ال وسى ات ابزەلدەرى مەن تۇلكى تىماقتى ون ساۋساعى جوق ازامات تىكتى دەگەنگە قالاي قارايسىز؟! سەنبەسەڭىز دە راسى سول.
قازالى اۋدانىنداعى اباي اۋىلىنىڭ اتپالداي ازاماتى وڭداشباي وتەمىس بىردە قىستا جوق قاراپ ءجۇرىپ, اتتان قۇلايدى. جاقىن جەردە كومەكتەسە قويار جان يەسى جوق, اتىنان ايىرىلعان ازامات ۇسىككە ۇرىنادى. كەيىن دارىگەرلەر وڭداشبايدىڭ ۇسىك ۇرعان ون ساۋساعىن كەسىپ تاستاۋعا ءماجبۇر بولادى.
«ون ساۋساعىم جوق, ەندى ءومىر وسىمەن ءبىتتى» دەپ قابىرعاعا ءجۇزىن بەرىپ بۇك ءتۇسىپ, وكىنىشتەن وزەگى ورتەنىپ جاتاتىن ازاماتىڭ وڭداشباي ەمەس. بۇرىن دا قول ىسمەرلىگىمەن تانىلعان جىگىت تىماقتان ماسىگە دەيىن ءوزى تىگىپ, جۇرتتىڭ كەرەگىن ايىرا باستاعان. كەيىننەن ەل اعالارىنىڭ ءسوز كومەگى ءدارۋ بولىپ, كاسىپ اشۋعا بەكىندى.
ال كاسىپ اشامىن, سول ارقىلى ءناسىبىمدى ايىرامىن دەگەن ازاماتقا ارنالعان مەملەكەتتىك باعدارلامالار از ەمەس.
وسىلايشا وڭداشباي «بيزنەستىڭ جول كارتاسى-2020» باعدارلاماسى بويىنشا قايتارىمسىز گرانتقا يە بولدى. گرانتقا العان 900 مىڭ تەڭگەگە وندىرىستىك تىگىن ماشيناسىن ساتىپ الدى. قانىندا بار ىسمەرلىك ءبارىبىر تىنىش جاتقىزبايدى ەكەن. وندىرىستىك تىگىن ماشيناسى قولىنا تيگەننەن كەيىن كيىز ۇيگە كەرەكتى بار جابدىقتى تىگە باستادى. سونىمەن قاتار وڭداشبايدىڭ تىگىن شەبەرحاناسىندا جۇگەننەن باستاپ توقىمعا دەيىن بار.
«بالا كەزىمنەن قۇمار ءىسىم بولاشاقتا كاسىبىمە اينالار دەپ ويلاماپپىن, – دەيدى وڭداشباي. – بۇرىن اۋىلداعىلار عانا تاپسىرىس بەرەتىن. بۇگىندە اۋدان ورتالىقتارىنان كەلىپ, بۇيىمتايىن ايتاتىندار بار. ادامعا قۋانىش سىيلاعان جاقسى عوي. ونىڭ ۇستىنە تەگىن جاساپ جاتقان جوقپىن».
ون ساۋساعىنان ايىرىلسا دا وڭداشبايدىڭ قولىنان كەلمەيتىنى جوق. قىل اياعى ۇيالى تەلەفونى بۇزىلعاندار دا ونىڭ ءۇيىن تابادى. كوپتىڭ كەرەگىنە جاراعان ۇلكەن باقىت قوي.
تاعدىردىڭ تالكەگىن كورگەن كەي ادامدار ءومىر سول كۇنمەن بىتكەندەي وپىنىپ, العا باسقان اياعىن كەرى كەتىرەدى. دۇنيەدەن باز كەشەدى. ال ارمانى اسقاق, ەل العىسىن الىپ جۇرگەن وڭداشبايلار سونداي جاندارعا ۇلگى بولسا, قانەكي.
قىزىلوردا وبلىسى
