وسى جولعى ساپاردىڭ وزىندىك ەرەكشەلىگى بار, سەبەبى بۇعان قىرعىزستان, رەسەي جانە بەلارۋس سياقتى ەلدەردەن كەلگەن قازاق دياسپوراسى وكىلدەرىنىڭ بالالارى قاتىستى. 9 كۇننىڭ ىشىندە بالالار 5 ءىرى قالانى ارالاپ, ءار قالانىڭ تاريحىن تەرەڭىرەك تانىپ, جان-جاقتان كەلگەن قۇربىلارىمەن تانىسقان. سونداي-اق قالالار اراسىنداعى ساپار بارىسىندا ءتۇرلى ۇيىرمەلەر مەن شەبەرلىك-سىنىپتارعا قاتىسىپ, ۋاقىتتارىن قىزىقتى وتكىزدى.
«مەن سىزدەردى ەكىنشى ماۋسىمنىڭ جابىلۋ سالتاناتىندا كورگەنىمە قۋانىشتىمىن. ءارى الەۋمەتتىك جەلىدەگى ءارتۇرلى پىكىرلەرىڭىزدەن جازعى لاگەردىڭ جوعارى دەڭگەيدە وتكەنىن, سونىمەن قاتار سىزدەرگە ۇناعانىن بايقادىم. ساياحاتقا تولى ساپار جاندارىڭىزدا جاتتالىپ قالاتىنىنا, ۋاقىت وتە كەلە قىزىققا تولى ەستەلىككە اينالاتىنىنا سەنىمدىمىن. «تۋعان ەلگە ساياحات» لاگەرى ەل تاريحىن تانۋعا جاسالعان ساپارلاردىڭ باستاۋى بولىپ, كەلەشەك ومىرلەرىڭىز جارقىن ساتتەرمەن ءورىلسىن», دەدى «الەۋمەتتىك جوبالار قورى» كورپوراتيۆتىك قور ديرەكتورى ەربول ەرمۇحان ۇلى.
ەستەرىڭىزگە سالا كەتسەك, 1 ماۋسىم حالىقارالىق بالالاردى قورعاۋ كۇنى «تۋعان ەلگە ساياحات» بالالار تۋريستىك پويىزى» جوباسىنىڭ العاشقى ماۋسىمى باستالعان بولاتىن. جوبانى «سامۇرىق-قازىنا» اق كومپانيالار توبى اتىنان «Samruk-Kazyna Trust» الەۋمەتتىك جوبالاردى دامىتۋ قورى جۇزەگە اسىرىپ جاتىر جانە بالالاردىڭ جان-جاقتى دامۋىنا, قورشاعان الەمگە قىزىعۋشىلىعىن ارتتىرۋعا, ەلدىڭ تاريحي جانە ساۋلەت ەسكەرتكىشتەرىمەن تانىسىپ, ءپاتريوتيزمدى نىعايتۋعا باعىتتالعان. پويىز باعدارىنا نۇر-سۇلتان, بايقوڭىر, تاراز, الماتى جانە بالقاش سياقتى قالالار كىرەدى. جالپى, 2019 جىلعى ماۋسىم جوباسىنا 600 بالا قاتىستى.
اتالعان لاگەردىڭ تىنىعۋشىسى, قىزىلوردا وبلىسى, شيەلى اۋدانىنىڭ وقۋشىسى پەرنەباي اقنيەت اعىنان جارىلىپ, ەلىمىزدىڭ تاريحي ءھام تابيعي ەلدى مەكەندەرىمەن ەتەنە تانىسقانىن جاسىرمادى.
«تۋعان ەلگە ساياحات» لاگەرى ءبىزدى قازاقستاننىڭ ەڭ مادەني وڭىرلەرىمەن, اتاپ ايتقاندا باس قالامىز, جاس قالامىز نۇر-سۇلتانمەن, قارت قالامىز الماتىمەن, كونە قالا تارازبەن, عارىش قالاسى بايقوڭىرمەن تانىستىردى. ماعان ەڭ قاتتى ۇناعان قالا نۇر-سۇلتان جانە تاراز. نۇر-سۇلتان قالاسىندا ءبىز نازارباەۆ ۋنيۆەرسيتەتىندە بولدىق. بۇل ۋنيۆەرسيتەتتە كوپتەگەن ۇلت وكىلدەرى ءبىر-بىرىمەن جارىسا ىزدەنىپ, بىلىممەن سۋسىنداۋدا. مەندە بولاشاقتا ەلگە قىزمەت ەتەتىن ازامات بولۋ ءۇشىن ءدال وسى نازارباەۆ ۋنيۆەرسيتەتىنە تۇسكىم كەلەدى. ال تاراز قالاسىندا قۇدىرەتى مەن قاسيەتى تاسىعان ايشا ءبيبى, قاراحان جانە بابادجا حاتۋن كەسەنەلەرىندە بولىپ, ەجەلگى ءداۋىر مادەنيەتىمەن تانىستىق. وسىنداي ەجەلگى ءداۋىر ەسكەرتكىشتەرىمەن قاتار, وسى زامان مادەنيەتىن ءبىر-بىرىمەن ۇندەستىرىپ, توعىستىراتىن جوبالار كوپ بولسا, ەلىمىزدىڭ دە تۇعىرى بيىك, ال جاس پاتريوتتارىمىزدىڭ شىعار شىڭى اسپانمەن تالاسقان تاۋلاردىڭ ەڭ بيىك شىڭى بولماق», دەدى ول.
ۇيىمداستىرۋشىلاردىڭ ايتۋىنشا, لاگەر ماۋسىم, شىلدە, تامىز ايلارىن قامتيدى. وعان كوپ بالالى, از قامتىلعان جانە تولىق ەمەس وتباسىندا تاربيەلەنىپ جاتقان, وندىرىستىك كاسىپورىندار مەن زاۋىت جۇمىسشىلارىنىڭ وقۋ ۇلگەرىمى جاقسى بالالار, «وتانداستار قورى» كەاق-مەن سەرىكتەستىك نەگىزىندە شەت مەملەكەتتەردەن كەلگەن قازاق دياسپوراسىنىڭ وكىلدەرى جانە شىعارماشىلىق بايقاۋ قورىتىندىسى بويىنشا انىقتالعان جەڭىمپاز بالالار كىرەدى.
راۋان قايدار,
«Egemen Qazaqstan»
