جان-جاقتان ات تەرلەتىپ كەلگەن تويشىلار ءبىر جىلدى ارتقا تاستاپ, امان-ەسەن جۇزدەسكەندەرىنە شۇكىرشىلىك ەتىپ, ءبىر-بىرلەرىنە ەسەن-ساۋلىق سۇراسىپ جاتتى. قۇرىلتايعا ارنايى شاقىرىلعان سولتۇستىكقازاقستاندىق دەلەگاتسيا قۇرامىندا قازاقستان حالقى وبلىستىق اسسامبلەياسىنىڭ وكىلدەرى مەن كوركەمونەرپازدار ۇجىمدارى بولدى. كىل ونەرپازدار دومبىرانىڭ قۇلاعىندا ويناپ, قازاق اندەرىن ناقىشىنا كەلتىرە شىرقادى. ويىن-ساۋىق باعدارلاماسى اياسىندا بۇلشىق ەتتەرى بۇل-بۇل ويناعان, كەرمەدە بايلانعان سايگ ۇلىكتەي شيىرشىق اتقان بالۋاندار بەلدەسىپ, جاستار جاعى التىباقان تەبىستى. جۇرتشىلىق نازارىنا سول ءوڭىردىڭ 11 مۋنيتسيپاليتەتى تىككەن اق شاڭقانكيىز ۇيلەر ۇسىنىلىپ, باس جۇلدەنى يشيم قازاقتارىنىڭ ۇلتتىق-مادەني اۆتونومياسى جەڭىپ الدى. نۇر-سۇلتان قالاسىنىڭ ءسان تەاترى كورسەتكەن ۇلتتىق كيىمدەر مەن ات سپورتى بويىنشا بايگە تويدىڭ ءسانىن كەلتىرىپ, كورەرمەندەردى ۇمىتىلماس اسەرگە بولەدى.
«بۇگىندە رەسەيدە 700 مىڭنان استام ەتنيكالىق قازاق تۇرادى. تۇمەن قانداستارىمىز كوپ قونىستانعان وبلىس سانالادى. ولار اتا-بابالارىنىڭ ءتىلىن, سالت-ءداستۇرىن, ادەت-عۇرپىن ۇمىتپاۋ ماقساتىندا وسىمەن 23-ءىنشى رەت قۇرىلتاي وتكىزىپ, اتا-بابا اماناتىنا بەرىك ەكەندىكتەرىن تانىتتى. قۇرىلتايعا قورعان, سۆەردلوۆ, ومبى جانە چەليابى وبلىستارىنان دا مەيماندار ات باسىن تىرەپ, ورتاق قۋانىشتى ءبولىستى. اتا-جۇرتىمىزدان قولداپ كەلگەن باۋىرلارىمىز از بولعان جوق. سولتۇستىك قازاقستان وبلىسىمەن قاتار پاۆلودار, نۇر-سۇلتان, قاراعاندى جانە وسكەمەن قالالارىنان جينالعان باۋىرلارىمىزعا بەك ريزامىز», دەدى تۇمەن وبلىسى قازاقتارى ۇلتتىق-مادەني اۆتونومياسىنىڭ توراعاسى ەسەنعالي يبراەۆ.
قازاقستاندىقتار كاسىپورىنداردى ارالاپ, ينۆەستيتسيا تارتۋ جولدارىمەن, تۋريزم سالاسىنىڭ جەتىستىكتەرىمەن تانىستى. بۇگىندە جۇزدەن استام قازاقستاندىق كاسىپكەر تۇمەندىكتەرمەن تىعىز ارىپتەستىك قارىم-قاتىناس ورناتقان. قازاقستانمەن بيزنەس بايلانىس ورناتۋعا تالپىنعان رەسەيلىك كاسىپورىندار از ەمەس. سولاردىڭ ءبىرى «تيۋمەنستالموست» زاۋىتى ەلىمىزدەگى ءىرى كولىك ينفراقۇرىلىم نىساندارىمەن قويان-قولتىق جۇمىس ىستەۋدە. قۇرىلتاي بارىسىندا «Jusan» حالىقارالىق كاسىپكەرلەر بىرلەستىگى مەن «وتانداستار قورى» اق اراسىندا بىرلەسكەن جوبانىڭ تۇساۋى كەسىلدى. «وتانداستار قورى» اق-نىڭ وكىلى توعايباي رىسبەكتىڭ ايتۋىنشا, ەكىجاقتى كەلىسىم ناتيجەسىندە قولدانبالى ونەر شەبەرلەرىن, ونىڭ ىشىندە ۇلتتىق كيىم-كەشەك پەن تۇرمىستىق زاتتار جاساۋشىلاردى قولداۋ اياسى ودان سايىن كەڭەيە تۇسپەك.
فورۋمنىڭ كەڭەيتىلگەن ماجىلىسىندە قازاقتاردىڭ وڭىرلىك ۇلتتىق-مادەني اۆتونومياسىنىڭ جۇمىسى, الداعى جوسپارى تالقىلاندى. وندا بايانداما جاساعان ەسەنعالي يبراەۆ تۇمەن وبلىسىندا 20 مىڭنان استام قازاق تۇراتىنىن, اۆتونوميا جۇمىسىنىڭ باستى باعىتتارىنىڭ ءبىرى ۇلتتىق سالت-ءداستۇرىمىز مەن ادەت-عۇرپىمىزدى ساقتاۋ بولىپ تابىلاتىنىن, جەرگىلىكتى تۇرعىندار تاراپىنان قۇرىلتايعا دەگەن ىستىق ىقىلاس پەن جىلى قوشەمەت جىل سايىن ارتىپ كەلە جاتقانىن اتاپ ءوتتى.
