مۇزدى شوۋ دەنيسكە جول كورسەتىپ, باعىت سىلتەگەن باپكەرلەرگە قۇرمەت كورسەتۋدەن باستالدى. جانكۇيەرلەر فرەنك كەررولل مەن ەلەنا بۋيانوۆانى (ۆودورەزوۆا) قۇرمەتپەن قارسى الدى. سونداي-اق الماتى قالاسىنىڭ اكىمى باقىتجان ساعىنتاەۆ پەن قازاقستان ۇوك پرەزيدەنتى تيمۋر ق ۇلىباەۆ كەشتىڭ قادىرلى قوناقتارى قاتارىندا بولدى.
الەمدىك مانەرلەپ سىرعاناۋ سپورتىنىڭ جۇلدىزدارىن قازاقستانعا شاقىرىپ, شوۋ ۇيىمداستىرۋدى دەنيستىڭ ءوزى باستاعان بولاتىن. العاش رەت ەلىمىزدەگى مۇزدى شوۋ 2013 جىلى ۇيىمداستىرىلدى. «دەنيس پەن ونىڭ دوستارى» دەپ اتالاتىن شوۋ-باعدارلاما قازاقستاندىقتار عانا ەمەس, شەتەلدىكتەر اراسىندا دا ۇلكەن تانىمالدىققا يە بولدى. شوۋدى تاماشالاۋ ءۇشىن الەمنىڭ بىرنەشە مەملەكەتىنەن تۋريستەر ارنايى قازاقستانعا كەلەتىن. ال شوۋ قاتىسۋشىلارى «دەنيس پەن ونىڭ دوستارى» جوعارى دەڭگەيدە ۇيىمداستىرىلاتىن, مانەرلەپ سىرعاناۋ الەمىندەگى تەڭدەسسىز جوبالاردىڭ ءبىرى ەكەنىن العا تارتادى.
دەنيس ۇيىمداستىرعان ءاربىر شوۋ قىزىققا, شىنايىلىققا تولى بولاتىن. ەڭ باستىسى – حالىقتى ءبىر ارناعا توعىستىرىپ, قازاقستاندى بىرلىگى جاراسقان ەل رەتىندە كورسەتۋ تۋرالى ۇلكەن ارمانى ساقتالدى. بۇگىندە ونىڭ باستاعان ءىسى اياقسىز قالعان جوق. چەمپيوندى ەسكە الۋ ءۇشىن بيىل دا جانكۇيەرلەر مەن ونىڭ دوستارى, مانەرلەپ سىرعاناۋ سپورتىنىڭ جۇلدىزدارى الماتىعا جينالدى. ارنايى ۇيىمداستىرىلعان ءىس-شاراعا ماو اسادا, ەلەنا راديونوۆا, كەيتلين ۆيۆەر, ەندريۋ پوجە, يۆان بۋكين, الەكساندرا ستەپانوۆا, مۋرا تاكاحيتو, سەرگەي ۆورونوۆ, ماري پەر لەراي, سوفيا شەۆچەنكو, ەگور ەرەمەنكو, دابين چوي, دجەرەمي ەببوت سىندى دەنيستىڭ دوستارى جينالدى.
