«شاۆكات راحمونوۆ الەمنىڭ ەڭ ۇزدىك مما ۇيىمىمەن كەلىسىمگە كەلگەن قازاقستان تاريحىنداعى تۇڭعىش سپورتشى اتاندى. ول UFC-دەگى دەبيۋت جەكپە-جەگىن وسى جىلدىڭ قاراشا ايىندا وتكىزەدى دەپ جوسپارلانعان», دەيدى ءابدىراحمانوۆ. جۋىردا نۇر-سۇلتاندا وتكەن M-1 Challenge 102 تۋرنيرىندە راحمونوۆ برازيليالىق تياگو ۆارەجاو لاسەردادان باسىم تۇسكەن بولاتىن. ايتۋلى جەڭىسىنىڭ ارقاسىندا وتانداسىمىزعا وسى سپورت تۇرىندەگى ەڭ بەلدى ۇيىم – UFC-گە داڭعىل جول اشىلعان-دى.
شاۆكات بۇگىنگە دەيىن ارالاس جەكپە-جەكتە 12 كەزدەسۋ وتكىزىپ, بارلىعىندا ايقىن جەڭىسكە قول جەتكىزدى. ول بىردە-ءبىر قارسىلاسىنا بەت قاراتقان جوق. ايتا كەتەيىك, قازىرگى تاڭدا UFC-دە كۇش سىناسىپ جۇرگەن رەسەيدىڭ ورىنبور ولكەسىندە تۋىپ-وسكەن قانداسىمىز دامير يسماعۇلوۆتىڭ ونەرى كوپشىلىكتىڭ كوڭىلىنەن شىعۋدا.
