بۇعان دەيىن دە اۋىل شارۋاشىلىعىن عالىمدارمەن تىزە قوسا وتىرىپ دامىتۋ ماسەلەسى ايتىلعان. ءبىر عانا مىسال – قۇرىلعانىنا كوپ بولا قويماعان, اۋماعى 1,5 مىڭ گەكتاردى الىپ جاتقان ءبىزدىڭ «وڭتۇستىك اگروپاركى» يننوۆاتسيالىق تەحنولوگيالارعا, عالىمداردىڭ زەرتتەۋلەرىنە سۇيەنە وتىرىپ, ونىمدىلىكتى ءۇش ەسە ارتتىردى. ياعني, عىلىم مەن اۋىل شارۋاشىلىعىن بىرىكتىرۋ ناقتى ناتيجە بەردى. بۇل تابىسقا ءبىز ەگىنشىلىك جانە وسىمدىك, ءوسىمدىكتەردى قورعاۋ جانە كارانتين, سۋ شارۋاشىلىعى عىلىمي-زەرتتەۋ ينستيتۋتتارىمەن بىرلەسىپ قول جەتكىزدىك. وسىنداي ينتەگراتسيالانۋ ارقىلى اگروپاركتە جەردى ءتيىمدى پايدالانۋعا بولاتىنىنا كوز جەتكىزدىك.
سوندىقتان ەلىمىزدىڭ ءاربىر اۋدانىندا وسىنداي اگروپاركتەر قاجەت. جەرگىلىكتى شارۋالار عالىمداردىڭ تاجىريبەسىنە, جاڭا تەحنولوگيالارعا سۇيەنە وتىرىپ, ەگىستىكتەر مەن باقشالاردىڭ ءونىمدىلىگىن ارتتىرىپ, جەردى ءتيىمدى پايدالانۋعا قول جەتكىزەدى. كەرەك كەزىندە كەڭەس الىپ تۇرادى. سول كەزدە عانا اۋىل شارۋاشىلىعى العا جىلجيدى. قۇر بەينەتتەن تۇراتىن ەسكى ادىستەردەن باس تارتۋ كەرەك. قازىرگى تاڭدا اگروبيزنەستىڭ وزىندىك قۇپيالارى كوپ. اگروبيزنەسپەن اينالىسۋدى قولعا العان ەتى ءتىرى ازاماتتار وسىنىڭ ءبارىن بىلگەنى ءجون.
تۇقىمنىڭ, جەردىڭ ساپاسىن جاقسارتۋ كەرەك. سەبىلەتىن ۇرىقتاردى ساۋىقتىرىپ بارىپ قولدانباسا, وندا توگىلگەن تەر دالاعا كەتەدى. قازىر دۇنيە ءجۇزى ورگانيكالىق ءونىم الۋ ءۇشىن بارىن سالىپ جاتىر. ال بۇل ماسەلەدە ءبىزدىڭ ءمۇمكىندىگىمىز, الەۋەتىمىز وتە جوعارى. تەك سونى پايدالانا ءبىلۋ قاجەت. ەگىس القاپتارىندا ۋلى حيميكاتتاردىڭ ورنىنا بيولوگيالىق ءتاسىلدەر ارقىلى زيانكەستەرمەن, ارامشوپتەر ارقىلى وتە ءتيىمدى كۇرەسۋگە بولادى.
اۋىل شارۋاشىلىعىن دامىتۋدىڭ 90%-ى تەحنيكاعا تاۋەلدى. زامانعا ساي تەحنولوگيالاردى پايدالانىپ استىقتىڭ ءتۇسىمىن, كوكونىستەردىڭ ونىمدىلىگىن الدەقايدا ارتتىرۋعا بولاتىنىن كورىپ وتىرمىز.
مەملەكەت باسشىسى: «اۋىل شارۋاشىلىعى – باسشىلىعىنىڭ اراسىندا ساباقتاستىق جوق جالعىز سالا. ءبىز وسى ۋاقىتقا دەيىن قانشاما باعدارلاما قابىلداپ, قانشاما ۋادە تىڭدادىق! ءاربىر مينيستر سول قابىلدانعان باعدارلاماسىنىڭ دۇرىس ەكەنىن دالەلدەپ باقتى. ال قازىر قولىمىزدا نە بار؟ قۇرعاق ۋادەلەر مە؟» دەپ ماسەلەنى توتەسىنەن قويدى. ياعني, پرەزيدەنت اۋىل شارۋاشىلىعى ەڭبەككەرلەرىنىڭ مەملەكەتتىك قولداۋ تالاپتارىنىڭ ءجيى وزگەرۋىنە بايلانىستى شاعىمدارىنىڭ دا ورىندى ەكەنىن ايتتى. مىسالى, ەگىستىك كۇنىندە 28 جىلدا 18 اۋىل شارۋاشىلىعىن قولداۋ تەتىگى وزگەرگەنىن, ونىڭ كەرى سالدارى تۋرالى اگرارلىق بيزنەسپەن اينالىسىپ جۇرگەندەر اتاپ كورسەتكەن بولاتىن. مۇنداي وزگەرىستەر سۋبسيديا الۋدا, دۇرىس يننوۆاتسيالىق شەشىم قابىلداۋدا قيىندىقتار تۋدىرىپ, اگروبيزنەستىڭ تارتىمدىلىعى مەن تابىسىن ءتومەندەتەدى, كاسىپكەرلەردىڭ ەرتەڭگى كۇنگە دەگەن سەنىمىن جوعالتاتىنى دا راس.
ەڭ باستىسى, اگرارلىق عىلىممەن اينالىسۋعا دەن قويعان جاستاردىڭ قۇلشىنىسى مەن قىزىعۋشىلىعىن جوعالتىپ الماۋىمىز كەرەك. اۋىل شارۋاشىلىعىنداعى تالانتتى جاستاردى قالايدا وسى سالادا ۇستاپ قالۋ كەرەك.
