بۇل گونكونگ تاريحىنداعى ەكىنشى ۇلكەن ميتينگ. العاشقىسى 1997 جىلى بريتانيا قالانى قىتاي يەلىگىنە قايتارعاندا بولعان. سوڭعى نارازىلىقتاردى ۇيىمداستىرۋشىلار جاڭا زاڭعا قارسى شىعۋشىلار سانى ميلليونعا جەتتى دەسە, پوليتسيا 240 مىڭ ادامنىڭ جينالعانىن ايتادى. قىتاي ۇكىمەتىنىڭ تولقۋدى سىرتقى كۇشتەر باستادى دەگەن كۇمانى دە جوق ەمەس. ولار نارازىلاردىڭ ءبىرىنىڭ قولىنان اقش تۋىن كورگەنىن ايتىپ, مەملەكەت ىشىندەگى ماسەلەگە ارالاسپاۋىن سۇرادى.
گونكونگ اۋەلدە 1842 جىلى ۇلىبريتانيا وتارى بولادى, كەيىن 1898 جىلى ۇلىبريتانياعا 99 جىلعا جالعا بەرىلەدى. 1997 جىلى قىتاي حالىق رەسپۋبليكاسىنىڭ قۇرامىنا قايتارىلىپ, ارنايى اكىمشىلىك اۋدان دەپ بەلگىلەنەدى. قىتاي-بريتان دەكلاراتسياسى مەن گونكونگتىڭ نەگىزگى زاڭىنا سايكەس, گونكونگ 2047 جىلعا دەيىن قىتاي اۆتونومياسى رەتىندە بەكىتىلەدى. ءدال وسى كەزدە قىتاي رەفورماتورى دەن سياوپين ء«بىر ەل, ەكى جۇيە» دەگەن يدەياسىن ۇسىنىپ, سونىڭ نەگىزىندە گونكونگتىڭ پوليتسيا, زاڭ مەن قارجى جۇيەسى, يمميگراتسيا ماسەلەسى قالا قۇزىرىنا بەرىلىپ, ال سىرتقى ساياسات پەن قورعانىسى قىتايعا جۇكتەلەدى. بۇل كونتسەپتسيانىڭ ءتۇپ نەگىزىندە گونكونگپەن قاتار ماكاو, تايۆان سياقتى قۇرامداس تەرريتوريالاردى قىتايعا بەيبىت تۇردە قايتارۋ جاتىر ەدى. سونىمەن بىرگە بۇل قۇرامداس تەرريتوريالارعا وزدەرىنىڭ كاپيتالى, ەكونوميكا مەن ساياسي جۇيەسىن قالىپتاستىرۋعا مۇمكىندىك بەرىلدى.
يدەيانىڭ گونكونگكە پايداسى از بولمادى. كاپيتالى مەن زاڭ جۇيەسىن وزدەرى باسقارۋ ارقىلى قازىرگى تاڭدا بيزنەس جۇرگىزۋ جەڭىلدىگى بويىنشا الەمدىك رەيتينگتە 3-ورىنعا, سالىق جۇيەسى بويىنشا 5-ورىنعا تۇراقتادى.
اۋەلگى شارت بويىنشا قىتاي گونكونگتا قالىپتاسقان كاپيتاليستىك جۇيەنى وزگەرتپەۋى كەرەك ەدى. الايدا قىتاي گونكونگ ومىرىنە ارالاسپايمىز دەگەن سوزىندە تۇرماي, زاڭ جۇيەسىن وزگەرتىپ, مەكتەپتەردە پاتريوتتىق تاربيە ساباقتارىن ەنگىزبەك بولدى. بۇل باستامالارعا گونكونگ تۇرعىندارى نارازىلىق تانىتىپ, جاڭالىقتاردى قابىلداۋعا اسىقپادى. ودان كەيىن 2014 جىلى گونكونگتىڭ سايلاۋ پروتسەسىنە ارالاسپاق بولعان قىتايعا قارسى «قولشاتىرلار رەۆوليۋتسياسى» دەپ اتالىپ كەتكەن 79 كۇنگە سوزىلعان ميتينگ ءوتتى. جەرگىلىكتى حالىقتىڭ ايتۋىنشا, بۇل جولى حالىقتىڭ ءسوزى ەلەنبەي, گونكونگ باسشىلىعىنا «قىتايدىڭ ادامى» كەلگەن.
جاڭا زاڭ جوباسىن قاراستىرۋعا تايۆانداعى قاندى وقيعا سەبەپ بولعان دەسەدى. حالىقتى جاڭا زاڭ قابىلدانعان جاعدايدا ايىپتالۋشىلاردى قىتايعا, ءتىپتى گونكونگپەن ارنايى كەلىسىمى جوق ماكاو, تايۆانعا دا جونەلتۋ مۇمكىندىگى الاڭداتادى. ويتكەنى گونكونگ تۇرعىندارى قىتاي تۇرمەلەرىندەگى قيناۋلار مەن ءولىم جازاسىنا قارسى. بەلسەندىلەردىڭ ءبىرى ء«بىز بيلىككە نارازىلىعىمىزدى تۇسىندىرگىمىز كەلەدى. بۇعان قاجەتتىلىك ازايمايىنشا, جالعاستىرا بەرەمىز» دەدى.
گونكونگ اكىمشىلىگىنىڭ باسشىسى كەرري لەم ەكستراديتسياعا قاتىستى زاڭعا وزگەرىستەر ەنگىزۋ توقتاتىلعانىن مالىمدەپ, حالىقتان كەشىرىم سۇرادى. بىراق ايىپتالعانداردى ەكستراديتسيالاۋ ماسەلەسى شەشىلۋ كەرەگىن ايتتى. ياعني, زاڭ جوباسى الداعى ۋاقىتتا قايتا قارالۋى مۇمكىن. بۇعان گونكونگ تۇرعىندارى كەلىسپەي, زاڭ كەڭەسىنىڭ عيماراتىنا شابۋىل جاساپ, بيلىكتىڭ وتستاۆكاعا كەتۋىن تالاپ ەتتى. جەرگىلىكتى پوليتسيا نارازىلارعا قارسى كۇش كورسەتىپ, ارنايى گازدارمەن قۋىپ جاتقانى ءمالىم بولدى.
جاڭا جۇيەگە جاپپاي قارسىلىقتار حالىقتىڭ ء«بىر ەل» يدەياسىن قابىلدامايتىنىن كورسەتكەندەي. حالىق جەرگىلىكتى بيلىككە نارازىلىعىن بىلدىرگەنىمەن, ورتالىق جۇيەگە, ياعني قىتاي جۇيەسىنە قارسى شاعىمدارىن ايتا المايدى. ونىڭ ۇستىنە, گونكونگتىڭ مەملەكەتتىك ءتىلى سانالاتىن اعىلشىندى قىتاي ءتىلى بىرتە-بىرتە ىعىستىرىپ كەلەدى. گونكونگ حالقى ەكستراديتسيالاۋعا قاتىستى جاڭا زاڭنىڭ ارتى ءسوز بوستاندىعى, دەموكراتيا سياقتى ۇعىمدارعا نۇكتە قويارىن ايتادى. ويتكەنى بيلىككە قارسى كەلگەندەرگە قىتاي سوتى اۋىر جازا كەسۋى مۇمكىن. بۇل بولجامنىڭ راس-وتىرىگى, البەتتە, ۋاقىت ەنشىسىندە. الايدا گونكونگتەگى ميتينگىلەر قاشانعا دەيىن جالعاساتىنى الەم جۇرتشىلىعىن الاڭداتۋدا.
