- سوڭعى ەكى كۇن ىشىندە عانا ءۇش بالانىڭ اجالى سۋدان بولدى, - دەيدى بقو توتەنشە جاعدايلار دەپارتامەنتىنىڭ ءباسپاسوز حاتشىسى جادىگەر قۇسايىنوۆ.
ماۋسىمنىڭ 10-ى كۇنى كەشكى ساعات 21.19 شاماسىندا قازتالوۆ اۋدانىنا قاراستى جالپاقتال اۋىلىنىڭ ورتاسىنان اعاتىن قاراوزەننەن جەرگىلىكتى تۇرعىندار 2013 جىلعى ۇل بالانىڭ دەنەسىن سۋدان شىعارىپ الدى.
11 ماۋسىم كۇنى 16.12 ساعاتتا ورال قالاسى ەليزاروۆ كوشەسى ماڭىندا جايىق وزەنىنە بىردەن ەكى بالا سۋعا كەتىپ قالعان. ونىڭ ءبىرى 13 جاسار ۇل بالا, ەكىنشىسى – 11-دەگى قىز بالا. «بالالار «سۋعا تۇسۋگە بولمايدى!» دەگەن بەلگى ورناتىلعان جەرگە شومىلعان» دەيدى توتەنشەلىكتەر. سۋعا كەتكەن بالالاردىڭ دەنەسىن سۇڭگۋىر ماماندار الىپ شىقتى.
«كوپ جاعدايدا بالالار سۋعا ۇلكەندەردىڭ قاداعالاۋىنسىز تۇسەدى. ەرەسەكتەردىڭ سالعىرتتىعىنان ورنى تولماس قازاعا ۇرىنىپ جاتامىز. اسىرەسە سۋعا شومىلۋعا تيىم سالىنعان جەرلەردە تۇسۋگە بولمايدى. ماس كۇيىندە سۋعا ءتۇسۋ, سۋ ىشىندە تەنتەكتىك جاساۋ, ويناۋدىڭ اياعى ناسىرعا شابۋى مۇمكىن. سۋعا تۇسەتىن ادام ءار كەز قۇتقارۋ قۇرالدارىن كيىپ ءجۇرۋى كەرەك. اسىرەسە بالالاردان كوز جازباڭىز, ولاردى سۋ ايدىندارىندا شومىلۋعا جالعىز جىبەرمەڭىز!» دەيدى باتىس قازاقستان وبلىسى توتەنشە جاعدايلار دەپارتامەنتى.
سوڭعى ون جىل ىشىندە باتىس قازاقستان وبلىسىندا 270 ادام سۋعا كەتكەن ەكەن, ونىڭ 70-تەن استامى بالالار.
باتىس قازاقستان
