نيۋ-يوركتە وتكەن جارىستا 16 جاسار كايل گيرسدورف اقتىق مارەگە جەتكەن 100 ويىنشىنىڭ اراسىندا ۇزدىك اتاندى. ۆيرتۋالدى سايىستىڭ جالپى جۇلدە قورى 30 ملن دوللاردى قۇرادى.
چەمپيوناتتىڭ العاشقى كەزەڭىنەن ءوتۋ ءۇشىن 10 اپتا بويى الەمنىڭ تۇكپىر-تۇكپىرىنەن 40 ميلليون ويىنشى تالاسقان. سوڭعى كەزەڭگە جەتكەن ويىنشىلار قاتارىندا 30-دان استام ەلدىڭ وكىلى بار.
ويىن شارتى بويىنشا بەلگىسىز ارالعا تاستالعان 100 ويىنشىنىڭ اراسىندا جالعىز قالعانى جەڭىسكە جەتەدى.
ۆيرتۋالدى ويىندار الەم بويىنشا جاسوسپىرىمدەر اراسىندا كەڭىنەن تانىلىپ كەلەدى. بۇگىندە ونىڭ ميلليونداعان اۋديتورياسى بار, ال كوممەرتسيالىق جاعىنان 2019 جىلى ميلليارد دوللارلىق يندۋستريا دەپ باعالانعان.
كيبەرسپورت قازاقستاندا رەسمي تۇردە سپورت ءتۇرى دەپ 2018 جىلى تانىلدى. مادەنيەت جانە سپورت مينيسترلىگىنىڭ قولداۋىمەن Qazaq Cybersport Federation رەسپۋبليكالىق قوعامدىق بىرلەستىگى قۇرىلعان. ەلىمىزدىڭ توپتارى الەمدىك جارىستارعا قاتىسىپ, جۇلدەلى ورىندارعا دا يە بولىپ ءجۇر.
