جالپى trade-in تەك اۆتوكولىكپەن شەكتەلمەيدى. بۇل ءتاسىل ارقىلى تۇرعىندار ەسكى سمارتفونىن, تۇرمىستىق تەحنيكاسىن, ءتىپتى پاتەرىن وتكىزىپ, جاڭا م ۇلىككە قول جەتكىزە الادى. الايدا مۇنداي قولايلىلىقتىڭ دا ءوز قۇنى بار. ماسەلەن, ەسكى م ۇلىك نارىق باعاسىنان تومەن باعالانۋى مۇمكىن. ەندەشە trade-in جۇيەسى كىمگە ءتيىمدى – ۋاقىتىن باعالايتىن تۇتىنۋشىعا ما, الدە قوسىمشا تابىس تاباتىن كومپانياعا ما؟
يپوتەكا ساراپشىسى قامبار فارحات ۇلىنىڭ ايتۋىنا قاراعاندا, جىلجىمايتىن م ۇلىك نارىعىنداعى trade-in ازىرگە جاپپاي قولدانىسقا ەنگەن جوق, الايدا وعان قىزىعۋشىلىق جىل سايىن ءوسىپ كەلەدى.
«بۇل ءتاسىل قۇرىلىس كومپانيالارى اراسىندا باسەكە جوعارى, نەعۇرلىم مامىلە كوپ جاسالاتىن استانا مەن الماتى قالالارىندا بەلسەندى قولدانىلادى. قازىردىڭ وزىندە ءىرى كومپانيالاردىڭ ءوزى كليەنتتەرگە اۋرەگە تۇسپەي-اق ەسكى پاتەرىن جاڭاعا اۋىستىرۋ مۇمكىندىگىن ۇسىنىپ جاتىر. مەنىڭشە, نارىق بىرتىندەپ تۇرعىن ءۇي ساتىپ الۋ ۇدەرىسىن جەڭىلدەتۋ جاعىنا كوشىپ جاتىر. Trade-in – وسىنداي شەشىمنىڭ ءبىرى», دەيدى ساراپشى.
اۆتوساراپشى ارتۋر ميسكاريان دا اۆتوكولىك نارىعىنداعى trade-in مامىلەلەر سانى بىرتە-بىرتە ءوسىپ كەلە جاتقانىن ايتادى. دەگەنمەن, ءالى دە بولسا بۇل سەگمەنتتىڭ دامۋ الەۋەتى كەڭىرەك. ونىڭ سوزىنشە, trade-in ۇلەسى اۆتوكولىكتىڭ برەندى مەن تۇتىنۋشىنىڭ قانداي دا ءبىر ماركاعا دەگەن ادالدىعىنا بايلانىستى.
«بۇل ءتاسىلدىڭ ءتيىمدى تۇسى – جۇرىلگەن كولىكتى جاڭاعا اۋىستىرۋ جىلدامدىعى, ەسكى كولىكتى ساتۋ كەزىندەگى مامىلەنىڭ قاۋىپسىزدىگى, سونداي-اق بارىنەن بۇرىن جاڭا اۆتوكولىك الۋدىڭ بىرەگەي شارتتارى», دەيدى ول.
ال ساۋدا جانە ينۆەستيتسيا ساراپشىسى, «TradeReport» Telegram-ارناسىنىڭ اۆتورى ەرنار سەرىكتىڭ سوزىنشە, ەلىمىزدە اتالعان نارىق بەلسەندى قالىپتاسۋ ساتىسىندا تۇر. ەگەر دامىعان ەلدەردە trade-in جۇيەسى اۆتوكولىك, ەلەكترونيكا, تۇرعىن ءۇي نارىعىنىڭ اجىراماس بولىگىنە اينالعان بولسا, ەلىمىزدە ول ءالى دە اكتيۆتەردى ءتيىمدى ايىرباستاۋدىڭ دەربەس قۇرالى رەتىندە ەمەس, قوسىمشا سەرۆيس رەتىندە قاراستىرىلادى.
كوللاجدى جاساعان – قونىسباي شەجىمباي, «EQ»
«بىزدە كەلەشەگى زور ءارى قازىردىڭ وزىندە ەڭ دامىعان سەگمەنت – اۆتوكولىك نارىعى. بۇل جەردە trade-in ىڭعايلى نارىق تەتىگى رەتىندە شىنىمەن جۇمىس ىستەيدى. ءوزىم بىلتىر قىركۇيەك ايىندا كولىگىمدى trade-in ارقىلى وتكىزىپ, بىرنەشە ساعات ىشىندە مامىلەنىڭ ايتارلىقتاي بولىگىن راسىمدەدىم. ال ءبىر كۇننىڭ ىشىندە جاڭا اۆتوكولىكتى الىپ شىقتىم. ياعني بۇل – اكتيۆتى ءوز بەتىنشە ۇزاق ۋاقىت ساتپاي-اق, ونى جەدەل جاڭارتۋدىڭ ىڭعايلى جولى», دەيدى ساراپشى.
ونىڭ ايتۋىنشا, سمارتفون, تۇرمىستىق تەحنيكا, ءۇي تاۋارلارى سەگمەنتىندە جاعداي ءسال وزگەشە. مۇندا trade-in كوبىنە كلاسسيكالىق ايىرباس قۇرالى ەمەس, ەسكى تاۋاردى وتكىزىپ, جاڭاسىنا جەڭىلدىك الۋ باعدارلاماسى رەتىندە جۇمىس ىستەيدى. ماسەلەن, كەيبىر كومپانيالار ەسكى تەحنيكانى قابىلداپ, جاڭا ونىمگە 50–70 پايىزعا دەيىن جەڭىلدىك ۇسىنادى. سوندىقتان بۇل جۇيە ەسكى اكتيۆتىڭ نارىقتىق قۇنىن باعالاۋدان گورى تۇتىنۋدى ىنتالاندىرۋ مەن قايتا وڭدەۋگە كوبىرەك باعىتتالعان.
«جالپى, ەلىمىزدە trade-in ۇعىمى ءارتۇرلى فورماتتى قامتيدى: ەسكى اكتيۆتى ساتىپ الۋ, ونىڭ قۇنىن جاڭاسىنا ەسەپكە الۋ نەمەسە جەڭىلدىك ۇسىنۋ. نارىق دامىپ كەلە جاتقانىمەن, بۇل جۇيە ازىرگە تولىق قالىپتاسقان جوق», دەيدى ەرنار سەرىك.
ساراپشىنىڭ ايتۋىنشا, trade-in كوبىنە مۇلكىن جوعارى باعادا ساتۋدان گورى, ۋاقىتىن ۇنەمدەۋدى قالايتىن ادامدارعا ءتيىمدى.
«ويتكەنى ءوز بەتىڭمەن ساتقاندا جارناما بەرۋ, ساتىپ الۋشىلارمەن كەزدەسۋ, ساۋدالاسۋ, قۇجات راسىمدەۋگە ءبىراز ۋاقىت پەن كۇش جۇمساۋعا تۋرا كەلەدى. ال trade-in ارقىلى م ۇلىكتى ءسال ارزانىراق وتكىزگەنىمەن, ەسەسىنە ۋاقىتتى ۇنەمدەپ, مامىلەنى جىلدام ءارى قاۋىپسىز اياقتاۋعا بولادى», دەيدى ە.سەرىك.
اسىرەسە بالالى وتباسىلارعا بۇل وتە قولايلى. سەبەبى ءبارىنىڭ بىردەي اپتالاپ ساتىپ الۋشى ىزدەپ جۇرۋگە مۇمكىندىگى بولا بەرمەيدى. مۇنداي جاعدايدا باعاداعى ازداعان ايىرماشىلىق مامىلەنىڭ تەز, تۇسىنىكتى ءارى ارتىق اۋرە-سارساڭسىز جۇزەگە اسۋىمەن وتەلەدى.
اقشادان دا قىمبات رەسۋرستاردى ساقتاۋعا كومەكتەسەتىن ءتاسىلدىڭ سۇراق تۋدىراتىن تۇسى دا جوق ەمەس. سونىڭ ءبىرى – ساتۋشى كومپانيانىڭ ەسكى م ۇلىكتى قانداي باعامەن قابىلدايتىنى. يپوتەكا ساراپشىسى قامبار فارحات ۇلىنىڭ ايتۋىنشا, بۇل جەردە trade-in ارقىلى تۇرعىن ءۇيدى قابىلدايتىن كومپانيانىڭ بەلگىلى ءبىر تاۋەكەلدەردى ءوز موينىنا الاتىنىن ءتۇسىنۋ ماڭىزدى. سوندىقتان م ۇلىك ادەتتە نارىقتاعى قۇنىنان تومەن باعالانادى. ال قانشالىق از بولاتىنى ءۇيدىڭ وتىمدىلىگىنە, جاعدايى مەن ورنالاسقان جەرىنە بايلانىستى.
«ەگەر پاتەر يەسى اسىعىس بولماسا ءارى بارىنشا جوعارى باعاعا ساتقىسى كەلسە, ءوز بەتىنشە ساتۋ – بارىنەن ۇتىمدى. ال نەگىزگى ماقسات تۇرعىن ءۇي ماسەلەسىن شەشىپ, جاڭا ءۇي ساتىپ الۋ بولسا, وندا trade-in شىنىمەن وڭ شەشىم بولادى. تاڭداۋ ادامنىڭ ءوز قولىندا. الدىمەن بىرنەشە نۇسقانى سالىستىرىپ, بارىنشا پايدالى نەمەسە ۋاقىتتى ۇنەمدەۋدىڭ قايسىسى ءوزى ءۇشىن ماڭىزدى ەكەنىن ءتۇسىنۋى كەرەك», دەيدى ق.فارحات ۇلى.
ال اۆتوساراپشى ارتۋر ميسكارياننىڭ پىكىرىنشە, جاڭا اۆتوكولىكتەر نارىعىندا باستاپقى باعا سەگمەنتىندەگى ۇسىنىستار كوبەيگەن سايىن, جۇرىلگەن كولىكتى ءوز بەتىنشە ساتۋ قيىنداي تۇسەدى ءارى ۇزاققا سوزىلۋى مۇمكىن.
«كليەنت مامىلەنىڭ جىلدام ءارى ىڭعايلى جۇزەگە اسۋىنان بولەك, ساتۋ ۇدەرىسىنىڭ قاۋىپسىزدىگىنە دە يە بولادى. ال كولىكتى ەركىن نارىقتا ساتقانداعى ىقتيمال باعا ايىرماسى جاڭا اۆتوكولىككە ۇسىنىلاتىن جەڭىلدىكتەر مەن ءتيىمدى شارتتار ەسەبىنەن وتەلەدى», دەيدى ساراپشى.
ونىڭ ايتۋىنشا, اۆتوسالوندار ادەتتە ەسكى كولىكتى يەسىنەن العان سوڭ, كاسىبي ماماندار ارقىلى قايتا ساتادى. بۇعان قوسا, اۆتوسالونداردىڭ تۇراقتى كليەنتتىك بازاسى بار ءارى كولىكتى كەڭ اۋديتورياعا ۇسىنۋ مۇمكىندىگى دە مول.
«بيزنەس-مودەل تۇرعىسىنان العاندا, trade-in – نارىقتاعى ۇلەستى ارتتىرۋدىڭ ءتيىمدى قۇرالدارىنىڭ ءبىرى. سەبەبى كەيىنگى جىلدارى رەسمي ديلەرلەر ءۇشىن جۇرىلگەن اۆتوكولىكتەر سەگمەنتىندەگى پايدا مارجاسى بىرتىندەپ تومەندەپ كەلەدى», دەيدى ا.ميسكاريان.
ساراپشى ەرنار سەرىك تۇتىنۋشى ءۇشىن نەگىزگى تاۋەكەل باعالاۋ ۇدەرىسىنىڭ اشىق بولماۋى ەكەنىن ايتادى.
«ادام ءوزىنىڭ كولىگى, سمارتفونى نەمەسە تۇرمىستىق تەحنيكاسى نەگە ءدال سولاي باعالانعانىن تۇسىنبەۋى مۇمكىن. اۆتوكولىكتەردەن ايىرماشىلىعى, «Samsung» كومپانياسىنىڭ ەسكى تەلەفونداردى باعالاۋ جۇيەسى بارىنشا تەحنولوگيالىق شەشىمگە نەگىزدەلگەن. پايدالانۋشى قۇرىلعىنىڭ بىرنەشە فوتوسىن جۇكتەيدى. ال جاساندى ينتەللەكت كومەگىمەن جۇيە ونىڭ تەحنيكالىق جاعدايىن اۆتوماتتى تۇردە باعالاپ, الدىن الا قۇنىن ۇسىنادى. سوندىقتان trade-in قىزمەتىندە باعالاۋ ەرەجەلەرىنىڭ تۇسىنىكتى ءارى اشىق بولعانى ماڭىزدى. اتاپ ايتقاندا, دياگنوستيكا ناتيجەسى كورسەتىلىپ, باعانىڭ نە سەبەپتى تومەندەتىلگەنى ءتۇسىندىرىلۋى قاجەت. سونداي-اق نارىقتاعى باعامەن سالىستىرۋ مۇمكىندىگى بەرىلىپ, تۇتىنۋشىعا قوسىمشا شارتتاردىڭ كۇشتەپ تاڭىلماۋى ماڭىزدى», دەيدى ە.سەرىك.
ونىڭ پىكىرىنشە, trade-in ەكىنشى نارىقتى رەتكە كەلتىرۋگە كومەكتەسەدى. سونىڭ ارقاسىندا تەكسەرىلگەن, دياگنوستيكادان وتكەن تاۋارلار كوبەيەدى. بۇل, اسىرەسە, جاسىرىن اقاۋلار قاۋپى كوبىرەك اۆتوكولىك, ەلەكترونيكا ساۋداسىندا ماڭىزدى. سونىمەن قاتار بۇل جۇيە ەسكى زاتتى قوقىس ەمەس, بەلگىلى ءبىر قۇنى بار اكتيۆ رەتىندە قاراستىرۋعا ۇيرەتەدى.
«بىزگە trade-in-ءدى جاي عانا «ەسكىنى تاپسىرىپ, جەڭىلدىك ال» اكتسياسى رەتىندە ەمەس, اكتيۆتەردى قايتا پايدالانۋدىڭ تولىققاندى مادەنيەتى رەتىندە دامىتقان ءجون. تۇپتەپ كەلگەندە مۇنداي جۇيە بارىنە ءتيىمدى بولۋى كەرەك: تۇتىنۋشى قولايلىلىق پەن جەڭىلدىككە قول جەتكىزەدى, بيزنەسكە جاڭا كليەنتتەر مەن قايتا ساتىلىمعا يە بولادى, ال ەكونوميكادا تاۋارلار مەن رەسۋرستار بارىنشا ۇتىمدى پايدالانىلادى», دەيدى ساراپشى.
ساراپشىلاردىڭ پايىمداۋىنشا, trade-in جۇيەسىنىڭ ەلدەگى دامۋ الەۋەتى جوعارى. تۇتىنۋشىلار ۋاقىتتى ۇنەمدەۋ, مامىلەنىڭ قاۋىپسىزدىگى مەن قولايلىلىعىنا كوبىرەك ءمان بەرگەن سايىن, بۇل قۇرالعا سۇرانىس ارتا تۇسپەك. قازىردىڭ وزىندە اۆتونارىقتا تيىمدىلىگىن دالەلدەگەن ءتاسىل الداعى ۋاقىتتا تۇرعىن ءۇي سەكتورىندا دا كەڭىنەن قولدانىلىپ, ءىرى قالالارداعى نارىقتىڭ ماڭىزدى سەگمەنتتەرىنىڭ بىرىنە اينالۋى ىقتيمال.
