۋ ۋەزى، سەمەي وبلىسى، قىزىلتاۋ بولىسىندا تۋعان» دەپ انىق-قانىق جازادى.

س.سادۋاقاسوۆتىڭ سۇراق­تا­رىنا قايتارعان جاۋابىندا قا­لامگەردiڭ ءوزi سيىر جى­لى­نىڭ اياعىندا (1890) «…تۋسام كەرەك» دەيدi. شىمكەنت پەدتەح­نيكۋمىنداعى انكەتالىق جاز­با­عا: «1888 جىل» دەپ تولتىرىلادى.

ال «…تەرگەۋ ءىسى» ماتە­ريال­دا­رىنىڭ بىرىندە (1929، 16 مامىر): «…40 جاستامىن، وتباسىلى – ءۇش بالام بار» دەگەندى انىق-قانىق ايتادى (قر ۇقكم – 01149 – ء«ىس،
2 توم). ايىپتاۋ قورى­تىن­دى­سى­نىڭ كەلەسى بولى­گىن­دە «…40 جاس، قازاق، ۇستاز-ادەبيەتشى، پارتيادا جوق» دەگەندى دە نازارعا سالادى (قر ۇقكم-011494- ءىس، 6 توم). قوعامدىق قىزمەتى، ەل مۇددەسى كەڭ ورىن الادى.

 جازۋشى جايلى جەكەلەگەن ىزدەنىس، زەرتتەۋلەر جۇيەسى دە كەڭ ءورىس الدى. ەسكە الساق، فيلولوگيا عىلىمدارىنىڭ كانديداتى ە.وتەباي ۇلى «تاعدىردىڭ كەزدەستiم عوي كەرمەسiنە…» اتتى ماقالاسىندا جازۋشى ءومiربايانى حاقىنداعى ويىن بىلاي بiلدiرگەن: «جۇسiپبەك ايماۋىتوۆتى 1884 جىلى 28 قاراشادا تۋدى، 1930 جىلى 7 ساۋiردە ءولدi دەپ جازىپ، ادiلدiگiنە كوشكەن ماقۇل» («انا تiلi»، 1990، 7 اقپان). ال ستاليندiك زۇلماتقا ۇشىراعان بiر توپ قالامگەرلەردiڭ (ا.بايتۇرسىنوۆ، م.اۋەزوۆ، م.جۇماباەۆ، م.دۋلا­توۆ، ج.ايماۋىتوۆ) وگپۋ، نكۆد تۇرمەسiنە وتىرىپ iستi بول­عان تاريحى تۋرالى «اباقتى» اتتى كوركەم-پۋبليتسيستيكالىق زەرتتەۋلەردiڭ اۆتورى، جازۋشى د.دوسجان: «سوت قۇجاتىندا، جازۋ­شى­نىڭ ءوز قولىمەن تول­تىر­عان انكەتاسىنداعى تۋعان ۋاقى­تى 1890 جىلى بولىپ كور­سە­تi­­لiپتi»، دەپ جازعانىنا مىقتاپ تابان تىرەيدى («جالىن»، 1991، №4، 34-بەت).

بۇل باعىتتاعى iزدەنiس-كوز­­قا­راستار، اتاپ ايتقاندا، ج.اي­ماۋىت­ ۇلىنىڭ تۋعان مەر­زi­مiن ق.مۇ­حامەدحانوۆ 1890 جىل («سەمەي تاڭى»، 1989، 4 قاڭتار)، سەمەي ۋنيۆەرسيتەتiنiڭ وقى­تۋ­شى­­سى ت.قابىشەۆ «سەمەيدiڭ جاڭا قۇجاتتار ورتالىعى» دەرە­گi بويىنشا – 1892 جىل دەپ كور­سە­تەدى («قازاق ادەبيەتi»، 2001، №35). عىلىم كانديداتى، جۇسىپ­­بەكتانۋشى ن.قۋانتاي ۇلى جازۋ­شىنىڭ تۋعان جىلىنا ءبىر­سى­پىرا سالىستىرۋلار جاساپ، س.سادۋاقاسوۆ سۇراقتارىنا تابان تىرەيدى. جازۋشى جازباسىنداعى – سيىر جىلى: «1889 – ناقتى، ءدال سان» دەپ كورسەتەدى. تاريحشى ءھام جۇسىپبەكتانۋشى ت.قالەنوۆا:
«…جۇسىپبەك 1889 جىلى باياناۋىل وڭىرىندە دۇنيەگە كەلگەن. ول 1929 جىلى «ۇلتشىل، حالىق جاۋى» دەپ ايىپتالىپ، 1930 جىلى 21 ساۋىردە ماسكەۋدەگى بۋتىركا تۇرمەسىندە اتىلادى» دەپ جازادى. ال س.بايبوسىن «الاشتىڭ ايماۋىتوۆىن ىزدەيتىن كىم بار؟» اتتى ماقالاسىندا جازۋشىعا قا­تىس­تى كەيبىر دەرەككە دەن قويادى («قازاق ادەبيەتى»، 2014، 7 اقپان). باستاپقى تۇستا جازۋشىنىڭ اتى-ءجونىن – ويماۋىتتىڭ تۇسىپبەگى، – دەپ اتاعانى، اتا-باباسى مەن وسكەن ورتاسىن، ءومىر جولىنىڭ كەيبىر بۇرالاڭ-قالتارىستى تۇستارىن اڭگىمە-ەستەلىك، مۇراعاتتىق دەرەكتەر نەگىزىندە ءسوز ەتەدى. تۋعان جىلىنا قاتىستى دا بۇرىنعى، سوڭعى دەرەكتەرگە ءمان بەرەدى. اسىلى، اقيقاتتان ەشكىم اينا­لىپ تا، اتتاپ تا وتە الماسى انىق. وسى رەتتەن كەلگەندە، ەلىمىزدىڭ ورتالىق مۇراعاتىندا، ۇقك مەن شىمكەنت، تاشكەنتتەگى مۇ­­راعات­تاردا الاش ارداعى، اسىل ءسوزدىڭ ساڭلاعى جۇ­سىپ­بەك ايماۋىت ۇلىنىڭ قاي­تىس بولعان ۋاقىتى – 1930 جىل­دىڭ 21 ساۋىرىندە، ماسكەۋدەگى بۋ­تىركا تۇرمەسىندە اتىلعانى جا­زىل­عان. بىزدىڭشە، وسى جىل مەن ۋاقىت – اقيقاتتىڭ تۋ تىك­كەن تۇسى. وسىعان دەن قويعان، توق­تا­عان ءجون. اقيقات بارومەترi، ءومiر-ۋاقىت ولشە­مi – قاي كەزەڭدە دە ۇستەم عوي.

بولاشاق قالامگەردىڭ وسكەن ورتاسى، وتباسى جايلى ءسوز ەتەر بولساق، الدىمەن ەسكە تۇسەتىنى – جازۋشىنىڭ س.سادۋاقاسوۆتىڭ سۇراقتارىنا قايتارعان جاۋابى. ء«وز جايىمنان ماعلۇمات» اتتى ومىرباياندىق قولجازبادا (1928، قاڭتار. شىمكەنت) جازۋشىنىڭ ءومىرى مەن شىعارماشىلىعى حاقىندا دالەلدى دەرەكتەر بەرى­لە­دى. الدىمەن، م.كوپەەۆ پەن س.تورايعىروۆقا تۋىستىعىن، 7-8 اتادان قوسىلاتىندىعىن ەسكە الادى. ومىرباياندىق ءھام شى­عار­ماشىلىق ماعلۇماتتاردان دا جۇيەلىلىك بەدەرى، تانىم مەن تال­عام تارازىسى تانىلادى. قول­­جازبا م.اۋەزوۆتىڭ جەكە مۇ­­را­عاتىندا ساقتالعان ەكەن. تاپ­­­سىرعان س.سادۋاقاسوۆتىڭ جۇ­با­يى ەليزاۆەتا اليحانقىزى بوكەيحانوۆا. ول قالامگەردىڭ شى­عارماشىلىق مۇراسى اقتال­عان­نان كەيىن باسپاسوزدە جاريا­لان­دى («قازاق ادەبيەتى»، 1988، 23 جەلتوقسان). وسى رەتپەن ءسوز ەتسەك، جۇسىپبەك – ك ۇلىك رۋىنىڭ اقىل دەگەن اتاسىنان تارايدى. اقىلدان – داندەباي، مولداباي، ورداباي دەگەن بالالارى بولادى. داندەبايدان وسپان، ايماۋىت (نەگiزi – ويماۋىت) تۋا­دى. ال ايماۋىتتان جۇسiپبەك پەن جاقىپبەك تارايدى. اكەسi ايماۋىت تا، اتاسى داندەباي دا شارۋا باققان ادامدار ەكەن. ايماۋىت بەس اعايىندى (دان­دە­باي­دىڭ بايبiشەسiنەن ايماۋىت پەن يسا، توقالىنان – وسپان، ابىلايدا، ءابدiرامان تۋعان) بولعانىمەن، كەدەيلiكتiڭ قامىتى قاتتى باتقاندىقتان – قاراپايىم ەڭبەككە بەت بۇرىپ، «مال تابۋعا»، ونەر-بiلiمگە باۋليدى. جازۋشى ومiرباياندىق جازباسىندا جاستىق كەزەڭiن تومەندەگiشە ەسكە الادى: «5 جاسىمنان 15-كە شەيiن ەسكi مولدادان وقىپ، «مۇقتاساردى» دەندەپ، «ناكۋ» وقىپ بارىپ قالدىم». اۋىلىمىزدا وسپان دەگەن كiسi مولدا ۇستاۋشى ەدi. اۋەلi ءجۇنiس قوجادان، سودان كەيiن شايماردان قوجادان، ارتىنان قوجاحمەت مول­دادان، قا­پار قاجىدان، مۇقامەت­جان­نان وقىدىق. ءسويتiپ ەسكiشە 5-6 مولدانىڭ الدىن كورiپپiز. باس­تاپ­قى ەكەۋi بولماسا، سوڭعىلار باسقا اۋىلدىڭ مولداسى. جاز جايلاۋدا وقىپ تۇرۋشى ەدiك».

ورايلى تۇستا ەسكە الساق، 1921-1922 جىلدارداعى الاپات اشتىق­تىڭ زوبالاڭ-زار­دا­­­بى، كولەڭكەلى تۇستارى – ج.ايماۋىت­­ ۇلى­نا دا اسەر ەتە­دى. ەسكە تۇ­سىر­سەك، سەمەيدە «جانار» اتتى ۇيىم قۇرىلعان-دى. ۇيىم­نىڭ نە­گiزگi ماقسات-مiندەتi: قا­را­­پا­يىم حالىققا كومەكتەسۋ، ۇلت بوس­تاندىعى جولىنداعى جاس­تار­دى قامقورلىققا الىپ بi­لiم­گە، ساياساتقا تارتۋ بولدى. ج.ايماۋىت ۇلى وسى جىلدارى ەل iشiندە ساياسي ناۋقاندارعا قا­تى­­سىپ، تورعاي ۋەزiنiڭ اشىققان حال­قىنا جاردەم ەتۋ نيەتiمەن سەمەي گۋبەرنياسىنان 8 مىڭ مال جيناپ، جولاي ونى اشىققاندارعا ۇلەس­تiرگەنi بار-دى. ولاردان قولحات تا الادى. بiراق ءمورi بول­ما­عاندىقتان، وسى مالدى ء«وزi پايدالانىپ كەتتi»، «باي مەن ورتاشالارعا تەگiن ۇلەستiرiپ بەردi» دەگەن جالعان جالامەن جانە «1929 جىلى قازاقستانداعى ۇلتشىلدىق ۇيىممەن بايلانىسى بار، كەڭەس ۇكiمەتiن قۇلاتۋعا كۇش سالعان»، دەگەن سياقتى نەگiزسiز قارالاۋدىڭ، جولسىز جازا­نىڭ ناتيجەسiندە جاۋاپقا تارتىلادى. «مالدى بولگەندە كوميسسيانىڭ باسقا مۇشەلەرi قۇلجانلى، بالعاباي ۇلىنىڭ كورسەتۋiمەن اۋىلدىق، بولىستىق وكiلدەردiڭ قولىنا بەرمەك وردەر­دi مەن جازىپ تۇردىم. جەكە ادامدارعا، قىزمەتكەرلەرگە مال بەرگەندە كوميسسيانىڭ ۇيعارعان ادامدارىنا عانا بەردiم. مالدىڭ دۇرىس بولiنۋiنە، مۇقتاجدارعا، اشتارعا بولiنۋiنە كوڭiل ءبولدiم» دەيدi سوتتاعى جاۋاپتارىنىڭ بiرiندە («ەڭبەكشi قازاق»، 1926، 16 ناۋرىز). اشىق سوت ءماجiلiسi «ەڭبەكشi قازاق» گازەتiندە (15-26 ناۋرىز، 1926 جىل) جاريالانىپ تۇردى. سوتتاعى سۇراق-جاۋاپتان قازاق­ستانداعى 1921-1922 جىل­­دار­داعى الاپات اشتىق كورi­نiس­تەرi، ءامىرشىل-اكىمشىل جۇيە ۇستا­نى­مى، كەزەڭ-ۋاقىت شىندىعى ايقىن اڭعارىلادى.

جۇسىپبەكتانۋ تاقىرىبىنا قالام تارتىپ، بىرقاتار ىزدەنىستەر جاساپ، زەرتتەۋ ەڭبەكتەرىن جاز­عان­دار­دىڭ قاتارىندا: ز.اقىشەۆ، ز.احمەتوۆ، د.ابىلەۆ، ءا.تاجىباەۆ، ب.كەنجەباەۆ، م.قاراتاەۆ، ق.مۇقامەد­حانوۆ، م.بازارباەۆ، س.قيراباەۆ، ت.كاكىشەۆ، ت.قوجاكەەۆ، م.قوزىباەۆ، م.قويگەلديەۆ، ب.قويشىباەۆ، ب.قۇنداقباەۆ، ق.جارىقباەۆ، م.اتىموۆ، گ.بەلگەر، ب.بايعاليەۆ، د.دوسجان، س.ءداۋىت ۇلى، ت.جۇرتباي، ق.ەرگوبەك، ق.كەرەيقۇلوۆ، د.قامزا­بەك ۇلى، س.اقق ۇلى ۇلى، گ.احمەتوۆا، گ.ەلەۋكەنوۆا، ق.ابدىكوۆا، ق.اۋباكىروۆا، ا.زەينۋللينا، ا.مىراليەۆا، ر.دوسجانوۆا، ت.قالەنوۆا، د.قۇسايىنوۆ، ا.تاسىمبەكوۆ، ر.تۇرىسبەك، د. ىسقاق ۇلى ت.ب. بولدى. بۇل باعىت، ارينە بولاشاقتا: باكالاۆر – ماگيستر - PhD (فيلوسوفيا دوكتورى) ارقىلى تولىعا تۇسەرى انىق.

انىعىندا، ج.ايماۋىت­ ۇلى­نىڭ ءومىرى مەن شىعار­ما­شى­­لىعى­نىڭ تاقىرىپتىق اۋقىمى كەڭ، كوركەمدىك-رۋحاني ءنارى مول، تانىمدىق-تالىمدىك سيپاتى مەن اسەر-ىقپالى زور. باتىر-جازۋشى ب.مومىش ۇلى ادامي مۇرات پەن ۇلىلىق ءيىرىمىن قىسقا-نۇسقا ۇلگىدە جۇيەلى جەتكىزەدى: «...مەنىڭ ۇستازدارىم كوپ. سولاردىڭ ءبىرى – جۇسەكەڭ...ومىردەن ءوز ورنىمدى تابۋىما كومەكتەسىپ، دۇ­رىس باعىت سىلتەگەن ول كىسىگە مەن ماڭ­گى قارىزدارمىن» (قالدىباەۆ م. ۇستازدارىمنىڭ ءبىرى – جۇ­سە­كەڭ. - «الماتى اقشامى»، 1989، 13 قازان). ال عابەڭ – عابيت مۇسىرەپوۆ: «...سىرلى دا سۇلۋ، ساراب­دال دا سيقىر ءسوز يەسى جۇسىپبەك ايماۋىتوۆ مەنىڭ ادەبي ۇستازىم ەكەنىن جاسىرا المايمىن»، دەپ جان-جۇرەگىن ايقارا اشىپ، اعىنان جارىلادى.

اسىلى، جۇسىپبەكتانۋ – حح ع.ب. قازاق ادەبيەتىن وقىپ-ۇيرەنۋ، زەرتتەپ-زەردەلەۋ ىسىندە بەرەرى مول، دەرەگى كوپ، ءماندى باعىت، كەڭ ورىستەردىڭ ءبىرى بولىپ تابىلادى. ءارى تاقىرىپتىق ەرەكشەلىگى مەن جانر جۇيەسى ايقىن، كوركەمدىك كەڭىستىگى كەڭ، ءماتىن قۇبىلىسى مەن ديالوگ قىزمەتى ءماندى، تىلدىك-ستيلدىك سيپاتتارى ايشىقتى-نا­قىشتى قىرلارىمەن نازار اۋدار­تادى.

جۇسىپبەكتانۋ – قازاق ادە­بيە­تىن­دەگى باعىتى ايقىن، جانر جۇيەسى ءماندى، كوركەمدىك ءنارى مول، اي­دىنى كەڭ، اعىسى كۇشتى اسىل ارنالاردىڭ ءبىرى.

 

 راقىمجان تۇرىسبەك،

فيلولوگيا عىلىمدارىنىڭ دوكتورى، ەۇۋ پروفەسسورى

 

سوڭعى جاڭالىقتار

ۇقساس جاڭالىقتار