سپورت • 09 شىلدە، 2019

BAQ league: «ەگەمەن» كۋبوگى ساراپقا سالىنادى

نۇر-Cۇلتان قالاسىندا شاعىن فۋتبولدان جۋرناليستەر اراسىنداعى BAQ league بىرىنشىلىگىنىڭ التىنشى ماۋسىمى باستالدى. «Egemen Qazaqstan» گازەتىنىڭ 100 جىلدىق مەرەيتويىنا ارنالعان جۋرناليستەر ليگاسىنا قاتىسۋعا بيىل 17 كوماندا ءوتىنىش ءبىلدىردى.

ءالي بيتورە

جارىستىڭ رەسمي اشىلۋ سالتاناتىنا «Egemen Qazaqstan» رەسپۋبليكالىق گازەتى» اق باسقارما توراعاسى دارحان قىدىرالى قاتىسىپ، ۇيىمداستىرۋ القاسى مەن تۋرنيرگە قاتىساتىن جۋرناليستەرگە ساتتىلىك تىلەپ، ەڭ مىقتى ۇجىمنىڭ جەڭىسكە جەتۋىنە تىلەكتەستىگىن ءبىلدىردى.

BAQ league – قازاقستان جۋرناليستيكاسىنىڭ تاريحىنداعى تۇڭعىش جانە جالعىز تولىققاندى فۋتبول بىرىنشىلىگى. بۇل جوبا جۋرناليستەر اراسىنداعى ىنتىماقتاستىق پەن دوستىقتى ارتتىرىپ، جاڭا تانىستار تابۋعا جول اشىپ، رەداكتسيا ىشىندەگى تاتۋلىقتى كۇشەيتەدى. BAQ league برەندىمەن باق وكىلدەرى اراسىنداعى شاعىن فۋتبول بىرىنشىلىكتەرى نۇر-سۇلتان قالاسىنان بولەك، الماتى جانە اقتاۋ سىندى قالالاردا دا ۇيىمداستىرىلادى. ال ەلوردامىزدا وتەتىن BAQ league بىرىنشىلىگىنە اپتا سايىن الماتى، قاراعاندى، قوستاناي، پاۆلودار، شىمكەنت قالالارىنىڭ دا جۋرناليستەرى كەلىپ قاتىسادى. بۇل – ليگانىڭ قارقىندى دامىپ جاتقانىنىڭ جانە جۋرناليستەر قاۋىمى اراسىندا ماڭىزى ارتقاندىعىنىڭ بەلگىسى. بۇگىندە BAQ league ءار ماۋسىم سايىن 30-دان اسا باق رەداكتسياسى مەن 300-دەن استام ءجۋرناليستىڭ باسىن بىرىكتىرەتىن ەلەۋلى جوباعا اينالدى.

2018 جىلدان باستاپ جۋرناليستەر بىرىنشىلىگى ەكى ليگاعا بولىنگەن. «ا» ليگاسىنىڭ كوماندالارى جۇلدەلى ورىنداردى ءوزارا ساراپقا سالسا، «ۆ» ليگاسىنىڭ كوماندالارى جوعارى توپتىڭ جولدامالارىنا تالاسادى. التىنشى ماۋسىم 2019 جىلدىڭ 7 شىلدەسىندە باستالىپ، 1 قىركۇيەگىنە دەيىن جالعاسادى. سونداي-اق ليگا ويىندارىمەن قاتار جۋرناليستەر «Egemen Qazaqstan» گازەتىنىڭ كۋبوگىن دا ساراپقا سالادى. ويىندار ەلورداداعى «تارلان ارەنا» سپورت كەشەنىندە وتەدى. ليگانىڭ اشىلۋ سالتاناتىندا 100-گە جۋىق جۋرناليست جاسىل الاڭدا ءجۇز سانىن فلەشموب ارقىلى بەينەلەپ، «ەگەمەننىڭ» 100 جىلدىعىنا تارتۋ جاسادى.