سازگەردىڭ تۋعان جەرىندە جىل سايىن وتكىزىلەتىن ءان بايقاۋىنا جەرگىلىكتى انشىلەردەن بولەك نۇر-سۇلتان, الماتى, وسكەمەن, تاراز, اقتوبە, قوستاناي, قاراعاندى, اتىراۋ, قىزىلوردا قالالارىنان, وزبەكستان رەسپۋبليكاسى قۇرامىنداعى قاراقالپاق رەسپۋبليكاسىنىڭ استاناسى نوكىس شاھارىنان كەلگەن ۇمىتكەر قاتىسۋدا.
حالىقارالىق «اتامەكەن» ءان فەستيۆالىنىڭ حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا وتكەن اشىلۋ سالتاناتىندا وبلىستىق مادەنيەت باسقارماسىنىڭ باسشىسى قادىربولات مۇساعاليەۆ ءسوز سويلەپ, داستۇرگە اينالعان ءان بايقاۋىنىڭ بيىلعى ەرەكشەلىگى – ۇمىتكەرلەردىڭ ەسترادالىق ۆوكال جانە رومانس جانرىندا ءان سالاتىنىن ايتتى.
- كەلەر جىلى ءبىزدىڭ ەسكەندىر اعامىز 80 جاسقا تولادى. سونىمەن بىرگە ايگىلى «اتامەكەن» ءانىنىڭ جارىققا شىققانىنا دا 50 جىل تولادى. سوندىقتان الداعى جىلى اق جايىق وڭىرىندە اۋقىمدى شارالار مول بولماق, - دەدى قادىربولات مۇساعاليەۆ.
فەستيۆالگە ەسكەندىر حاسانعاليەۆ اعامىزدىڭ وزىمەن بىرگە ۇلى, قازاقستان رەسپۋبليكاسىنىڭ ەڭبەك سىڭىرگەن قايراتكەرى, ءانشى-كومپوزيتور ءبىرجان حاسانعاليەۆ ارنايى قوناق رەتىندە كەلگەن. قازىلار القاسىنىڭ قۇرامىندا سونداي-اق قازاقستان رەسپۋبليكاسىنىڭ ەڭبەك سىڭىرگەن ءارتيسى, عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونيا ءانشىسى جۇماعانىم راحيموۆا, قاناتقالي قوجاقوۆ جانە ءىV حالىقارالىق «اتامەكەن»ان فەستيۆالىنىڭ جۇلدەگەرى, ءانشى-كومپوزيتور تاڭات جەكسەنباەۆ بار.
بايقاۋ قورىتىندىسى 17 شىلدە كۇنى شىعادى. جەڭىمپازدار ارنايى ديپلوم, ستاتۋەتكا جانە اقشالاي سىيلىقتارمەن ماراپاتتالادى.
باتىس قازاقستان
