فورۋمعا قاتىسقان ەكولوگيا, گەولوگيا جانە تابيعي رەسۋرستار مينيسترلىگىنىڭ جاۋاپتى حاتشىسى ءسابيت نۇرلىباي قالدىقتاردى قايتا وڭدەۋدى دامىتۋ ارقىلى ەلدەگى بالاما ەنەرگەتيكانى ىلگەرىلەتۋگە جول اشىلاتىنىن جەتكىزدى.
– قالدىقتاردى وڭدەۋ سالاسى اينالىمدى ەكونوميكانىڭ وركەندەۋىنە, پارنيك گازىنىڭ كولەمىن قىسقارتۋعا, سونداي-اق بالاما قۋات ءوندىرىسىن ارتتىرۋعا سەپتەسەدى. كەڭەيتىلگەن مىندەتتەردىڭ ارقاسىندا شاعىن جانە ورتا بيزنەستە قالدىقتاردى ءوڭدەپ, سۇرىپتايتىن ءوندىرىس ورىندارى كوبەيدى. ماسەلەن, 2016 جىلى ولاردىڭ سانى 115 بولسا, 2018 جىلى 150-گە جەتتى, – دەگەن سابيت نۇرلىباي بۇل باعىتتاعى ىلكىمدى ىستەردى مينيسترلىك ءاردايىم قولداۋعا ءازىر ەكەنىن بايقاتتى.
«KazWaste» قازاقستاندىق قالدىقتاردى باسقارۋ قاۋىمداستىعى, تۇرمىستىق قالدىقتاردى كادەگە جاراتۋ مەن قايتا وڭدەۋدى نەگىزگى ۇردىسكە اينالدىرۋ ءۇشىن ەل تۇرعىندارىنىڭ قاتتى قوقىستى جيناۋ مادەنيەتىن جولعا قويۋ قاجەت دەپ ەسەپتەيدى. سول سەكىلدى اتالعان سالاداعى وڭدەۋ پروتسەسىن جەتىلدىرىپ, جاڭا تەحنولوگيالاردى ەنگىزۋ كەزەك كۇتتىرمەيتىن ماسەلەنىڭ ءبىرى ەكەنىن ايتادى.
– كەلەشەكتە قالدىقتى باسقارۋ ءىسى الەمدىك قاۋىمداستىق جاريالاعان جاڭا قاعيدا – 3D مودەلىنە سايكەس بولۋى ءتيىس. ياعني, باسقارۋ ءۇردىسىن قايتا قاراستىرۋعا تۋرا كەلەدى. سوعان ءسايكەس, قالدىقتى جيناۋدا ءار ءۇيدى, ءار تۇرعىندى قامتۋ قاجەت. نارىقتىق رەتتەۋ ءىسىن قاراستىرعان ابزال. پارنيك گازىن شىعارۋدى ازايتۋدىڭ امالىن ويلاستىرعان ءجون. ونىڭ ىشىندە ورگانيكالىق قالدىقتان مەتاننىڭ كولەمىن قىسقارتىپ, تومەن كومىرتەكتى تەحنولوگيالارعا باسىمدىق بەرۋ كەرەك. تسيفرلى تەحنولوگيانى ەنگىزۋ بويىنشا ارنايى كولىكتەرگە GPS جۇيەسىن جانە كونتەينەرلەرگە چيپ ورناتۋ, ءوندىرىستى اۆتونومدى رەجىمگە كوشىرۋ, اقىلدى لوگيستيكا (Smart logistic), قالدىقتاردىڭ ينتەراكتيۆتى كارتا جۇيەسى مەن تۇرعىندارعا ارنالعان ۇيالى قوسىمشالاردى ازىرلەۋ مىندەتى تۇر, – دەيدى قاۋىمداستىقتىڭ اتقارۋشى ديرەكتورى ۆەرا مۋستافينا.
جاقسىلىق مۇراتقالي,
«Egemen Qazaqstan»
