«ۇلكەن ءىستى باستاردا ارداقتى اقساقالدىڭ باتاسىن الىپ باستاۋدى ءجون كورەتىن حالىقپىز. قازاق – قاشان دا قارتىن قازىنام دەپ تانىپ, ۇلكەنىن سىيلاي بىلگەن حالىق. سودان دا بولار بىزدە ۇرپاقتار ساباقتاستىعى بەرىك ورنىققان. بۇگىنگى كەزدەسۋگە ءوزىنىڭ ىزگىلىكتى ىسىمەن, اقىل-پاراساتىمەن, ادامگەرشىلىك قاسيەتتەرىمەن ەلگە تانىلعان بەدەلدى ارداگەرلەرىمىز قاتىسىپ وتىر. سىزدەردىڭ ءاربىرىڭىزدىڭ سىر ءوڭىرى ءۇشىن ورىندارىڭىز بولەك. كەزىندە ەسەلى ەڭبەك ەتىپ, ەل مەرەيىن اسىرعان سىزدەر زەينەتكەرلىككە شىقساڭىزدار دا ۇيدە قاراپ جاتپاي قوعامعا قاجەتتى ىستەرگە بەلسەنە ارالاسىپ كەلەسىزدەر. سىر ءوڭىرى بۇگىنگى كۇنى ىلگەرى دامىپ جاتقان ءوڭىر ەكەنىن بىلەسىزدەر. ايتا كەتسەم دەيمىن, بۇگىنگە دەيىن قول جەتكىزگەن بارشا جەتىستىكتەرىمىز – ەلباسىمىز نۇرسۇلتان ءابىش ۇلى نازارباەۆتىڭ سىر ەلىنە دەگەن ەرەكشە قامقورلىعى مەن ماعان دەيىن وبلىستى باسقارعان ازاماتتاردىڭ ەڭبەگى. سونىڭ ىشىندە وبلىستى التى جىل ابىرويلى باسقارىپ, اگرارلى ايماقتان ىرگەلى يندۋستريالى-اگرارلى ايماققا اينالدىرعان قىرىمبەك ەلەۋ ۇلى كوشەرباەۆتىڭ ۇلەسى شەكسىز. ءبىز بۇل ىستەردى ءارى قاراي جالعاستىرىپ, جەتىستىكتەردى ەسەلەي بەرەتىن بولامىز», دەدى ايماق باسشىسى.
