ۇلتتىق چەمپيونات جىل سايىن نازارباەۆ زياتكەرلىك مەكتەپتەرى وتكىزەتىن روبوتوتەحنيكا بويىنشا WRO حالىقارالىق كەزەڭىنىڭ ىرىكتەۋ تۋرى سانالادى. جارىس «نەگىزگى», «شىعارماشىلىق», «روبوتتار فۋتبولى» جانە «Jasampaz» دەپ اتالاتىن ءتورت باعىت بويىنشا وتكىزىلدى.
روبوتتىق تەحنيكالار سايىسىنا قاتىسقان 240 وقۋشى ۇزدىك روبوتوتەحنيك اتاعى ءۇشىن ءوز شەبەرلىكتەرىن, بىلىكتىلىكتەرىن سىنعا سالدى.
قاتىسۋشىلاردىڭ جاسى – 17 جاسقا دەيىن, ەڭ جاسى – وسكەمەندىك ءامىر جاڭاباەۆ 8 جاستا. جىل سايىن اۋىلدىق جەرلەردەن قاتىساتىن جاس روبوتوتەحنيكتەر سانى كوبەيۋدە.
بيىل WRO-عا مايقايىڭ كەنتىنەن, «Robotech» الماتى وبلىسى, الاكول اۋدانى جىلاندى اۋىلىنان «RoboReBoot» كوماندالارى قوسىلىپتى.
ال بيىلعى روبوتوتەحنيكالار سايىسىنىڭ تاقىرىبى – «اقىلدى قالالار» – «Smart City». سوندىقتان سايىسقا قاتىسۋشى وقۋشىلاردىڭ بارلىق جوبالارى قالا ءومىرىندەگى «اقىلدى تەحنولوگيالارعا» ارنالدى.
قازىلار القاسى نازارىنا جاڭا قالا قۇرىلىسى ەرەكشەلىكتەرى, «اقىلدى» اۆتوتۇراقتار مەن ءدارىحانالاردىڭ جوبالارى, ەكولوگيا, كوشە قاۋىپسىزدىگى باسقا دا وزەكتى ماسەلەلەردى شەشۋگە باعىتتالعان جوبالار تانىستىرىلدى.
روبوتوتەحنيكا قۇراستىرۋشىلار جوبالارىن «اقىلدى قالالار» تاقىرىبىنا ارناپ, بولاشاقتىڭ قالالارى قانداي بولۋ كەرەكتىگىن جاساپ كورسەتتى. مىسالى, جارىستىڭ 6 جاستاعى قاتىسۋشىلارى جاڭاوزەن قالاسىنان كەلگەن ەركىن ورىنباسار, سۇلانبەك ابدراحمان «اقىلدى اۆتوتۇراق» جوباسىن تانىستىردى.
جوبانىڭ جەتەكشىسى مۇحاممەت باقىتجاننىڭ ايتۋىنشا, ەركىن مەن سۇلتانبەكتىڭ روبوتوتەحنيكاعا دەگەن قىزىعۋشىلىقتارى ەرەكشە. ەكەۋى دە «Robocode» ورتالىعىندا روبوتوتەحنيكاسىمەن شۇعىلدانادى.
ال كىشكەنتايلار جاساعان «اقىلدى اۆتوتۇراق» كولىك كەلگەندە وزدىگىنەن اشىلادى. جۇرگىزۋشىلەر ءۇشىن قىستا سۋ قاتىپ قالىپ, موتوردىڭ قىزباي قالۋى سياقتى قيىندىقتار تۋدىرمايدى. ءبىر تەمپەراتۋرانى ساقتاپ تۇرۋ ءۇشىن ارنايى جەلدەتكىش جاسالعان.
پاۆلودار زياتكەرلىك مەكتەپتىڭ وقۋشىلارى داريا بايعوجينا, رىسگۇل سەرىكباەۆا كوكتەيل, بۋرگەر, كەكستى ءوزى دايىنداپ بەرەتىن «اقىلدى ءدامحانا» قۇراستىرعان.
– اۆتوماتتى ءدامحانا جاسادىق, ىشىنە كەرەك ازىق-ت ۇلىكتى سالساڭىز ماشينا ءوزى-اق سىزگە دايىن تاماق جاساپ بەرەدى, – دەيدى قىزدار.
بايقاۋ بارىسىندا تالدىقورعاندىق وقۋشى ەلينا پاك بولسا, «ۇستاز روبوتىن» تانىستىردى.
– كالليگرافيا جانە ءتۇرلى سۋرەت سالاتىن روبوت ۇستاز قيمىل ارقىلى ماتەماتيكادان ساباق بەرەدى, – دەيدى ول. – روبوت شەڭبەر, بالاپان, ءۇي جانە ءتورتبۇرىش سياقتى گەومەتريالىق فيگۋرالاردى سالا الادى.
– دياس جاھانگەر ەكەۋمىز شىمكەنتتەگى زياتكەرلىك مەكتەبىندە وقيمىز. بۇل جارىسقا ءبىز «قالا كوشەلەرىندەگى قاۋىپسىزدىك شارالارىن رەتتەيتىن» جاڭاشىل جوبالار دايىنداپ اكەلدىك. قاۋىپتىڭ الدىن الۋ ءۇشىن كولىكتەردىڭ جىلدامدىعىن ولشەيتىن قاجەتتى قۇرال جاسادىق. قۇرىلعى قاتتى جىلدامدىقپەن كەلە جاتقان كولىكتى بىردەن انىقتايدى دا, جاياۋ جۇرگىنشى جولىن ءوزدىگىنەن جاۋىپ تاستاي الادى,– دەيدى دۇيسەنعالى مۇحامەتجان.
پاۆلودارداعى نازارباەۆ زياتكەرلىك مەكتەبىنىڭ ديرەكتورى رينات جۇماباەۆتىڭ ايتۋىنشا, بيىل چەمپيونات ءوتكىزۋدە ءبىرقاتار جاڭاشىلدىقتار ەنگىزىلگەن. چەمپيونات العاش رەت ءبىزدىڭ وبلىس ورتالىعىندا وتكىزىلىپ, تىكەلەي ونلاين-ترانسلياتسيا ارقىلى كورسەتىلدى.
چەمپيوناتقا حالىقارالىق جانە رەسپۋبليكالىق جارىستاردىڭ جەڭىمپازدارى – زياتكەرلىك مەكتەپتىڭ تالانتتى وقۋشىلارى Yakutsk International Science Fair-2018 گران-پري يەگەرى نۇرداۋلەت تاۋمەرگەنوۆ, الەمدىك 10 ۇزدىكتىڭ قاتارىنا ەنگەن سوفيا كوكورينا قاتىستى.
ءسويتىپ WRO چەمپيوناتى قورىتىندىسى بويىنشا ۇزدىك كوماندا ءابسوليۋتتى چەمپيوندىقتىڭ ارنايى كۋبوگىن – ورال قالاسىنداعى فيزيكا-ماتەماتيكا باعىتىنداعى زياتكەرلىك مەكتەبى يەلەندى.
بۇل مەكتەپ WRO-دان ەلىمىزدە, الەم بويىنشا جوعارى جەتىستىكتەر كورسەتىپ كەلەدى. روبوتوتەحنيكا كۋرستارى جۇيەلى جۇمىس جاساۋدا. چەمپيوناتتا WRO-نىڭ باسقا دا جۇلدىزدارى جوعارى ناتيجەلەر كورسەتتى.
بىلتىر تايلاندتا وتكەن دۇنيەجۇزىلىك روبوتوتەحنيكالىق وليمپيادادا الەمدىك توپتىڭ 10-دىعىنا ەنگەن كوكشەتاۋلىق سوفيا كوكورينا بۇل جولى دا جەڭىسكە جەتتى.
شىعارماشىلىق كاتەگوريادا تالدىقورعاندىق دانيل فيليمونوۆتىڭ «روبوت-سۋرەتشى» جوباسى كوپشىلىكتى تاڭعالدىردى. الماتى وبلىسى الاكول اۋدانى جىلاندى اۋىلىنىڭ «RoboReBoot» كومانداسى اۋىل مەكتەپتەرىن قولداۋعا ارنالعان ماراپاتقا يە بولدى.
ال «Creativity Award» اتالىمى بويىنشا جۇلدە پاۆلودار, «Girl power» سەمەي, «Engineering Simplicity Honors Award» جۇلدەلەرى تالدىقورعان قالاسىنىڭ زياتكەرلىك مەكتەپتەرىنە بەرىلدى.
ۇزدىك روبوتوتەحنيكا بىلگىرلەرى مەدالدار, ديپلومدار جانە باعالى سىيلىقتارمەن ماراپاتتالدى. ەندى جەڭىمپازدار بيىل 14-16 قاراشادا بۋداپەشت قالاسىندا وتەتىن WRO-2019 وليمپياداسىنىڭ الەمدىك كەزەڭىنە قاتىسادى.
پاۆلودار
