بۇرىن اتالعان اۋىلدىڭ بالالارى مەن جاستارى فۋتبولدى شاڭدى بۇرقىراتىپ توپىراقتا وينايتىن. ەندى ولار جاز ايلارىندا سىرتى قورشالعان, تابانىنا جاساندى كوگال توسەلگەن زاماناۋي نىساندا دوپ تەبەتىن بولدى. ال قىستا كورت ءىشى حوككەي وينايتىن, كونكي تەبەتىن مۇز ايدىنعا اينالادى.
سپورت نىسانىنىڭ اشىلۋ سالتاناتىندا جەرگىلىكتى بالعىن فۋتبولشىلارعا دوپ پەن سپورتتىق كيىمدەر سىيعا تارتىلدى. ەندى جاتتىعۋىنا بارلىق جاعداي جاسالعان قاراجار اۋلىنىڭ كومانداسى اۋداندىق جانە وبلىستىق دەڭگەيدەگى جارىستارعا قاتىسۋعا مول مۇمكىندىك الدى.
سونىمەن قاتار اتالعان اۋىلدا «كوركەيە بەر, تۋعان جەر» اكتسياسى اياسىندا جەرگىلىكتى «جاستار ساياباعى» اباتتاندىرىلدى. وعان «رۋحاني جانعىرۋ» باعدارلاماسى بويىنشا وكرۋگ بيۋدجەتىنەن قارجى بولىنگەن بولاتىن.
