تۋريستىك كەرۋەنگە جاستار 22 شىلدەگە دەيىن جالعاساتىن كونكۋرس ارقىلى قاتىسا الادى. ىرىكتەۋدەن وتكەن بەلسەندىلەر ەلىمىزدىڭ 7 وڭىرىندەگى تۋريستىك ورىندار مەن كيەلى جەرلەردى ارالاپ, ءوز اسەرلەرىن الەۋمەتتىك جەلىلەر ارقىلى بولىسەدى. سونداي-اق ولار وسى جەرلەردىڭ تۋريستىك الەۋەتىن ارتتىرۋعا ارنالعان ۇسىنىستارىن دا ايتاتىن بولادى.
«قازىرگە دەيىن 1000-نان استام ۇسىنىس ءتۇستى. ءوتىنىش ءبىلدىرۋشىلەردىڭ سانى 2000-عا جەتەدى دەپ كۇتۋدەمىز. ناتيجەسى 25 شىلدەدە جاريالانادى. ىرىكتەۋدەن وتكەن جاستار 12 تامىزدا نۇر-سۇلتان قالاسىندا وتاندىق ەسترادا جۇلدىزدارىنىڭ قاتىسۋىمەن سلەت وتكىزىپ, 13 تامىزدا 7 باعىت بويىنشا جولعا شىعادى. ولار 4 كۇن بويى اقمولا, الماتى, قاراعاندى, پاۆلودار, ورال, وسكەمەن, شىمكەنت قالالارىنداعى تۋريستىك نىساندار مەن كيەلى ورىنداردى ارالاپ, ءوز ويلارىن الەۋمەتتىك جەلىلەردە جاريالايدى. ساپار سوڭىندا جاستاردىڭ ەلىمىزدىڭ تۋريزم ينفراقۇرىلىمىن شەشۋگە ارنالعان ۇسىنىستارىن جيناقتاپ ءتيىستى مەملەكەتتىك ورگاندارعا جولدايمىز», دەيدى ورتالىق كوممۋنيكاتسيالار قىزمەتىندە وتكەن تۇساۋكەسەردە ءسوز العان قازاقستان جاستار كونگرەسىنىڭ اتقارۋشى ديرەكتورى توقتار بولىسوۆ.
جاستارمەن بىرگە تانىمال بلوگەرلەر, ۆاينەرلەر جانە اكتەرلەر دە ساياحات جاسايدى. اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى شاحماردان بايمانوۆتىڭ ايتۋىنشا, جاستار جىلىندا 89 جوبانى جۇزەگە اسىرۋ جوسپارلانعان. «Jastar kerýeni» – سونىڭ ىشىندەگى ەڭ ىرىلەرىنىڭ ءبىرى. «بۇل جوبا ارقىلى تۋعان ولكەمىزدىڭ تاريحىن تانىتىپ, كورىكتى جەرلەرىن كورسەتە الامىز. سونداي-اق جۇرتشىلىققا ءبىز بىلە بەرمەيتىن جەرلەردى ناسيحاتتاۋعا مۇمكىندىك تۋماق», دەيدى شاحماردان بايمانوۆ.
