5 شىلدە كۇنى الاتاۋ باۋرايىنداعى «بالۋان شولاق» سپورت سارايىندا وتكەن بوكس كەشىنىڭ باستى جەكپە-جەگى قازاقستاندىق بىلعارى قولعاپ شەبەرى قانات يسلام (26-0, 20 كو) مەن دومينيكان رەسپۋبليكاسىنىڭ بوكسشىسى حۋليو دە حەسۋس (27-2, 24 كو) اراسىندا وتكەن بولاتىن.
اتالعان جەكپە-جەك باستالماس بۇرىن, «بالۋان شولاق» سپورت كەشەنىنىڭ ىشىنە لىق تولعان جانكۇيەر كəسىپقوي بوكستا باق سىناپ جۇرگەن ءبىر توپ قازاقستاندىق بىلعارى قولعاپ شەبەرلەرىنىڭ ونەرىن تاماشالادى. اتاپ ايتقاندا, ساپارباي ايداروۆ (3-0, 2 كو) كەشتىڭ شىمىلدىق اشار جەكپە-جەگىندە ۋكراينالىق قارسىلاسى ۆلاديسلاۆ تانتسيۋرانى (2-3, 1 كو), وزبەكستان بوكسشىسى بەكسۇلتان راۋشانوۆ (5-1, 3 كو) ازەربايجاندىق اسقار راگيموۆتى (3-3, 1 كو), بەرىكباي نۇرىمبەتوۆ (4-0, 0 كو) ارمەنيالىق كارەن اۆەتيسياندى (9-25-4, 4 كو) ۇپاي سانىمەن جەڭدى. سونداي-اق ارمان رىسبەك (6-0, 5 كو) ۋكراينالىق دەنيس چەچەتانى (9-14-2, 8 كو), دەبيۋت جەكپە-جەگىن وتكىزگەن اسقار ەرۋبەك (1-0, 1 كو) بەلارۋس بوكسشىسى اندرەي ستاليارچۋكتى (11-34-6, 2 كو) ءبىرىنشى راۋندتىڭ وزىندە ەستەن تاندىرىپ, نوكاۋتپەن جەڭىسكە جەتتى. تاعى ءبىر دەبيۋت جەكپە-جەگىن وتكىزگەن اۋىر سالماقتاعى وتانداسىمىز نۇرسۇلتان امانجولوۆ (1-0, 0 كو) ۋكراينالىق پاۆەل كرولەنكودان (1-3, 1 كو) ۇپاي سانىمەن باسىم ءتۇستى. قازاق سپورت جۋرناليستيكاسىنىڭ ارداگەرى ءدۇرالى دۇيسەباي بوكسشى امانجولوۆتىڭ جەكپە-جەگىن كورىپ, الەۋمەتتىك جەلىدە قازاقتىڭ عالامات بىلعارى قولعاپ شەبەرى ءابدىسالان نۇرماحانوۆتىڭ ءىزباسارى ەكەنىن جازدى. «وسى جىگىتكە قاراپ وتىرىپ, ءابدىسالان نۇرماحانوۆ ەسىمە ءتۇسىپ كەتتى. سىرتقى تۇرقى دا, كەسكىن-كەلبەتى دە سول. الدا-جالدا اعامىز تۋرالى كينو تۇسىرە قالساق, ەستە بولسىن دەگەنىم عوي. ياعني, اكتەردى سىرتتان ىزدەۋدىڭ قاجەتى جوق», دەيدى ءدۇرالى اعا.
اندەركاردتىڭ فايت-كاردىندا تيتۋلدى جەكپە-جەككە شىققان ابىلايحان قۇسايىنوۆ (10-0, 7 كو) ارمەنيالىق گارنيك ارۋتيۋنياندى (3-2, 2 كو) ءۇشىنشى راۋندا تەحنيكالىق نوكاۋتپەن جەڭىپ (انىعىندا ارۋتيۋنيان ايقاستى جالعاستىرۋدان باس تارتتى), كارەراسىنداعى تۇڭعىش بەلدىگىن يەلەندى. سونىمەن قاتار وسى جەكپە-جەك ءۇشىن ارنايى اقش-تان كەلگەن ءبىرىنشى ورتا سالماقتاعى جەرلەسىمىز ماديار Əشكەەۆ (13-0, 6 كو) ۋكراينالىق بوكسشى يگور فانيانمەن (16-21-3, 8 كو) جۇدىرىقتاسىپ, NBA بەلبەۋىن جەڭىپ الدى. تارتىسقا تولى بولعان جەكپە-جەكتە وتانداسىمىزدىڭ قاباعى جارىلىپ, قان توقتاماعان سوڭ ايقاستىڭ سۋپەرفايزەرى جارىس ەرەجەسىنە سايكەس كەزدەسۋدى جەتىنشى راۋندتا توقتاتىپ, جەڭىستى ۇپاي سانىمەن الدا تۇرعان اشكەەۆكە بەردى. ال اۋىر سالماقتاعى رۋسلان مىرساتاەۆ (6-0, 6 كو) بولسا, ايگىلى بوكسشى مايك تايسوندى جەڭگەن بريتانيالىق دەنني ءۋيليامستى (53-27, 40 كو) جەكپە-جەكتىڭ ءتورتىنشى راۋندىندا تەحنيكالىق نوكاۋتقا ءتۇسىردى.
ال بوكس كەشىنىڭ باستى جەكپە-جەگى جوعارىدا ايتقانىمىزداي, قانات يسلام مەن دومينيكاندىق بوكسشى حۋليو دە حەسۋس اراسىندا ءوربىدى. ول وعان دەيىن وتكىزگەن 28 جەكپە-جەگىنىڭ تەك بىرەۋىندە عانا جەڭىلگەن, الەمدىك رەيتينگتە 320-ورىندا تۇرعان بوكسشى. بارلىق كەزدەسۋلەرىن ءوز ەلىندە وتكىزىپ, ءبىرىنشى رەت شەتەلدە جۇدىرىقتاسقان بوكسشىنى ماماندار كەزدەسۋگە دەيىن قانات يسلامعا لايىقتى قارسىلاس ەمەس دەپ باعاسىن بەرىپ تاستاعان ەدى. ون راۋندتىق فورماتتا وتكەن جەكپە-جەكتە جۇلدە رەتىندە ورتا سالماقتاعى WBO Inter-Continental تۇجىرىمىنىڭ بەلدىگى تىگىلدى. بۇل ايقاستا قانات قارسىلاسىن بار-جوعى 14 سەكۋندتا ءبىر سوققىمەن سۇلاتىپ سالدى.
قازىر الەۋمەتتىك جەلى قولدانۋشىلارى قاناتتىڭ بۇل جەڭىسىن كاسىپقوي بوكستاعى ەڭ جىلدام جەڭىس پا, جوق پا دەپ تالقىلاپ جاتىر. ءبىر بىلەرىمىز, قانات ءوزىنىڭ كارەراسىنداعى ەڭ جىلدام جەڭىس رەكوردىن جاڭارتتى. وتانداسىمىز 2012 جىلى ەكۆادورلىق قارسىلاسى ۋمبەرتو تولەدونى ءبىرىنشى راۋندتىڭ 33 سەكۋندىندا سۇلاتىپ سالعان-دى.
دەگەنمەن قانات يسلامنىڭ بۇل جەڭىسىنە, قارسىلاسىنا كوڭىلى تولماعان جانكۇيەرلەر دە تابىلىپ جاتتى. سونىڭ ءبىرى – سپورت جۋرناليست نەسىپ ءجۇنىسباي اعامىز. نەسىپ ءجۇنىسباي قاناتتىڭ «قاپشىق» قارسىلاستارمەن ەمەس, ءوزىنىڭ دەڭگەيىندەگى قارسىلاستارمەن جۇدىرىقتاساتىن ۋاقىتى كەلگەنىن ايتادى. «مەن قاناتتى بەيجىڭ وليمپياداسىنان بەرى تانيمىن. ونىڭ بوكستاعى جولىن ۇنەمى قاداعالاپ وتىرامىن. سول بەيجىڭ وليمپياداسىندا كورگەن قانات مەن كۇتكەن شىڭىنا ءالى شىققان جوق. ويتكەنى ونى ءوز سالماعىنداعى مىقتىلارعا سالماي كەلەدى. سوناۋ جەر تۇبىنەن الماتىعا كەلىپ تۇرىپ, ءبىرىنشى راۋندتىڭ 14-سەكۋندىندا مۇرتتاي ۇشاتىن بوكسشى كىمگە ابىروي؟ سول ءۇشىن دە قاناتتى اسپانعا كوتەرۋ كەرەك پە؟ بۇل – وزەگىمىزدى جارىپ شىققان ءوز بالامىزعا جاساعان كوز بايلاۋ, وتىرىك ماقتاۋ جانە ونى شىندىقتان اداستىرۋ. ارينە, بۇعان قانات كىنالى ەمەس. وعان قارسىلاس تاۋىپ, بەتتەستىرىپ وتىراتىن كومانداسى كىنالى. رەنىش – سولارعا. ال بۇگىندە وتىزدىڭ ورتاسىنا كەلگەن قانات اينالايىن مىقتىلارمەن قاشان شايقاسادى؟ شايقاسىپ ۇلگەرە مە؟ الدە ونىڭ كومانداسى سەكىلدى بىزگە دە جەڭىلمەگەن دەگەن جەلپىلدەك اتاق جەتە مە؟ سوندا كىمنەن جەڭىلمەگەن؟ كەشەگى ءوزىن كورمەك تۇگىلى اتىن دا ەستىمەگەن دومينيكان رەسپۋبليكاسىنان كەلگەن بوكسشى سەكىلدى بوسكەۋدەلەردەن بە؟ مەنىڭ ويىمشا, ودان دا الۆارەس سەكىلدىلەرمەن شايقاسىپ, جەڭىلىپ قالعان الدەقايدا ابىرويلى بولار ەدى. ارينە, قاناتقا الۆارەستى ەرتەڭ ەشكىم بەرمەيدى. سوندىقتان دا قارسىلاستىڭ ەڭ اۋىرىن, ەڭ شەبەرىن تاڭداپ, كەسكىلەسۋ كەرەك بۇل ونەردە. سوندا عانا كۇشتىدەن كۇشتىگە ورلەيسىڭ», دەيدى ن.ءجۇنىسباي.
سونىمەن 34 جاستاعى قانات يسلام ءوزىنىڭ 26-شى جەكپە-جەگىندە جەڭىسكە جەتىپ, ورتا سالماقتاعى WBO Inter-Continental بەلدىگىن يەمدەندى. نەسىپ اعامىز ايتىپ كەتكەندەي, قازاق جانكۇيەرلەرى ەندى قانات يسلامنىڭ وزىنە لايىقتى قارسىلاس بولاتىن, əلەمدىك كəسىپقوي بوكستا اتى شىققان ءəلدى بوكسشىلارمەن جۇدىرىق تۇيىستىرگەنىن قالايدى.
الماتىداعى بوكسشىلاردىڭ جەڭىس شەرۋىن 6 شىلدە كۇنى ەلوردادا وتكەن بوكس كەشىندە جۇدىرىقتاسقان وتانداستارىمىز دا جالعاستىردى. سونداي-اق نۇر-سۇلتاندا وتكەن كاسىبي بوكس كەشىنىڭ الماتىداعى ايقاسقا قاراعاندا جۇگى اۋىر ەدى. ويتكەنى جەكپە-جەكتى شەتەلدىك پروموۋتەرلەر ۇيىمداستىرىپ قانا قويماي, بوكسشىلاردىڭ ايقاسىن اقش-تىڭ ESPN+ تەلەارناسى بىرنەشە ەلگە تىكەلەي ەفيردە تاراتتى. سونىمەن قاتار قازاق باتىرلارىنىڭ جەكپە-جەگىن تاماشالاپ, ءوز كوزىمەن كورۋ ءۇشىن اقش-تان ايگىلى پروموۋتەر بوب ارۋمنىڭ ءوزى ارنايى كەلدى. ارۋمنىڭ كوزىنە ءتۇسىپ, مۇحيت اسقىسى كەلەتىن وتانداستارىمىز بۇل كەزدەسۋدە بارىن سالدى. «بارىس ارەناعا» كەلگەن جانكۇيەرلەرگە تاماشا بوكس ۇلگىسىن كورسەتۋ ءۇشىن دە بىلعارى قولعاپ شەبەرلەرىمىز ايانىپ قالمادى.
بوكس كەشىن اشىپ بەرگەن اباي تولەش (3-0, 2 كو) اۋعانستاندىق اللاح دەد راحيميمەن (2-1, 0 كو) جۇدىرىقتاسىپ, كارەراسىندا ءبىرىنشى رەت قارسىلاسىنان تورەشىلەر شەشىمى بويىنشا باسىم ءتۇستى. ابىلقايىر شەعاليەۆ (6-0, 4 كو) ازەربايجاندىق ەلۆين احۋندزادانى (4-2, 2 كو) ءبىرىنشى راۋندتا ەكى رەت, ەكىنشى راۋندتا ءبىر رەت نوكداۋنعا جىبەرگەنىمەن, احۋندزادا وتانداسىمىزعا لايىقتى قارسىلىق كورسەتىپ, 8 راۋند بويى جۇدىرىقتاستى. شەعاليەۆ ۇپاي سانىمەن جەڭىسكە جەتتى. سۇلتان زاۋىربەك (8-0, 6 كو) گرۋزيالىق گەورگي گاچەچيلادزەنى (11-34-1, 5 كو) جەتىنشى راۋندتا تەحنيكالىق نوكاۋتپەن ۇتتى. وتانداسىمىز ءبىرىنشى راۋندتا قارسىلاسىن ءبىر رەت نوكاۋتقا جىبەرگەن بولاتىن. ءالي بالوەۆ (9-0, 7 كو) برازيليالىق حاميلتون ۆەنتۋرانى (15-7-1, 13 كو) ۇپاي سانىمەن جەڭسە, نۇرتاس اجبەنوۆ (6-0, 2 كو) گرۋزيالىق اچيكو وديكادزەنى (18-11-1, 7 كو) كەزدەسۋدىڭ ءبىرىنشى راۋندىندا سۇلاتىپ سالدى.
تيتۋلدى جەكپە-جەككە شىققان ۆيكتور كوتوچيگوۆ (10-0, 4 كو) مەكسيكالىق حايرو لوپەسپەن كەزدەسۋدە (24-11, 16 كو) تورەشىلەردىڭ ءبىراۋىز شەشىمىمەن جەڭىسكە جەتىپ, WBC International بەلدىگىن يەلەندى. سونداي-اق جانقوش تۇراروۆ (سۋرەتتە) (27-0, 17 كو) ارگەنتينالىق ماۋرو ماكسيميليانو گودويمەن WBO Inter-Continental بەلبەۋى ءۇشىن جۇدىرىقتاسىپ, 10 راۋندقا جوسپارلانعان جەكپە-جەكتە وتانداسىمىز ءۇشىنشى راۋندتا تەحنيكالىق نوكاۋتپەن جەڭىسكە جەتتى.
بوكس كەشىن تاماشالاۋعا الىس-جاقىن شەتەلدەن بىرنەشە مارتەبەلى مەيمان كەلگەنىن دە ايتا كەتەيىك. ولارىڭ قاتارىندا ورتا سالماقتاعى الەمنىڭ ەكس-چەمپيونى بريتانيالىق بيللي دجو سوندەرس بار. جەكپە-جەك سوڭىندا دجو سوندەرس شارشى الاڭعا كوتەرىلىپ, گەننادي گولوۆكينمەن نۇر-سۇلتان قالاسىندا كەزدەسۋ وتكىزۋگە دايىن ەكەنىن ايتتى. «قوناقجاي كوڭىلى ءۇشىن قازاق حالقىنا كوپ راحمەت ايتامىن! قازاقستانداعى بوكس جانكۇيەرلەرى مەنى قاتتى تاڭعالدىردى. مەن ءدال وسى «بارىس ارەنادا» گەننادي گولوۆكينمەن جۇدىرىقتاسقىم كەلەدى. ول – ۇلى چەمپيون, مەنىڭ ونىمەن ءوز وتانىندا كەزدەسۋگە مۇمكىندىگىم بار. مەنىڭ پروموۋتەرىم فرەنك ۋوررەن الداعى ۋاقىتتا ماعان قانداي جەكپە-جەك ۇسىناتىنىن بىلمەيمىن, بىراق مەن وسى جەردە, «بارىس ارەنادا» جەكپە-جەك وتكىزگەندى قالايمىن. گولوۆكين, مەن سەنىڭ ءوز وتانىڭدا جەكپە-جەك وتكىزۋگە ۇسىنىس تاستايمىن», دەپ مۇزايدىنعا جينالعان جانكۇيەرلەردى ءبىر جەلپىندىرىپ تاستادى.
جالپى, ەلىمىزدىڭ ەكى باس قالاسىندا ەكى كۇنگە سوزىلعان كاسىپقوي بوكس كەشى جانكۇيەرگە جانە ەلوردا كۇنىنە تاماشا تارتۋ بولدى. جەكپە-جەككە شىققان بارلىق وتانداسىمىز جەڭىسكە جەتىپ, قازاق ەلىن جاۋىنگەر حالىق رەتىندا الەمگە كورسەتتى.
