ءىس-شارا وتاندىق وندىرۋشىلەردى قولداۋعا جانە قالا تۇرعىندارىن قولجەتىمدى باعامەن جاڭا پىسكەن ونىمدەرمەن قامتاماسىز ەتۋگە باعىتتالعان.
جارمەڭكە ەكى كۇن – 31 قاڭتار مەن 1 اقپان ارالىعىندا ساعات 10:00-دەن 19:00-گە دەيىن الاش تاسجولى, 35ب مەكەنجايىندا ورنالاسقان Keryen Joly ساۋدا ورتالىعىندا ءوتىپ جاتىر.
كەلۋشىلەرگە ءونىمنىڭ كەڭ اسسورتيمەنتى ۇسىنىلعان: كوكونىستەر مەن جەمىس-جيدەكتەر, ەت جانە ەت ونىمدەرى, ءسۇت جانە ۇن ونىمدەرى, جاڭا پىسكەن نان-توقاشتار, تابيعي شىرىندار, توساپتار, دجەمدەر جانە باسقا دا تاۋارلار.
قاتىسۋشىلاردىڭ ايتۋىنشا, مۇنداي جارمەڭكەلەر قىس مەزگىلىندە اۋىل شارۋاشىلىعى وندىرۋشىلەرى ءۇشىن دە, قالا تۇرعىندارى ءۇشىن دە اسا ماڭىزدى.
«جاڭا جىلعا دەيىنگى التى اپتا ىشىندە مەن شامامەن 400 باس جاباعى ساتتىم. جارمەڭكەنىڭ ءبىز ءۇشىن باستى پايداسى – قىس مەزگىلىندە جەم-ءشوپ پەن شوپكە كەتەتىن شىعىندى ەداۋىر ازايتۋعا مۇمكىندىك بەرەدى. ال قالا تۇرعىندارى ەكولوگيالىق تازا وتاندىق ءونىمدى دەلدالسىز, تىكەلەي ساتىپ الادى. بۇل تۇرعىندار ءۇشىن دە, كاسىپكەرلەر مەن فەرمەرلەر ءۇشىن دە ءتيىمدى», دەدى جارقىن ەسىمدى فەرمەر.
استانادا الداعى دەمالىس كۇندەرى اۋىل شارۋاشىلىعى جارمەڭكەسى وتەدى
ۇيىمداستىرۋشىلار جارمەڭكەنىڭ وندىرۋشىلەر مەن تۇتىنۋشىلار اراسىندا تىكەلەي بايلانىس ورناتۋعا ارنالعان قولايلى الاڭ ەكەنىن اتاپ ءوتتى.
ء«بىزدىڭ جارمەڭكەلەردە اۋىل شارۋاشىلىعى تاۋارىن وندىرۋشىلەر ءۇشىن بارلىق جاعداي جاسالعان. ولار ەت, كارتوپ جانە باسقا دا ونىمدەردى دەلدالسىز, تىكەلەي ساتادى. بۇل باعانىڭ قالا تۇرعىندارى ءۇشىن ايتارلىقتاي قولجەتىمدى بولۋىنا مۇمكىندىك بەرەدى.
حالقىمىز ەتتى وتە جاقسى كورەدى, سوندىقتان تۇرعىندار جارمەڭكەگە تاڭەرتەڭنەن باستاپ كەلەدى. ەڭ الدىمەن ەت, كوكونىس, جەمىس-جيدەك, ۇن مەن كۇرىش ساتىپ الادى. سونىمەن قاتار تابيعي ءسۇت ونىمدەرىنە – قولدىڭ سۇتىنە, ايران مەن شۇباتقا, قىمىز بەن قۇرتقا سۇرانىس جوعارى. جۇرت جارمەڭكەگە اۋىلدىڭ تازا ەتىن, قازىسى مەن قۇرتىن قولجەتىمدى باعادا الۋ ءۇشىن كەلەدى», دەدى Keryen Joly سوو ديرەكتورى جانە جارمەڭكە ۇيىمداستىرۋشىسى ايتۋعان كۇزەرباەۆ.
