23 شىلدە كۇنى جارقايىڭ اۋدانىنىڭ ءبىرسۋات اۋىلىنا جاقىن ماڭدا زاڭسىز كيىك اتىپ جۇرگەن براكونەرلەردى توقتاتام دەپ جازىم بولا جازداعان قورىقشىنىڭ سوزىنشە, وقيعا قاس-قاعىم ساتتە بولعان.
«2012 جىلدان بەرى قورىقشى بولىپ جۇمىس ىستەپ كەلەمىن. بۇل جولى 15 كۇنگە ىسساپارعا كەلدىك. وقيعا ءىس-ساپارىمنىڭ التىنشى كۇنى بولدى. بۇرىن مۇنداي بولعان ەمەس, بۇل جولى دا ولاي بولادى دەپ ويلاعان جوقپىن. براكونەرلەر كەزدەسكەن كەزدە كولىكتەرىن قورشاپ الامىز, سول كەزدە ولار توقتايتىن ەدى», - دەيدى قورىقشى.
سونىمەن قاتار, ول بۇگىن جەرلەنگەن ارىپتەسى قانىش نۇرتازينوۆتىڭ ءولىمى اۋىر تيگەنىن ايتتى.
«قانىش نۇرتازينوۆ ەكەۋىمىز ءبىرىنشى رەت بىرگە جۇمىس ىستەگەن ەدىك. اقجارقىن جىگىت ەدى. بۇگىن جەرلەدى دەپ ەستىپ جاتىرمىن. جاتقان جەرى جايلى بولسىن. ماعان العان جاراقاتىمنان گورى ارىپتەسىمنىڭ قازاسى اۋىر ءتيدى», - دەپ ارىپتەسىنىڭ قازاسىنا كوڭىل ءبىلدىردى سامات.
سونىمەن قاتار, ول جۋرناليستەردىڭ «وسى وقيعادان كەيىن وسى سالادا ودان ءارى جۇمىس ىستەيسىز بە؟» دەگەن سۇراعىنا ء«يا» دەپ جاۋاپ بەردى.
ايتا كەتەيىك, سامات پەن ايگۇل بۇگىندە ءۇش بالا تاربيلەپ وتىر. ۇلكەنى - 18 جاستا بولسا, كىشىسى - 8-دە. بۇدان بولەك, ساماتتىڭ 67 جاستاعى اناسى دا وتباسىمەن بىرگە تۇرادى. دارىگەرلەردىڭ سوزىنشە, كەلەر اپتادا ناۋقاس جازىلىپ شىعۋى مۇمكىن.
