شىعىپ سويلەگەن ونشاقتى كىسىنىڭ بارلىعى دا نۇرسۇلتان نازارباەۆتىڭ ەلگە, مەملەكەتكە سىڭىرگەن ەڭبەگىنە توقتالدى. قوستاناي قالاسىنىڭ ورتالىعىنداعى گاگارين داڭعىلىنا نۇرسۇلتان نازارباەۆتىڭ ەسىمىن بەرۋ تۋرالى باستامانى سول كوشەدە ورنالاسقان اۆتوموبيل كولىگى كوللەدجى كوتەرگەن بولاتىن. ونى گاگارين داڭعىلىندا تۇرعان «سارىارقااۆتوپروم» جشس دە قولدادى. قوعامدىق تىڭداۋعا كەلگەن قالالىقتاردىڭ بارلىعى دا بۇل باستامانى دۇرىس شەشىم دەپ قابىلدادى.
بۇرىن قالا كىشىگىرىم كەزىندە كولحوز كوشەسى قوستانايدىڭ شەتىندە ەكەن. عارىشقا تۇڭعىش ادام ۇشقاندا قوستانايلىقتار وسى كوشەگە يۋري گاگاريننىڭ ەسىمىن بەرەدى. سودان قالا ءوستى, قالامەن بىرگە كوشە دە ۇزارىپ, گۇلدەنەدى.ونىڭ بويىندا كوپ قاباتتى ۇيلەر كوبەيىپ, شاعىن اۋداندار پايدا بولدى. ەندى ۇزىن, كورىكتى داڭعىل تۇڭعىش پرەزيدەنت نۇرسۇلتان نازارباەۆتىڭ ەسىمىن الاتىن بولادى. بۇل داڭعىل ارقىلى قوستانايلىقتار مەن قالا قوناقتارىن قالانىڭ سولتۇستىك باتىس جاعىنا ورناپ جاتقان ءىرى تۇرعىن اۋدانىنا, وندىرىستىك ايماعىنا اپارادى. قوستانايعا كەلگەن ساپارلارىندا نۇرسۇلتان ءابىش ۇلى دا تالاي رەت بۇل داڭعىلمەن «اگروماشحولدينگ» جانە «سارىارقااۆتوپروم» ماشينا قۇراستىرۋ زاۋىتتارىنا بارعان بولاتىن.
كوپشىلىكتىڭ قالاۋىمەن گاگارين ەسىمىن ەندى گۆارديا كوشەسى الاتىن بولدى. وعان كوشە تۇرعىندارى دا قارسى بولعان جوق. ولار گاگارين اتاۋىمەن بىرگە كوشەنىڭ كوركى دە, ءومىرى دە وزگەرەدى دەگەن سەنىمدە.
قوستاناي
