Silk Way Star گراند-فينالىنىڭ قىتايدىڭ ەڭ ءىرى مەدياحولدينگتەرىنىڭ بىرىندە كورسەتىلۋى قازاقستاننىڭ تەلەۆيزيا يندۋسترياسى ءۇشىن ماڭىزدى وقيعا بولدى. 1,1 ميللياردتان استام الەۋەتتى اۋديتورياسى بار پلاتفورماداعى كورسەتىلىم اۋقىمى جاعىنان سەنساتسيالىق سيپاتقا يە بولىپ, ەلدەر اراسىنداعى گۋمانيتارلىق جانە مادەني ىنتىماقتاستىقتى دامىتۋداعى ماڭىزدى قادام سانالادى.
قىتايلىق كورەرمەن قازاقستان, موڭعوليا, ازەربايجان, ارمەنيا, گرۋزيا, مالايزيا, قىتاي, قىرعىزستان, تاجىكستان, تۇرىكمەنستان, وزبەكستان جانە وڭتۇستىك كورەيادان كەلگەن ورىنداۋشىلاردى بىرىكتىرگەن اۋقىمدى حالىقارالىق جوبانىڭ اقتىق سىنىنداعى ەرەكشە شوۋعا كۋا بولدى.
Silk Way Star – ازياداعى وسىنداي فورماتتاعى العاشقى حالىقارالىق ۆوكالدىق بايقاۋ. جوبا ءارتۇرلى مۋزىكالىق داستۇرلەردى, تىلدەردى جانە ورىنداۋشىلىق مەكتەپتەردى توعىستىرعان بىرەگەي مادەني پلاتفورماعا اينالدى. بايقاۋ جوعارى دەڭگەيدەگى پروداكشندى, جاندى داۋىستى, اۋقىمدى قويىلىمداردى جانە زاماناۋي تەلەۆيزيالىق ءوندىرىستى كورسەتتى.
Silk Way Star: قازاقستان ەۋرازيانىڭ جاڭا مەديابرەندىن قالىپتاستىرىپ كەلەدى
قازاقستان رەسپۋبليكاسى پرەزيدەنتىنىڭ تەلەراديوكەشەنى باسشىسى راۋشان قاجىباەۆا 2025 جىلعى ماۋسىمدا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن قىتاي حالىق رەسپۋبليكاسىنىڭ توراعاسى سي ءتسزينپيننىڭ كەزدەسۋىندە 12 ەلدىڭ قاتىسۋىمەن حالىقارالىق مۋزىكالىق جوبانى ىسكە اسىرۋ تۋرالى كەلىسىمگە قول قويىلعانىن اتاپ ءوتتى. سونداي-اق مەدياحولدينگ ديرەكتورى مەملەكەتتىك كەڭەسشى ەرلان قارينگە جوبا يدەياسىنىڭ اۆتورى رەتىندە قولداۋ كورسەتىپ, سەنىم بىلدىرگەنى ءۇشىن العىسىن جەتكىزدى.
گراند-فينالدىڭ CCTV-15 ارناسىندا كورسەتىلۋى جوبانىڭ جوعارى حالىقارالىق مارتەبەسىن جانە ونىڭ قازاقستاننان تىس جەرلەردە دە سۇرانىسقا يە ەكەنىن دالەلدەيدى. بۇل جاي عانا تەلەارنالىق كورسەتىلىم ەمەس, قازاقستاندىق مەديا كونتەنتتىڭ الەۋەتىن جاھاندىق دەڭگەيدە تانىتاتىن ستراتەگيالىق مادەني كوپىر.
2025 جىلى بايقاۋدىڭ جەڭىمپازى موڭعوليادان كەلگەن ميشەل دجوزەف اتاندى. Silk Way Star جوباسىنىڭ كەلەسى ماۋسىمى قىتايدا وتەدى. وسىلايشا جوبا گەوگرافيالىق تۇرعىدا كەڭەيىپ, حالىقارالىق سەرىكتەستىكتىڭ نىعايۋىن سيمۆولدىق تۇردە جالعاستىرادى.
