قالا قالپىنا كەلىپ, زاقىمدالعان ۇيلەر كۇردەلى جوندەۋدەن وتكەنشە ارىس قالاسىنىڭ 725 وقۋشىسى (جامبىل وبلىسى, نۇر-سۇلتان قالاسى, سونداي-اق بۋرابايدا) ەلىمىزدىڭ وزگە وڭىرلەرىنە دەمالىسقا جانە ساياحاتقا جىبەرىلگەن.
«بوبەك» ۇلتتىق عىلىمي-پراكتيكالىق ءبىلىم بەرۋ جانە ساۋىقتىرۋ ورتالىعىنىڭ قىزمەتكەرلەرى ءبىر كۇندىك ەڭبەكاقىلارىن ءبولىپ, ارىس قالاسىنىڭ 110 وقۋشىسىن «بوبەك» ورتالىعىنا قابىلداپ, ولاردىڭ الاڭسىز ءبىر اي كولەمىندە ەم-دوم الىپ, دەمالۋلارىنا جاعداي جاساپ وتىر.
شىلدەنىڭ 18-ءشى جۇلدىزىندا «بوبەك» ۇعپببسو ادامنىڭ ۇيلەسىمدى دامۋ ينستيتۋتىندا ارىستىق وقۋشىلارمەن «ارىس, ءبىز سەنىمەن بىرگەمىز!» اتتى قايىرىمدىلىق ءىس-شاراسى ءوتتى.
العاشقى ءسوزدى اتالعان ينستيتۋتتىڭ ديرەكتورى ي.ۆ.كالاچەۆا الىپ, ارىستىق وقۋشىلارعا «بوبەك» ورتالىعىنىڭ قاشاندا قولۇشىن بەرىپ, قولداۋعا ءازىر ەكەنىن جەتكىزدى.
بالالار «توعىز جولدىڭ تورابى», «ورتالىق ازيا قاقپاسى» دەپ سانالعان ارىس قالاسى تۋرالى بەينەفيلمدى كورىپ, ساعىنىشتارىن باسقانداي بولدى. بالالىقتىڭ اۋىلىنان ءالى الىستاماعان مەكتەپ وقۋشىلارىنىڭ ەركىن, اقىلدى, زەرەك ەكەندەرى ۆيكتورينا سۇراقتارىنا بەرگەن جاۋاپتارىنان انىق بايقالدى. ءبارى شەتتەرىنەن تاقىلداپ, تۋعان ولكەلەرىنىڭ قىر-سىرىن بۇگە-شىگەسىنە دەيىن بىلەتىندەرى كوڭىلىمىزگە كوكتەم ۇيالاتتى.
الداعى ءبىر ايعا جۋىق ۋاقىتتا وقۋشىلار دەنساۋلىعىن قالپىنا كەلتىرۋمەن قاتار «بوبەك» ورتالىعى ۇيىمداستىرعان ءتۇرلى ءىس-شارالارعا, الماتىنىڭ كورىكتى جەرلەرىنە, تاريحي ورىندارىنا, كىتاپحانالارعا, ورتالىقتاعى وبسەرۆاتورياعا ساياحات جاسايدى.
جۇزدەرىنەن تازالىقتىڭ لەبى ەسىپ تۇرعان بۇلدىرشىندەر تۇس-تۇستان جامىراپ ء«بىز بارعانشا ارىس قالپىنا كەلىپ, جاعدايى جاقسارا ما؟», دەيدى. ادەتتە, «بالا عوي» دەپ قارايتىن وقۋشىلاردىڭ جۇرەك تۇكپىرىندە ىستىق ۇيالارىنا دەگەن قيماستىق پەن ساعىنىش جاتقانىن وسى ءبىر اۋىز سوزدەن بايقاۋعا بولادى.
بالالاردى رەسپۋبليكامىزدىڭ 14 وبلىسىنان جانە نۇر-سۇلتان, الماتى, شىمكەنت قالالارىنان 170 ارنايى بريگادا كەلىپ, كۇردەلى جوندەۋ جۇمىستارى باستالىپ كەتكەنىنەن حاباردار ەتتىك.
«ارىستاعى اۋىر اپات ەكىنشى قايتالانباسىن», دەيدى وقۋشىلار ءسوز كەزەگى كەلگەندە. «ەندى ونداي پالەكەت ءبىزدىڭ ەلىمىزدى اينالىپ ءوتسىن», دەيمىز ءبىز دە.
ءيا, بۇل دا جاراتقاننىڭ ءبىر سىناعى بولار. ەلدىڭ بىرلىگى بەكەم, ۇكىمەتتىڭ نيەتى وڭ بولسىن دەيىك. ۋاقىت وتە كەلە ءبارى ورنىنا كەلەدى. ادام بالاسى ءبىر-بىرىنە رياسىز سۇيىسپەنشىلىك پەن جاقسىلىق تىلەپ, قايىرىمدىلىق كورسەتەر بولسا, قاسىرەتتىڭ ورنىن ءالى-اق قۋانىش باسادى. باۋىرىنان تالاي سۇڭقارلار تۇلەگەن قاستەرلى ولكەگە بۇكىل قازاقستان بولىپ قولۇشىن بەرۋدىڭ ءوزى ەل بولىپ قالىپتاسىپ, ۇلت بولىپ ۇيىسقانىمىزدىڭ كورىنىسى ەمەي نەمەنە؟ وسىندايدا ء«سوز جاردەمىنەن باسقا ءبوز جاردەمى» دەگەن ءتامسىل ەرىكسىز ەسكە تۇسەدى. جۇرەكتەگى جارانى تەك مەيىرىم عانا جازاتىنىنا تاعى دا ءبىر كوزىمىز جەتكەندەي...
جەڭەدى قاسىرەتتى,
قاسيەتتى مەيىرىم عانا.
قالاتىن بۇل ومىردە,
ادامنىڭ پەيىلى عانا.
بەۋ, ارىس,
كۇڭىرەنبە,
تاعدىردىڭ سىناعىنا.
بۇل بالكىم ەسكەرتۋ عوي,
بيلىكتىڭ قۇلاعىنا...
ۇرەيدەن ارىلماعان,
كوڭىل عوي ءارى-ءسارى.
ساسپاڭدار, حالىق باردا,
گۇلدەنەر ارىس ءالى.
ءيا, ەلدىڭ ەرتەڭى جارىق, بولاشاعى نۇرلى بولسىن!
ەرعالي باقاش,
«بوبەك» ۇعپببسو اYدي باسپا ءىسى رەداكتسيالاۋ سەكتورىنىڭ رەداكتورى
