«ماقسات – رەكونسترۋكتسيالاۋ جەلىسىنە قوسىلعان الماتى تۇرعىندارىنىڭ جايلىلىق دەڭگەيلەرىنە ەش نۇقسان كەلتىرمەۋ جانە وعان قول جەتۋدە. قۇبىرلاردى تارتۋ بارىسىندا ۋاقىتشا سىزبالار ارقىلى تۇتىنۋشىلارعا سۋ مىندەتتى تۇردە بەرىلەدى», دەپ اتاپ ءوتتى باسقارما باسشىسى اسەت ماساباەۆ.
وڭتايلى ءادىس بىردەن بىرنەشە ماسەلەنى شەشۋدە. قالالىقتاردى تولىق جانە ساپالى كوممۋنالدىق قىزمەتپەن قامتۋمەن قاتار كوممۋنالدىق كاسىپورىنداردىڭ تەحنيكالىق جاعدايىن جاقسارتۋعا جانە ولاردى ءتيىستى دەڭگەيدە ۇستاپ تۇرۋ ءۇشىن قارجىنىڭ بولىنۋىنە, كورسەتىلگەن قىزمەت ءۇشىن تولەمدەردىڭ دەر كەزىندە تۇسۋىنە ىقپال ەتەتىنىن ايتتى.
جوندەۋ جۇرگىزۋ مۇمكىن ەمەس ۋاقىتشا كوممۋنيكاتسيالارى بار ءارى كوپ شىعىندالاتىن وبەكتىلەر ەسەپكە الىنبايدى. مىسالى, ەگەر تۇرعىن ءۇي جىلۋ جۇيەسى جوندەلىپ جاتقان جەردەن الشاق بولسا, وندا ونى وزگە جەلىگە قوسۋ تەحنيكالىق جاعىنان مۇمكىن ەمەس, ال ۋاقىتشا قۇبىردى ورناتۋعا كەتەتىن شىعىن تۇراقتى قولدانىستا بولاتىن جاڭا قۇبىر سالۋعا جۇمسالاتىن قارجىمەن بىردەي, ياعني ەكونوميكالىق جاعىنان ءتيىمسىز.
ايتا كەتەرلىگى, سۋىق سۋمەن جانە كارىز جۇيەسىمەن قامتۋدا مۇنداي پروبلەما مۇلدەم جوق, جوندەۋ جۇمىستارى كەزىندە سۋ تۇتىنۋشىعا ۇزدىكسىز بەرىلەدى جانە وزگە سىزبا بويىنشا اجىراتىلادى.
ەجيد باسقارماسىنىڭ باسشىسى رەكونسترۋكتسيا كەزىندە تۇرعىن ۇيلەر مەن الەۋمەتتىك نىساندارعا ۇزاق ۋاقىت ءتيىستى كوممۋنالدىق قىزمەتتەردىڭ كورسەتىلمەيتىندىگى تۋرالى اقپاراتتى جوققا شىعاردى.
«قالادا ىستىق جانە سۋىق سۋ مەن كارىز جەلىلەرى ۇزاق ۋاقىتقا ۇزىلگەن ەمەس. توزىعى جەتكەن ينجەنەرلىك جەلىلەردە كەنەتتەن بولاتىن اپاتتار كەزىندە ولار اجىراتىلىپ, جوندەۋ جۇمىستارى جەدەل جۇرگىزىلەدى. قازىرگى كەزدە زاماناۋي تەحنيكانىڭ كۇشىمەن اپاتتى جويۋ جانە جىلۋمەن, سۋمەن قامتۋ ورتاشا 7 ساعاتتان 6 ساعاتقا دەيىن قىسقاردى», دەدى ءا.ماساباەۆ.
2014 جىلدان ەسكى جىلۋ جەلىلەرى 2,2% تومەندەگەن, 63,5% دان 61,3% قىسقارعان, ال ماگيسترالدى جىلۋ جۇيەلەرىندەگى اقاۋلار 37%-عا ازايعان.
الماتىدا سوڭعى 5 جىل ىشىندە ماگيسترالدى جىلۋ جەلىلەرىنىڭ 103,8 كم استامى جوندەلگەن, ولاردىڭ 28,6 كيلومەترى «نۇرلى جول» باعدارلاماسى بويىنشا قايتا جوندەۋدەن ءوتتى.
