سەمەيدەگى جاڭا مەديتسينالىق نىسان JCI ستاندارتى بويىنشا جوبالانىپ, جابدىقتالعان. گيبريدتى زالدى ۇلتتىق نەيروحيرۋرگيا عىلىمي ورتالىعى باسقارماسىنىڭ باسشىسى, ەلىمىزدىڭ ۇزدىك نەيروحيرۋرگى, پروفەسسور سەرىك اقشولاقوۆ اشتى. سونداي-اق بىردەن وپەراتسيا جاساۋعا بەتتەگەن. سەرىك اقشولاقوۆ نەيروحيرۋگيا ورتالىعىنداعى قان-تامىرلى نەيروحيرۋگيا ءبولىمىنىڭ مەڭگەرۋشىسى ەربول ماحامبەتوۆپەن جانە سەمەيدەگى جەدەل مەديتسينالىق ءجاردەم كورسەتۋ اۋرۋحاناسىنداعى ەندەۆوسكۋليارلى حيرۋرگيا جانە گيبريدتى وپەراتسيالىق ءبولىمىنىڭ مەڭگەرۋشىسى ايبول مارالباەۆپەن بىرگە ءتورت ساعات بويى وسىندا شۇعىل كەلىپ تۇسكەن ناۋقاستىڭ باسىنداعى قاتەرلى ىسىككە كۇردەلى وپەراتسيا جاساپ, اشىق تۇردە الىپ تاستاۋ ءتاسىلىن قولداندى. ىسىكتى ءنارلەندىرىپ تۇرعان تامىرلاردى جويدى.
– مۇنداي وپەراتسيا ءبىز ءۇشىن بۇرىن بىرنەشە كۇنگە سوزىلعان ەكى بولىمنەن تۇراتىن ەدى, – دەدى ەلىمىزدىڭ باس نەيروحيرۋرگى سەرىك اقشولاقوۆ, – مىسالى بىرىنشىسىندە, ىسىكتى ءوسىرىپ بارا جاتقان تامىرلاردى ەندوسۆوسكۋليارلى تۇردە الىپ تاستايمىز, ەكىنشىسىندە بىرنەشە كۇن وتكەن سوڭ, سول قاتەرلى ىسىكتىڭ ءوزىن الىپ تاستايتىنبىز. بۇل ارالىقتا ناۋقاستىڭ دا ءحالى قيىنداپ كەتۋى مۇمكىن. ال بۇگىن گيبريدتى وپەراتسيا جاساۋ زالىنىڭ اشىلۋىنا وراي, مەن شاعىن ءينۆازيۆتى تۇردە, ناۋقاسقا كوپ زيان شەكتىرمەي, ەكى وپەراتسيانى بىردەن جاسادىم. شىنى كەرەك, قازاقستاندا ەشبىر جەردە ازىرشە جوق گيبريدتى وپەراتسيانى جاساۋ بارىسىندا جاڭا قۇرال-جابدىقتىڭ كومەگىمەن ناۋقاستىڭ ءومىرىن ساقتاپ قالعانىما ەرەكشە قۋانىشتىمىن. گيبريدتى وپەراتسيالىق زال جەرگىلىكتى وبلىس تۇرعىندارىنا جوعارى تەحنولوگيالىق مەديتسينالىق كومەك كورسەتە الادى. ناۋقاستار شەتكە شىقپاي-اق, ءوز ەلىمىزدە, سەمەيدە ەمدەلىپ شىعادى. بۇل ارينە, وبلىس اكىمى دانيال احمەتوۆتىڭ قولداۋى ارقىلى جۇزەگە اسىپ جاتقان جوبا. وبلىس باسشىسى دارىگەرلەردىڭ الەمدىك دەڭگەيدە جاڭا جەتىستىكتەرگە جەتۋىنە ءمۇمكىندىك جاساپ وتىر.
شىنىندا دا وبلىستىڭ دەنساۋلىق ساقتاۋ سالاسىنداعى كەشەندى دامۋ جوبالارىنا وراي 2018 جىلى وسكەمەن قالاسىنداعى وبلىستىق مەديتسينالىق مامانداندىرىلعان ورتالىقتا روبوتوحيرۋرگيا جانە ترانسپلانتولوگيا ورتالىعى اشىلعان ەدى. ال اياگوز بەن التاي قالالارىندا ۇلتتىق نەيروحيرۋرگيا ورتالىعىنىڭ ادىستەمەلىك كومەگى ارقىلى ەكىنشى دەڭگەيلى ينسۋلت ورتالىقتارى ىسكە قوسىلدى. سەمەي قالاسىنداعى جەدەل مەديتسينالىق جاردەم ورتالىعىندا ۇلتتىق تراۆماتولوگيا جانە ورتوپەديا عىلىمي-زەرتتەۋ ينستيتۋتىمەن ءبىرلەسىپ, پوليتراۆما جانە ورتوحيرۋرگيا ورتالىعى دا تۇساۋىن كەستى.
ال گيبريدتى وپەراتسيا زالى حيرۋرگيا سالاسىنىڭ كوپتەگەن سالالارىنىڭ باسىن بىرىكتىرەدى. ونىڭ وپەراتسيا جاسايتىن كلاسسيكالىق بولمەدەن ەرەكشەلىگى ارنايى ۇلكەن زال ەكەندىگى. كوپ جۇيەلى بلوكتا جاڭا دەڭگەيلى تەحنولوگيالار مەن قۇرال-جابدىقتار اشىق جانە شاعىن ينۆازيۆتى لاپاروسكوپيالىق تۇردەگى ماگنيتتى-رەزونانستىق توموگرافيا, حيرۋرگيالىق رەنتگەن جۇيەلەرى, ۋدز سالاسى, بەينەباقىلاۋ جۇيەسى ارقىلى كۇردەلى وپەراتسيانى ساپالى جاساۋ مۇمكىندىگى تولىق قامتىلعان.
سەمەيدەگى گيبريدتى وپەراتسيا بارىسىنا قاتىسقان وبلىس اكىمىنىڭ ورىنباسارى اسەم ءنۇسىپوۆانىڭ ايتۋىنشا, مۇنداي جاڭاشىل تەحنولوگيا سەمەي ءوڭىرىن, قالا تۇرعىندارىن جوعارى مەديتسينالىق كومەكپەن تولىق قامتاماسىز ەتۋگە مۇمكىندىك بەرەدى.
– سەمەيدەگى جەدەل مەديتسينالىق جاردەم كورسەتۋ اۋرۋحاناسى سەمەي ءوڭىرىنىڭ 700 مىڭ تۇرعىنىنا مەديتسينالىق كومەك كورسەتەدى, – دەدى وبلىس اكىمىنىڭ ورىنباسارى اسەم ءنۇسىپوۆا – وسىلايشا بۇل ايماقتىڭ ستاتسيونارلى كومەگىنىڭ 40 پايىزىن قامتيدى. جىل سايىن 24 مىڭ تۇرعىن ەمحانانىڭ قابىلداۋ, دياگنوز قويۋ بولىمىنەن تەكسەرىلۋدەن ءوتىپ, ونىڭ 14 مىڭ ناۋقاسى اۋرۋحاناعا جولدانادى. مۇنداي كوپ مولشەردەگى سىرقاتتار جاڭا گيبريدتى وپەراتسيالىق زالدىڭ كەرەك ەكەنىن راستايدى. ادامدارعا شۇعىل تۇردە كەشەندى مەديتسينالىق كومەك كورسەتۋگە تولىق مۇمكىندىك بار. اسىرەسە قان تامىرلارى جۇيەسىنىڭ بۇزىلۋى كەزىندە, ءتۇرلى كوپ دەڭگەيلى جاراقاتتاردا, ينسۋلت پەن ينفاركت العاندا جاڭا تەحنولوگيالاردى ىسكە قوسۋ ارقىلى ەمدەۋگە بولادى. گيبريدتى وپەراتسيا زالى جوباسىنا 2,3 ملرد تەڭگە بولىنسە, زالدىڭ قۇرال-جابدىعىن الۋعا 1,7 ملرد تەڭگە جۇمسالدى. بۇل قارجى وبلىستىق بيۋدجەتتەن جانە بيۋدجەتتەن تىس قورلاردان بەرىلىپ وتىر. قۇرال-جابدىقتار ەۋروپالىق جانە امەريكالىق ساپا كورسەتكىشتەرىنىڭ سوڭعى ۇلگىسى. وسى ارقىلى دەنساۋلىق ساقتاۋ مينيسترلىگىنىڭ قولداۋىمەن شىعىس قازاقستان وبلىسىنىڭ تۇرعىندارىنا كەپىلدى مەديتسينالىق كومەك كورسەتۋ باعدارلاماسى ارقىلى تەگىن تۇردە ەمدەۋ, وپەراتسيا جاساۋ, ساۋىقتىرۋ شارالارىن جاساي الامىز.
گيبريدتى وپەراتسيا بولمەسىندە جۇمىس ىستەۋ ءۇشىن مامان دارىگەرلەر توبى دايىندالعان. وپەراتسيا جاساۋعا وراي الدىن الا دايىندالعان 20 شاقتى دارىگەر ءوز ىسىنە تەز ارادا كىرىسە الادى. جىلىنا 3 مىڭ وپەراتسيا وتەدى دەپ جوسپارلانۋدا. وتباسىلىق دەنساۋلىق ساقتاۋ باسقارماسىنىڭ باسشىسى ءىلياس مۇحامەدجاننىڭ ايتۋىنشا, سەمەي قالاسىنىڭ جەدەل مەديتسينالىق جاردەم كورسەتۋ اۋرۋحاناسى 2017 جىلدان باستاپ, دارىگەرلەردىڭ بىلىكتىلىگىن كوتەرۋ ءۇشىن ءۇش دەڭگەيلى وقىتۋ جۇيەسىن قولعا العان. 2017 جىلى وبلىس اكىمدىگى بۇعان 3,2 ملرد تەڭگە بولگەن. وسى جوبا اياسىندا انگليادا 3 اي بويى 19 مامان مۋلتي ءتارتىپ توبى باعىتىندا ءبىلىمدەرىن كوتەرىپ كەلدى.
بۇعان رەنتگەندى حيرۋرگيا, انەستەزيولوگيا, تراۆماتولوگيا, نەۆرولوگيا, كارديولوگيا جانە ساۋلەمەن ەمدەۋ ماماندارى دا كىردى. جانە رەسپۋبليكالىق ورتالىقتاردا نەيروحيرۋرگيا, ينتەرۆەنتسيالىق كارديولوگيا, رەنتگەن-زەرتحاناشى ماماندارى دا وقىتىلدى. جالپى گيبريدتى وپەراتسياعا جۇمىس ىستەۋگە 43 مامان دايارلانعان. بيىل شەتەلدەردە وقىتۋ باعدارلاماسى جالعاسىن تابادى. سوعان وراي قىركۇيەك ايىندا بىلىكتىلىكتەرىن كوتەرىپ, ءبىلىم الۋ ءۇشىن سەمەي قالاسىنداعى جەدەل مەديتسينالىق جاردەم كورسەتۋ اۋرۋحاناسىنان شەتەلگە 12 مامان اتتانادى.
