ءوندىرىس وشاعىنىڭ تاريحى 2015 جىلى تارازداعى اۆتوتۇراق اۋماعىنان تىس قالعان جەردى ساتىپ الۋدان باستالىپتى. فابريكا باسشىسى ساۋلە ساتىبالديەۆا كاسىپورىن عيماراتىنىڭ ءبىرىن قايتا قۇرۋ جۇمىستارىن قولعا الىپ, ۆافلي ازىرلەۋ بويىنشا اۋستراليالىق نااS كومپانياسىنىڭ جابدىقتارىن ساتىپ الۋعا كەلىسىم جاسايدى. ول «بيزنەستىڭ جول كارتاسى» باعدارلاماسى ارقىلى 1,2 ملرد تەڭگە كولەمىندە نەسيە العان-دى. 2017 جىلدىڭ سوڭىندا مونتاجداۋ جانە ىسكە قوسۋ جۇمىستارى جۇرگىزىلدى, ال 2018 جىلدىڭ باسىندا رۇقسات بەرۋ قۇجاتتارىن العاننان كەيىن فابريكانىڭ العاشقى ونىمدەرى ساۋدا جەلىلەرىنىڭ سورەلەرىنە تۇسە باستاعان.
بۇگىندە مۇمكىندىگى مول. فابريكانىڭ وندىرىستىك قۋاتى ايىنا 250 توننا دايىن ءونىمدى قۇرايدى. كومپانيانىڭ ءبىرىنشى بولىگى ىسكە قوسىلعان مەزەتتەن باستاپ ءتاتتىنىڭ 34 ءتۇرى شىعارىلىپ, تۇتىنۋشىلاردىڭ كوزايىمىنا اينالدى. قازىرگى تاڭدا 30 ادامدى جۇمىسپەن قامتىپ وتىر.
ساپا تۇرعىسىنان شەتەلدىڭ برەندتەرىنەن كەم تۇسپەيتىن «ساۋلە» فابريكاسىنا سىرتقى سەرىكتەستەر قىزىعۋشىلىق تانىتىپ, بىلتىر كۇزدە قىتاي نارىعىنا شىقتى.
فابريكا جامبىل وبلىسى كاسىپكەرلەر پالاتاسىنان تاۋاردىڭ شىعۋ تەگى سەرتيفيكاتىن الدى. ست-كZ سەرتيفيكاتى تاۋاردىڭ قازاقستان رەسپۋبليكاسىنىڭ اۋماعىندا شىعۋ تەگىن راستايدى, بۇل ءوز كەزەگىندە جەتكىزۋشىگە جەڭىلدىكتى شارتتاردا وتكىزىلەتىن بارلىق ساتىپ الۋعا قاتىسۋعا مۇمكىندىك بەرەدى.
ەندى اتالعان سەرىكتەستىك بولاشاقتا ازيا ەلدەرىنە عانا ەمەس, ءونىم اسسورتيمەنتىن تەڭىز اسىپ ەۋروپا نارىعىنا شىعارۋدى, ءوندىرىس كولەمىن ۇلعايتۋدى, قاناتىن كەڭىرەك جايىپ, باسقا دا وسىنداي ءوندىرىس وشاقتارىن اشىپ, جەلىلەرىن كوبەيتۋدى كوزدەپ وتىر. جاستىعىنا قاراماستان, اۋقىمدى ىسپەن شۇعىلدانۋعا باتىل كىرىسكەن كاسىپكەر ساۋلە ساتىبالديەۆانىڭ ماقساتى – فابريكانىڭ جاڭا كورپۋسىن سالۋ, شوكولاد پەن كارامەلدەن جاسالعان كونديتەرلىك ونىمدەر شىعاراتىن جاڭا جەلىلەردى ساتىپ الۋ. «ساۋلەنىڭ» جەلىلەرى پايدا بولىپ, قۋاتى كۇشەيگەننەن كەيىن شتاتتاعى ادامدار سانىن 200 ادامعا دەيىن كەڭەيتۋ جوسپارى بار.
بيىلعى جىلدىڭ سوڭىنا دەيىن جاڭا ءوندىرىس عيماراتىن سالۋ جانە جاڭا وندىرىستىك جەلى ساتىپ الۋ جوسپارلانىپ وتىر. قازىرگى زامانعى جابدىقتاردى ەنگىزۋ كاسىپورىننىڭ قۋاتىن 4500 توننادان 12 000 تونناعا دەيىن ارتتىرۋعا جانە ءونىمدى ەكسپورتقا كوبىرەك شىعارۋعا مۇمكىندىك بەرەدى.
