الدىمەن يندۋستريالاندىرۋ كارتاسى اياسىندا اشىلعان ورال ترانسفورماتور زاۋىتىندا بولىپ, جۇمىس قارقىنىن باعامدادى. ءوندىرىس ورنى بيىل 9 مىڭ ترانسفورماتور شىعارۋدى جوسپارلاعان بولاتىن. قازىر مۇندا 300-دەي جۇمىسشى ءۇش اۋىسىممەن جۇمىس جاسايدى. جىل سوڭىنا دەيىن زاۋىتقا قوسىمشا تسەح سالىنىپ, قىزمەتكەرلەر سانىن 800-گە دەيىن ارتتىرۋ كوزدەلۋدە.
«جۇمىسشىلارمەن تىلدەستىك. جالاقىلارى ورتاشا ەسەپپەن 170 مىڭ تەڭگە. زاۋىت بولاشاقتا يندۋستريالدىق كوللەدجدى سەنىمگەرلىك باسقارۋعا الىپ, وزدەرىنە قاجەتتى كادرلاردى دايارلاۋدى قولعا الماق. جۇمىس ورنى كوبەيتىلىپ, سالىقتىق بازا ۇلعايتىلادى. سونداي-اق ونىمدەرىنىڭ 90 پايىزى ەكسپورتقا شىعارىلادى. بۇل دا قۋانتارلىق جاعداي», - دەدى پارلامەنت سەناتىنىڭ دەپۋتاتى ەربولات مۇقاەۆ.
سەناتورلار جۇمىس ساپارى بارىسىندا «بولاشاق-ت» سەرىكتەستىگىندە بولىپ, كومبيناتتاعى جۇمىستىڭ تولىققاندى اتقارىلىپ جاتقانىنا كوز جەتكىزدى. قازىر مۇندا 66 ادام جۇمىس ىستەيدى. جۇمىسشىلاردىڭ ورتاشا جالاقىسى – 150-160 مىڭ تەڭگە. كومبينات جىلىنا 50 مىڭ شارشى مەتر پانەلدى ءۇي ماتەريالدارىن جيناقتاپ وتىر. بيىل كومپانيا ورال قالاسى بويىنشا جالپى اۋماعى 27 مىڭ شارشى مەتر بولاتىن ءتورت كوپقاباتتى تۇرعىن ءۇيدىڭ قۇرىلىسىن اياقتاپ, پايدالانۋعا تاپسىردى. جىل سوڭىنا دەيىن تاعى ءۇش ءۇيدىڭ قۇرىلىسىن اياقتاۋ كوزدەلىپ وتىر. كومبيناتتاعى قۇرىلىس ماتەريالدارىنىڭ 70-80 پايىزى وتاندىق ءونىم. تەك تەمىر سىمداردى عانا رەسەيدەن الىپ وتىر.
سەرىكتەستىك باسشىسى اسقار كۋششانوۆ دەپۋتاتتارعا كومبينات قىزمەتىن تانىستىرا كەلىپ, قۇرىلىسقا قاجەتتى قيىرشىق تاس اقتوبەدەن جەتكىزىلەتىن بولعاندىقتان, باعاسى جول-كولىكتىك تاسىمالعا بايلانىستى ەكى ەسە قىمباتقا شىعاتىنىن جەتكىزدى. سول سەبەپتى كومبيناتتىڭ قۇرىلىس ماتەريالدارىنىڭ وزىندىك قۇنىن تۇسىرۋگە مۇمكىندىك بولماي تۇر.
«وڭىردە تۇرعىن-ءۇي قۇرىلىسى قارقىندى. وعان سۇرانىس تا جوعارى. پانەلدى ماتەريالدارمەن دايىندالعان ءۇي مونوليت ۇيلەرگە قاراعاندا تەز سالىنادى. تيىسىنشە, حالىقتى تەزىرەك باسپانامەن قامتۋعا مۇمكىندىك بەرەدى. كومبينات باسشىلىعىنىڭ كوتەرىپ وتىرعان ماسەلەسىن ءبىز ۇكىمەتكە جەتكىزەتىن بولامىز», - دەدى سەناتور ناريمان تورەعاليەۆ.
سونىمەن قاتار دەپۋتاتتار «اتامەكەن» قالالىق بالالار ءتۋريزمى جانە ەكولوگيا ورتالىعىندا بولىپ, تابيعات اياسىنداعى بالالار لاگەرىنىڭ جۇمىسىمەن تانىستى.
