ءمينيستردىڭ ايتۋىنشا, ەلىمىزدە ەلەكتروندى مەديتسينالىق تولقۇجات جوباسى ىسكە قوسىلعان. «وسى اپتادا ازاماتتار دەنساۋلىعىنىڭ ەلەكتروندى تولقۇجاتىن ىسكە قوستىق. قازىر پاسپورتتار قولجەتىمدى. كەز كەلگەن ازامات eGov پورتالى ارقىلى ءوزى تۋرالى بارلىق مەديتسينالىق اقپاراتتى تابا الادى. ياعني, قانداي مەديتسينالىق مەكەمەگە قارالعانىن, تەگىن مەديتسينالىق كومەكتىڭ كەپىلدىك كولەمىنىڭ تولىق پاكەتىن بىلە الادى. جاڭا جىلدان باستاپ تولقۇجات ونلاين رەجىمدە جۇمىس ىستەيدى. بۇل حالىقتى ەمدەۋگە كەتەتىن شىعىننىڭ اشىقتىعى ءۇشىن كەرەك. قازاقستاننىڭ قاي وڭىرىنە بارىپ دارىگەرگە قارالساڭىز دا ءسىزدىڭ سىرقاتىڭىزعا قاتىستى دەرەكتەر ەلەكتروندى بازادان تابىلادى. وسىلايشا ءبىز كوپتەگەن قاعازباستىلىقتان ارىلامىز», دەدى ەلىمىزدىڭ باس دارىگەرى.
بولاشاقتا بۇل قىزمەت ەلەكتروندى ۇكىمەتتىڭ ءموبيلدى نۇسقاسىندا پايدا بولادى جانە ونى ءدارى-دارمەكپەن قامتاماسىز ەتۋ رەتسەپتىلەرىنىڭ كوشىرمەسىن نەمەسە مەديتسينالىق مەكەمەلەردە قىزمەت الۋ فاكتىلەرىن راستاۋ رەتىندە پايدالانۋعا بولادى. ء«بىز كوپتەگەن جىلدار بويى دارىلەردى ەسەپكە الۋدىڭ, اۋرۋحانالاردا قاعازسىز جۇمىس جۇرگىزۋگە ارنالعان ءارتۇرلى اقپاراتتىق جۇيەلەردى جاساپ كەلەمىز. بۇل مالىمەتتەردىڭ بارلىعى جەكە اقپاراتتىق جۇيەلەردە, بولەك سەرۆەرلەردە جيناقتالعان. ءبىزدىڭ مىندەتىمىز – ءاربىر ازامات وسى جازبالاردى كورىپ, باقىلاپ وتىرۋى ءۇشىن وعان قولجەتىمدىلىكتى قامتاماسىز ەتۋ. تسيفرلاندىرۋ ەڭ اۋەلى مەديتسينانىڭ ترانسپارەنتتىلىگىن, مەملەكەت شىعىنىنىڭ اشىقتىعىن قامتاماسىز ەتۋ ءۇشىن قاجەت. بيىل مەديتسينا سالاسى تۇگەلدەي رەسمي تۇردە قاعازسىز فورماتقا كوشەدى. ءىس جۇزىندە تەگىن مەديتسينالىق قىزمەت كورسەتەتىن بارلىق اۋرۋحانالار, ەمحانالار ەلەكتروندى جازبا جۇرگىزۋگە مىندەتتى. وسى جۇمىس ارقىلى ءبىز اۋرۋحانالاردىڭ جۇمىسىن وڭتايلاندىرىپ قانا قويماي, قاعازباستىلىقتان قۇتىلىپ, شىعىنداردى ازايتامىز», دەدى ول.
سونىمەن قاتار مەديتسينالىق انىقتامالار تەك قانا ەلەكتروندى تۇردە بەرىلەتىن بولىپتى. بۇل – مەديتسينالىق انىقتاما ساۋداسىمەن كۇرەسۋدىڭ جانە حالىقتى قاعازباستىلىقتان قۇتقارۋدىڭ بىردەن-ءبىر جولى. «مەديتسينالىق انىقتامالار مەملەكەتتىك ەمحانالاردا عانا ەمەس, جەكەمەنشىك مەديتسينا مەكەمەلەرىندە دە ساتىلىپ جاتىر. ءبىز سىبايلاس جەمقورلىققا قارسى ءىس-قيمىل اگەنتتىگىمەن بىرلەسىپ, بۇل ماسەلەنى جويۋ بويىنشا جۇمىس ىستەپ جاتىرمىز. سونداي-اق بارلىق مەديتسينالىق انىقتامالاردى تەك قانا ەلەكتروندى تۇردە بەرۋدى جۇزەگە اسىرۋ ءۇشىن وسى جىلدىڭ اياعىنا دەيىن باسقا مينيسترلىكتەرمەن كەلىسىم جۇرگىزەمىز. مىسالى, جوعارى وقۋ ورىندارىنا ءتۇسۋ ءۇشىن تالاپ ەتىلەتىن 086-انىقتامانىڭ كۇشىن جويۋ ءۇشىن ءبىلىم جانە عىلىم مينيسترلىگىمەن, جۇرگىزۋشى كۋالىگىن الۋدا قاجەت بولاتىن 083-انىقتامانىڭ كۇشىن جويۋ ءۇشىن ىشكى ىستەر مينيسترلىگىمەن جۇمىس جۇرگىزىلۋدە. ويتكەنى ولار وزدەرى اقپاراتتىق جۇيەگە تىكەلەي قوسىلۋ ارقىلى ءار ازاماتتىڭ دەنساۋلىعى تۋرالى مالىمەتكە قول جەتكىزە الاتىن بولادى», دەيدى ۆەدومستۆو باسشىسى.
دەگەنمەن سالانى تسيفرلاندىرۋ كەزىندە كەيبىر كەلەڭسىزدىكتەر دە انىقتالىپ جاتىر. ماسەلەن, SMS العان 4000 ادام وزدەرىنە ەشقانداي ءدارى بەرىلمەگەنىن ايتقان. ء«بىز SMS-ەسكەرتۋ جۇيەسىن تەگىن بەرىلەتىن ءدارى-دارمەكتىڭ ەلگە جەتپەي جاتقانى تۋرالى شاعىم كوبەيگەندىكتەن قوسقان بولاتىنبىز. بۇل دا تسيفرلاندىرۋدىڭ ءبىر پاراسى. ناۋقاسقا تەگىن ءدارى بەرىلگەنى تۋرالى اقپارات بازاعا تۇسكەن ساتتە ەمدەلۋشىگە SMS جىبەرىلەدى. بيىل سونداي SMS العان 4000 ادام, وزدەرىنە ەشقانداي ءدارى بەرىلمەگەنىن ايتىپ شاعىمداندى. بۇل جەردە كوپتەگەن فاكتور بار. كەي ناۋقاستىڭ تەلەفون ءنومىرى وزگەرىپ كەتكەن. بىراق كوپ جاعدايدا دۇرىس جوسپارلاماعاننان بولعان. سونداي-اق مەملەكەت تاراپىنان ساتىپ الىنعان ءدارى-دارمەكتىڭ جەكە ءدارىحانالاردا ساتىلعانىن دا انىقتادىق. بۇل ماسەلە بويىنشا قۇقىق قورعاۋ ورگاندارىمەن بىرلەسىپ جۇمىس جۇرگىزىپ جاتىرمىز. ناتيجەسىندە 27 قىلمىستىق ءىس قوزعالدى», دەدى ە.ءبىرتانوۆ.
