بۇل ەرەكشە ۇيىرمەنى قۇرۋ باستاماسىن ۇلتتىق تاۋ-كەن عىلىمدارى اكادەمياسىنىڭ پرەزيدەنتى, وسى مەكتەپتىڭ ءتۇلەگى نۇرلان رىسپانوۆ ۇسىنعان ەكەن. دەمەۋشىلىك قولداۋ دا كورسەتىپتى.
مۇعالىمدەردىڭ ايتۋىنشا, مەكتەپتە ارحەولوگيالىق ءۇيىرمەنىڭ اشىلۋى وقۋشىلار, اۋىل بالالارى ءۇشىن وتە ماڭىزدى. ويتكەنى باياناۋىلدا شەجىرەگە تولى اڭىزدار عانا ەمەس, تاريحي جانە ارحەولوگيالىق ورىندار دا از ەمەس.
ال بالبال تاستار «قازاقستاننىڭ ساكرالدى گەوگرافياسىنا» ەنگەن نىسانداردىڭ قاتارىندا. ەرتەدەگى ۇڭگىرلەر,تاۋداعى جۇمباققا تولى سۋرەتتەر, قورعاندار ەجەلگى ادامداردىڭ قولىمەن جاسالعان. باياناۋىلدا عالىمدار زەرتتەيتىن مۇنداي ورىندار جەتەرلىك.
مەكتەپتىڭ جوعارى سىنىپ وقۋشىلارى جازعى كانيكۋل كۇندەرىندە باياناۋىلدا جۇمىس ىستەپ جاتقان عالىم-ارحەولوگتارعا قولعابىس كورسەتۋدە. ولار جەرگىلىكتى پەداگوگيكالىق ينستيتۋت جانىنداعى «Margulan Centre» ورتالىعى قىزمەتكەرلەرىمەن ءبىرگە تاسمولا مادەنيەتىمەن تانىسىپ, ساق جاۋىنگەرىنىڭ ارحەولوگيالىق كونە ەسكەرتكىشىن قازۋعا قاتىسۋدا.
ولار سونداي-اق ارحەولوگيالىق جۇمىستارعا قاجەتتى كوممۋنيكاتسيالاردى جاساۋعا كومەكتەسەدى, تاريحي ەسكەرتكىشتەردى قورشايدى. سونىڭ ارقاسىندا وزدەرى تۇراتىن اتاقتى باياناۋىلدىڭ قاسيەتتى تاريحىن ءبىلىپ, ءتۇسىنىپ, زەردەلەۋدە.
پاۆلودار وبلىسى,
باياناۋىل اۋدانى
