– ارىس قالاسىنىڭ ىرگەلەس اۋماعىندا جانە تىكەلەي ارسەنال اۋماعىندا جەرگىلىكتى تۇرعىنداردىڭ قوڭىراۋ شالۋى ءۇشىن 42 موبيلدىك توپ قۇرىلدى, – دەدى قورعانىس ءمينيسترىنىڭ ورىنباسارى.
ونىڭ ايتۋىنا قاراعاندا, قازىرگى ۋاقىتتا وق-ءدارى قالدىقتارىن جويۋ جۇمىستارى باستالعان.
– قارۋلى كۇشتەردىڭ ينجەنەرلىك اسكەرلەر بولىمشەلەرى تاڭعى 9.00-دەن 18.00-گە دەيىن جۇمىس ىستەيدى. ءتيىستى قۇجاتتارعا سايكەس تاسىمالداۋعا كەلمەيتىن وق-دارىلەردىڭ قالدىقتارى ارسەنال اۋماعىندا جويىلادى, ال قالعانى ارىس قالاسىنان سولتۇستىككە قاراي 60 شاقىرىمداي قاشىقتىققا شىعارىلىپ, ارنايى جابدىقتالعان پوليگوندا جويىلادى, – دەدى ت.داندىباەۆ.
مينيسترلىك وكىلىنىڭ ايتۋىنشا, وق-دارىلەردىڭ قالدىقتارىن جويۋ بارىسىندا جارىلىستىڭ دۇڭكىلدەگەن داۋىسى شىعۋى مۇمكىن, بىراق ول دىبىسقا الاڭداۋ مەن ۇرەيلەنۋگە نەگىز جوق.
– قازاقستان پرەزيدەنتى – قارۋلى كۇشتەردىڭ جوعارعى باس قولباسشىسىنىڭ تاپسىرماسىنىڭ نەگىزىندە اسكەري ءبولىمدى دە كوشىرۋ جۇمىستارى باستالىپ كەتتى, – دەدى گەنەرال-مايور.
مينيسترلىك وكىلى قالانى تازالاۋ, وق-دارىلەردىڭ ءبولشەكتەرىن زالالسىزداندىرۋ, اسكەري ءبولىمدى كوشىرۋ جۇمىستارى تىكەلەي قورعانىس ءمينيسترىنىڭ باقىلاۋىندا ەكەنىن جەتكىزدى.
سونىمەن قاتار ءمينيستردىڭ ورىنباسارى قازىر قالا اۋماعىندا ساپەرلار بولىمشەسى جۇمىس ىستەپ جاتقانىن, ۇشقىشسىز باسقارىلاتىن ۇشۋ اپپاراتتارىنىڭ جىبەرىلگەنىن, سول ارقىلى ارسەنال ورنالاسقان جانە وعان جاپسارلاس اۋماق باقىلاۋعا الىنعانىن باياندادى. وعان قوسا, قارۋ-جاراق بولشەكتەرىنە كەزىككەن ادامداردىڭ حابارلاماسىن قابىلداۋ ماقساتىندا ارنايى ينجەنەرلىك-ساپەرلىك بەكەتتەر قۇرىلعان.
قورعانىس ءمينيسترىنىڭ ورىنباسارى اسكەري قىزمەتشىلەر ۇيلەرىنە ورالعان ارىس قالاسى تۇرعىندارىنا كومەك بەرىپ جاتقانىن مالىمدەدى.
