جيىن بارىسىندا ەكولوگيالىق تۇيتكىلدەردى شەشەتىن يننوۆاتسيالىق جوبالار, ونىڭ ىشىندە جاساندى ينتەللەكت تەحنولوگيالارىن قولدانۋعا نەگىزدەلگەن جۇمىس تانىستىرىلدى. سونىمەن قاتار جاڭارتىلاتىن ەنەرگەتيكا مەن ينجەنەرلىك ەكولوگيا سالاسىنداعى حالىقارالىق ىنتىماقتاستىقتى دامىتۋ جانە بىرلەسكەن زەرتتەۋ جوبالارىن جۇزەگە اسىرۋ جايى تالقىلاندى.
حيميا كافەدراسىنىڭ مەڭگەرۋشىسى ەلدار كوپيشەۆتىڭ ايتۋىنشا, قوعامدى تابيعي قورلاردى سارقىماي ەنەرگيامەن قامتاماسىز ەتۋ, قالدىقتاردى قۇندى رەسۋرسقا اينالدىرىپ, تۇتىنۋدىڭ سىزىقتىق مودەلىنەن اينالىم ەكونوميكاسىنا كوشۋ بۇگىنگى كۇننىڭ ماڭىزدى مىندەتىنە اينالىپ وتىر.
«قازىر عالىمدار تۇراقتى ەنەرگەتيكالىق جۇيەلەردە جاساندى ينتەللەكتىنى قولدانۋ, ەكولوگيالىق باسقارۋ مەن ەكوجۇيەلەردى ساقتاۋ, رەسۋرستاردى قالپىنا كەلتىرۋ, تابيعي قورلاردى ورنىقتى باسقارۋ ماسەلەسىن زەردەلەپ جاتىر. راسىندا, عىلىم ادامعا عانا ەمەس, عالامشارعا دا قىزمەت ەتۋگە ءتيىس», دەدى ە.كوپيشەۆ.
بىرىككەن اراب امىرلىكتەرىندەگى جوعارى تەحنولوگيالار كوللەدجىنىڭ عالىمى اسيم وماري جاڭارتىلاتىن ەنەرگيا كوزدەرىن ءتيىمدى باسقارۋ ءۇشىن جەل جىلدامدىعىن بولجاۋعا ارنالعان زەرتتەۋ ناتيجەلەرىمەن ءبولىستى.
«زەرتتەۋ اۋىل شارۋاشىلىعىندا نەعۇرلىم ساپالى شەشىم قابىلداۋعا, قولدانىستاعى جۇيەلەردى وڭتايلاندىرۋعا مۇمكىندىك بەرەدى. مىسالى, جەل تۋربينالارىنىڭ جۇمىسىن جەتىلدىرۋگە, ەنەرگەتيكالىق جۇيەلەردىڭ تيىمدىلىگىن ارتتىرۋعا, اگرارلىق جوسپارلاۋدى جاقسارتۋعا ىقپال ەتەدى. مۇنىڭ ءبارى ەل ەكونوميكاسىنا, باسقا دا كوپتەگەن سالالعا وڭ اسەرىن تيگىزەدى», دەدى شەتەلدىك زەرتتەۋشى.
جيىندا سونداي-اق, جاڭارتىلاتىن ەنەرگيا كوزدەرىن باقىلاۋعا ارنالعان ماشينالىق وقىتۋ تەحنولوگياسى, مۇناي وڭدەۋ سالاسىنداعى تسيفرلىق پلاتفورمالاردى پايدالانۋ, پلاستيك قالدىقتارىن قايتا وڭدەۋ, «جاسىل» سۋتەگى ءوندىرۋ, سونداي-اق قايتالاما شيكىزاتتان سيرەك كەزدەسەتىن جانە پلاتينا توبىنا جاتاتىن مەتالداردى الۋ باعىتىنداعى يننوۆاتسيالىق جوبالار تانىستىرىلدى.
كونفەرەنتسيا جۇمىسى ءۇش سەكتسيا بويىنشا ۇيىمداستىرىلدى. بىرىندە تۇراقتى ەنەرگەتيكالىق جۇيەلەر مەن جاساندى ينتەللەكت شەشىمدەرى تالقىلاندى.
زارينا تايلاق,
ل.ن.گۋميلەۆ اتىنداعى ەۇۋ ستۋدەنتى
