پرەزيدەنتتىڭ ايتۋىنشا, جاستار جىلىنىڭ يگىلىگىن, ەڭ الدىمەن, جاستاردىڭ وزدەرى كورۋى كەرەك. جاستارعا باسپانا قولجەتىمدى بولۋى ءتيىس. ولاردىڭ جولى اشىق بولۋى كەرەك, جاقسى, ساپالى ءومىر ءسۇرۋى ءۇشىن مۇمكىندىكتەر بەرىلگەنى ءجون.
– مىنە, ۇكىمەتتىڭ باستامالارى, ەڭ الدىمەن, وسى مىندەتتەردى نازارعا الۋى ءتيىس. بىراق مىنانى ۇمىتپاۋىمىز كەرەك. ەڭ باستى مىندەت, «دايىن اسقا تىك قاسىق» دەگەندەي, جاستارعا باقىتتى ءومىردى جاساپ بەرۋ ەمەس, ولارعا ءوز باقىتتارىن وزدەرى تاۋىپ, ماقساتتارىنا جەتۋگە جاعداي جاساۋ وتە ماڭىزدى, – دەدى مەملەكەت باسشىسى.
پرەزيدەنت القالى جيىندا كەلەسى جىل جاستار جىلىنىڭ جالعاسى رەتىندە ۆولونتەرلەر جىلى بولاتىنىن جەتكىزدى. دەمەك بيىلعى ءىس-شارالار الداعى جىلى جاستاردى بەلسەندى ۆولونتەرلىك جۇمىسقا تارتۋعا ۇلاسادى.
– بىراق, ولار بۇل جۇمىسقا تەك كرەديتتەر مەن وقۋداعى جەڭىلدىكتەر ءۇشىن ەمەس, وزدەرىنىڭ جۇرەك قالاۋىمەن, شىنايى نيەتىمەن كەلۋى ءتيىس, – دەپ ەسكەرتىپ ءوتتى پرەزيدەنت.
وسى رەتتە پرەزيدەنت جۋىردا قوستاناي قالاسىندا وتكەن فورۋمدا جۇزەگە اسىرىلعان ەكو-چەللەندج جاستاردىڭ سىندارلى باعىتتا بەلسەندىلىك تانىتۋعا دايىن ەكەنىن كورسەتكەنىن ايتتى. الداعى ۋاقىتتا دا ساياسي ءمان-ماڭىزى زور مۇنداي جۇمىستارعا جاستار كوبىرەك تارتىلماقشى.
اتاپ وتەرلىگى, مەملەكەت باسشىسى مىسال ەتكەن «ECO-challenge Qostanai» ەكولوگيالىق اكتسياسى اياسىندا وبلىس اۋماعىنداعى وزەن-كولدەردىڭ اينالاسى ەداۋىر تازارىپ قالعان بولاتىن. بۇل ءىس-شارا قورشاعان ورتانى قورعاۋعا, جاستار اراسىندا ەكولوگيالىق مادەنيەتتى قالىپتاستىرۋعا باعىتتالدى. سول قازاقستان-رەسەي جاستار فورۋمىنا بارعان اقپارات جانە قوعامدىق دامۋ ءمينيسترى داۋرەن اباەۆتىڭ ءوزى دە جاستارمەن بىرگە سۋ قويمالارىنىڭ جاعالاۋىنان كۇل-قوقىس, تاماق پەن ىدىس قالدىقتارىن جيناۋعا قاتىسقان ەدى.
جالپى ەلىمىزدە جاستار جىلى اياسىندا قابىلداناتىن شارالاردىڭ ءتيىستى جول كارتاسى بەكىتىلگەنى بەلگىلى. سول جوسپارعا سايكەس ناقتى جۇمىستار قازىر بەلسەندى جۇرگىزىلۋدە.
ماسەلەن, ۇكىمەت وتىرىسىندا بايانداما جاساعان پرەمەر-مينيستر اسقار مامين 1 قىركۇيەكتەن باستاپ جۇمىسشى ماماندىقتارى بويىنشا ءبىلىم الىپ جاتقان وقۋشىلاردىڭ ستيپەندياسى 30 پايىزعا وسىرىلەتىنىن ايتتى. بۇل – شامامەن 122 مىڭداي وقۋشىنى قامتيتىن يگىلىكتى ءىس.
سونىمەن قاتار الەۋمەتتىك از قامتىلعان جانە كوپ بالالى وتباسىلاردىڭ بالالارىنىڭ جوعارى وقۋ ورىندارىندا ءبىلىم الۋى ءۇشىن قوسىمشا 5 مىڭ ماقساتتى مەملەكەتتىك ءبىلىم گرانتى بولىنگەلى وتىر.
ەڭ باستىسى, جاستار جىلىندا جاستار ءۇشىن دامىعان مەملەكەتتەردىڭ وزىندە كەزدەسە بەرمەيتىن جەڭىلدىك قاراستىرىلىپ وتىر. ول – جۇمىس ىستەيتىن جاستاردى باسپانامەن قامتۋ باعدارلاماسى. بىراق بۇل جوبا ازىرگە ەلىمىزدىڭ باستى ءۇش قالاسىندا عانا جۇزەگە اسىرىلۋدا.
– نۇر-سۇلتان, الماتى جانە شىمكەنت قالالارىندا جۇمىس ىستەيتىن جاستارعا ارنالىپ ساتىپ الۋ قۇقىعىنسىز جالعا بەرىلەتىن ۇيلەر سالىنادى. ول قالالاردا جاستارعا جىلىنا 3 مىڭ پاتەردەن بەرىلەدى, – دەدى ۇكىمەت باسشىسى.
جاستار جىلىنىڭ اياسىندا جاستارعا ارنالىپ بولىنەتىن مەملەكەتتىك ماقساتتى گرانتتار سانى دا كوبەيتىلگەن. ماسەلەن, بيىلدىڭ وزىندە ۇكىمەتتىك ەمەس سەكتورعا بولىنگەن 49 گرانتتىڭ 29-ى وسى جاستار جىلىنا لايىقتالعان.
اقپارات جانە قوعامدىق دامۋ ءمينيسترى داۋرەن اباەۆتىڭ ايتۋىنشا, مەملەكەتتىك گرانتتاردىڭ اۋقىمى تۇرمىستىق زورلىق-زومبىلىقتىڭ الدىن الۋ مەن وتباسىلىق كەڭەس بەرۋدەن باستاپ, جاستاردىڭ ەكولوگيالىق بەلسەندىلىگىن ارتتىرۋ جانە ولاردى كاسىپكەرلىك داعدىلارىنا ماشىقتاندىرۋعا دەيىنگى كەڭ ارالىقتى قامتىعان.
– بۇل گرانتتار ۇكىمەتتىك ەمەس سەكتوردىڭ ءوز قالاۋى بويىنشا بولىنۋدە. ۇيىمدار وزدەرى بەيىم جانە ماشىقتانعان جوبالارى بويىنشا قارجىلاندىرىلىپ, بۇگىندە ولاردىڭ جۇمىستارى جوعارى ناتيجە كورسەتىپ وتىر, – دەپ اتاپ ءوتتى د.اباەۆ.
جالپى, جاستاردىڭ جوبالارىن قارجىلاندىرۋ – جاستار جىلىندا قولعا الىنعان اۋقىمدى شارالاردىڭ ءبىر بولىگى عانا. مىسالى, قازىر ەلىمىزدە «جاس مامان», «جاس كاسىپكەر» سىندى اۋقىمدى باعدارلامالار اياسىندا جاستاردى ناقتى قولداۋ شارالارى جۇزەگە اسىرىلۋدا.
ال ەلباسىنىڭ باستاماسىمەن قولعا الىنعان جاستار جىلىنىڭ نەگىزگى قورىتىندىلارى جىل سوڭىندا جاريالانادى.
