دەپۋتاتتار جۇرتشىلىقپەن كەزدەسۋ بارىسىندا ايماقتارداعى كوپتەگەن تۇيتكىلمەن جان-جاقتى تانىسىپ, ونى جەرگىلىكتى اتقارۋشى ورگاندار وكىلدەرىمەن بىرلەسىپ شەشۋدىڭ جولدارىن ىزدەستىرۋگە اتسالىسۋدا. سەناتور سارسەنباي ەڭسەگەنوۆ اتىراۋ وبلىسىنا ساپارى بارىسىندا جەرگىلىكتى تۇرعىنداردىڭ ءوتىنىشى بويىنشا جايىق وزەنىنىڭ جاعدايىمەن ءجىتى تانىسۋ ءۇشىن قايىققا ءمىنىپ, ايدىن احۋالىن كورىپ قايتتى.
– يندەربور كەنتىنىڭ تۇسىندا بۇرىنعى وتكەل بەرمەس جايىق وزەنىنىڭ ورتاسىندا بۇگىندە اجەپتاۋىر ارال پايدا بولعان. سۋدىڭ ازايۋىنان وزەننىڭ كەي جەرى 50 سانتيمەترگە دەيىن تايىزداپ كەتكەن. قايىقتار سۋدان قايىرلاپ ارەڭ شىعادى. بۇل قاۋىپتى جاعداي ەكەنى تۇسىنىكتى. ەلىمىزدىڭ باتىس ولكەسىندەگى ەڭ ءىرى وزەن سۋىنىڭ ازايىپ كەتۋىنە بايلانىستى ۇكىمەت ءتيىستى دەڭگەيدە نازار اۋدارىپ, باقىلاۋعا الىپ, ناقتى شارا قابىلداماسا, سوڭى ۇلكەن ەكولوگيالىق زارداپقا سوقتىرۋى مۇمكىن, – دەپ سارسەنباي ەڭسەگەنوۆ تابيعاتتاعى ەلەۋلى وزگەرىستەرگە الاڭداۋشىلىعىن ءبىلدىردى.
سەناتوردىڭ يندەر اۋدانىنداعى بودەنە اۋىلىندا جەرگىلىكتى تۇرعىندارمەن كەزدەسۋىندە جايىق وزەنى سۋىنىڭ جىلدان-جىلعا ازايىپ بارا جاتقانى, ورمان-توعايدىڭ جاعدايى ناشارلاعانى, شابىندىق, مال ازىعى جەتىسپەيتىنى, مال ۇرلىعى توقتاماي تۇرعانى دا ءسوز بولدى.
* * *
پارلامەنت سەناتىنىڭ دەپۋتاتى عۇمار دۇيسەمباەۆ اتىراۋ وبلىسىنا ساپارى اياسىندا وبلىستىق ىشكى ىستەر دەپارتامەنتىندە بولىپ, پوليتسيا قىزمەتكەرلەرىمەن كەزدەستى. سەناتور سونداي-اق ماحامبەت جانە يندەر اۋداندارىندا بولدى, اقتوعاي جانە ەلتاي اۋىلدىق وكرۋگتەرىندە جەرگىلىكتى تۇرعىندارمەن, ءماسليحات دەپۋتاتتارىمەن جۇزدەستى. سەناتور ەلدى مەكەندەردەگى الەۋمەتتىك نىسانداردى ارالادى, سالىنىپ جاتقان قۇرىلىس نىساندارىنىڭ جۇمىستارىمەن تانىستى.
جەرگىلىكتى باسشىلار سەناتورعا اۋىلدىڭ الەۋمەتتىك-ەكونوميكالىق دامۋ بارىسى تۋرالى حاباردار ەتىپ, قولعا الىنعان ماڭىزدى شارالاردى تانىستىردى. جەرگىلىكتى بيۋدجەتتى يگەرۋ, اۋىلداعى كاسىپكەرلىكتى, شارۋا قوجالىقتارىن دامىتۋ, جۇرتشىلىقتىڭ قارجى ساۋاتىن ارتتىرۋ جايى تۋرالى اڭگىمە ورىستەدى.
* * *
سەنات دەپۋتاتى سەرگەي پلوتنيكوۆ شىعىس قازاقستان وبلىسىنا جۇمىس ساپارى بارىسىندا قازاقستان – امەريكا ەركىن ۋنيۆەرسيتەتىنىڭ جاتاقحاناسىندا بولدى. جوعارى وقۋ ورنى عيماراتتارىنىڭ ءبىرى تاياۋدا قايتا جاڭارتىلىپ, ستۋدەنتتەرگە ارنالعان 88 ورىندىق جاتاقحاناعا اينالعان.
سەناتور ستۋدەنتتەر تۇراتىن ىڭعايلى وقۋ, دەمالىس, تاماق دايىنداۋ بولمەلەرى مەن تۇرمىسقا قاجەتتى ارناۋلى بولمەلەردىڭ جاعدايىمەن تانىستى.
* * *
سەنات دەپۋتاتى سەرىك بەكتۇرعانوۆ قوستاناي وبلىسىنداعى بالالاردىڭ جازعى دەمالىسىن ۇيىمداستىرۋ بارىسىمەن تانىستى. سونىمەن قاتار ىشكى ىستەر مينيسترلىگىنىڭ ش.قابىلباەۆ اتىنداعى قوستاناي اكادەمياسىنىڭ قالا سىرتىنداعى لاگەرىنە باردى. دەپۋتات بالالاردىڭ قالا سىرتىنداعى دەمالىس ايماعىندا بولۋ باعدارلاماسىمەن تانىستى جانە اكادەميا باسشىلىعىمەن قيىن جاسوسپىرىمدەرگە ارنالعان لاگەر ۇيىمداستىرۋ باستاماسى تۋرالى جان-جاقتى اڭگىمەلەستى. بالالار قالا سىرتىندا العاش رەت دەمالعاندارىن ايتىپ, الداعى جىلدارى دا دەمالىستى وسىلاي ۇيىمداستىرۋ تۋرالى ءوتىنىش جاسادى.
* * *
پارلامەنت سەناتىنىڭ دەپۋتاتتارى نۇرجان نۇرسيپاتوۆ پەن ماناپ كوبەنوۆ پاۆلودار وبلىسىنا جۇمىس ساپارى بارىسىندا پوليتسيا دەپارتامەنتىندە بولدى. سەناتورلار پوليتسيا بولىمشەسىنىڭ قىزمەتىمەن تانىسىپ, پاترۋلدىك پوليتسياداعى, كوشى-قون قىزمەتىندەگى, اكىمشىلىك پوليتسياداعى جاڭالىقتاردان حاباردار بولدى.
سەنات دەپۋتاتتارى وبلىستىق ۇقك دەپارتامەنتى مەن وبلىستىق سوتقا دا باس سۇقتى. سونىمەن قاتار قاراوبا اۋىلدىق وكرۋگىندەگى اۋەلبەك اۋىلىندا سالىنىپ جاتقان سۋ قۇبىرىنىڭ قۇرىلىسىمەن تانىسىپ, كاسىپورىن باسشىسىمەن ءوندىرىس ماسەلەلەرىن تالقىلادى. دەپۋتاتتار اقتوعاي اۋىلدىق وكرۋگىنىڭ حاركوۆكا, پريرەچەنسكوە سەلولارىنىڭ اۋماعىندا بولىپ, شارۋا قوجالىقتارىنىڭ باسشىلارىمەن كەزدەستى جانە ەگىستىكتىڭ جاي-كۇيىن قاراپ, شارۋاشىلىقتاردى دامىتۋدىڭ الداعى جوسپارلارى تۋرالى اڭگىمەلەستى.
* * *
پارلامەنت سەناتىنىڭ دەپۋتاتتارى نۇرلان بەكنازاروۆ پەن ايگۇل قاپباروۆا جۇمىس بابىنداعى ساپار اياسىندا شىمكەنت قالاسىندا جەرگىلىكتى تۇرعىندارمەن كەزدەستى. سەناتورلار شىمكەنتتىك جاستارمەن پىكىر الماسىپ, سەسسيا كەزىندە قابىلدانعان زاڭدار تۋرالى جان-جاقتى حاباردار ەتتى. جاستار زاڭداردىڭ تالقىلانۋ بارىسى تۋرالى مالىمەتتەر الىپ, وزدەرىن قىزىقتىرعان سۇراقتارعا جاۋاپ ەستىدى.
سەناتورلار سونىمەن قاتار شىمكەنت قالاسىنىڭ ءماسليحات دەپۋتاتتارىمەن كەزدەستى. جيىندا سەناتورلار سەناتتىڭ وسى ۋاقىتقا دەيىن اتقارعان جۇمىستارى جانە قابىلدانعان زاڭداردىڭ ماڭىزى تۋرالى مالىمەت بەردى.
* * *
پارلامەنت سەناتىنىڭ دەپۋتاتتارى راشيت اكىموۆ پەن داۋرەن ادىلبەكوۆ اقمولا وبلىسىنداعى جۇمىس بابىنداعى ساپارى بارىسىندا ەرەيمەنتاۋ اۋدانىنىڭ نوۆوماركوۆكا اۋىلىندا بولىپ, «جاڭا بەرەكە» سەرىكتەستىگىنىڭ مال بورداقىلاۋ الاڭىنىڭ جۇمىسىمەن تانىستى.
سەناتورلار اقسۋات اۋىلىنداعى «Aizet Farms» سەرىكتەستىگىنە, ارشالى اۋدانىنداعى ميحايلوۆ اۋىلدىق وكرۋگiنە بارىپ, اۋىل شارۋاشىلىعى تاۋارىن وندiرۋشiلەرمەن كەزدەستى.
