جازاسىن وتەپ جاتقان جاندار العاش رەت ۇلى اقىننىڭ جىرلارىن جاتقا وقىپ, ءوزارا سىنعا ءتۇستى. كەش تاۋ تۇلعامىزدىڭ 175 جىلدىعىنا وراي ۇيىمداستىرىلدى.
ساحناعا ءبىرىنشى بولىپ كوتەرىلگەن دانيار راحىموۆ “سەنبە جۇرتقا, تۇرسا دا قانشا ماقتاپ” ولەڭىن ناقىشىنا كەلتىرىپ وقىپ بەردى.
«بابامىزدىڭ قاي ولەڭىن الساق تا ماعىناسى وتە تەرەڭ. ادامدى ەرىكسىز ويلاندىرادى. اسىرەسە, ءومىر, قوعام جايلى ولەڭدەرى جانىما ەرەكشە جاقىن. ازاماتتىق كوزقاراسىم مۇلدەم وزگەردى. ەسىرتكى ساتىپ, 7 جىلعا تەمىر تورعا توعىتىلعانىما قاتتى وكىنەمىن. جاستارعا ءوتىنىشىم, تۋرا جولدان ەشقاشان اداسپاڭدار», دەيدى دانيار.
باسقا دا جازاسىن وتەۋشىلەر ابايدىڭ وي-تولعاۋلارىنان, ناقىل سوزدەرىنەن ۇزىندىلەر كەلتىرىپ, ادامزات بالاسىنىڭ عۇمىرىنىڭ قىسقالىعى, ماحاببات, دوستىق, جاستىق شاقتىڭ ازعانتاي ۋاقىت ىشىندە ءوتىپ كەتەتىندىگى تۋرالى ادەمى مانەرمەن جەتكىزە ءبىلدى. بىرقاتارى “جاز”, “عىلىم تاپپاي ماقتانبا” سىندى ولەڭدەرىمەن, قارا سوزدەرىمەن مەكتەپ قابىرعاسىندا تانىسقان ەكەن.
ەس-164/3 تۇزەتۋ مەكەمەسى باستىعىنىڭ تاربيە جۇمىسى جونىندەگى ورىنباسارى رۇستەم راحمەتوۆتىڭ سوزىنە قاراعاندا, بۇرىن-سوڭدى وتكىزىلمەگەن اباي وقۋلارىنىڭ تۇساۋكەسەرى جاقسى تاعىلىم قالدىرعان ءتارىزدى. مەكەمە جانىندا جۇمىس ىستەيتىن 8 مىڭ كىتاپ قورى بار كىتاپحانادا قازاقتىڭ تانىمال اقىن-جازۋشىلارىنىڭ شىعارمالارى از ەمەس كورىنەدى.
سولتۇستىك قازاقستان وبلىسى
