لاگەردىڭ حالىقارالىق بالالاردى قورعاۋ كۇنىمەن تۇسپا-تۇس وتكەن اشىلۋ سالتاناتىندا وقۋشىلاردىڭ قاتىسۋىمەن «جايدارى جاز بىزبەن بىرگە!» اتتى كونتسەرت قويىلعان ەدى. مەكتەپتىڭ ماقتانىشتارى «گاككۋ» بيشىلەر توبىنىڭ مۇشەلەرى ارنايى «شاشۋ» بيىمەن اشىپ, حيپ-حوپ جانرىنداعى زاماناۋي بي بيلەپ, بالالار ءان ايتىپ, ءوز ونەرلەرىن ورتاعا سالدى. لاگەر ءۇش اۋىسىمدا بىلىكتى پەداگوگتار ا.ساتىپالدى, گ.ۇزاقباەۆا, ش.سادۋوۆا جەتەكشىلىك ەتەتىن «شاپاعات», «بالداۋرەن» جانە «ەركەم-اي» اتتى توپتار كۇن سايىن ءۇش اۋىسىممەن جۇمىس ىستەدى. ءار اۋىسىمدا 20 بالادان – بارلىعى 60 بالا قامتىلدى.
قاجىمۇقان اۋىلىنىڭ بالالارى ەلوردامىز نۇر-سۇلتانعا دا ساياحات جاسادى. «حان شاتىردىڭ» ىشىندە ورنالاسقان كينوتەاترىندا «بولاشاق» قاۋىمداستىعى مەملەكەتتىك تىلگە دۋبلياج جاساعان «الاددين» ءفيلمىن تاماشالادى. قالانىڭ كورنەكتى جەرلەرىن ارالادى.
بالدىرعانداردىڭ قىزىعۋشىلىقتارى بويىنشا قۇرىلعان د.يمانباەۆانىڭ «Happy summer» اعىلشىن ۇيىرمەسى مەن ز.كيتەباەۆا, ش.سادۋوۆا جەتەكشىلىك جاسايتىن «سالەم» ءتىل ءۇيىرمەلەرى ءۇشىن ارنايى «وينايىق تا, ويلايىق!» دەگەن اتاۋمەن وقۋ ءبولمەسى جابدىقتالدى. وعان قوسا «سپورت KZ» ۇيىرمەسى قۇرىلدى. توپ جەتەكشىلەرى ءار كۇنگە «بالمۇزداق كۇنى», «قالپاقتار كۇنى», «قولشاتىر كۇنى», «دوستىق كۇنى», «كوبەلەكتەر كۇنى», «گۇلدەر كۇنى», تاعى باسقا دا اتاۋ قويىپ, بالالاردى قىزىقتىرۋمەن قاتار, سول كۇننىڭ تاريحىمەن دە تانىستىردى.
مەملەكەتتىك قىزمەتشىلەر كۇنىنە وراي ۇيىمداستىرىلعان اۋداندىق دەڭگەيدە ۇيىمداستىرىلعان «پوليتسيا – بالالار كوزىمەن!» سۋرەت بايقاۋىندا حاميت بەكارىس 2-ورىندى يەلەنىپ, اقمولدا مەرەكەگە وراي ۇيىمداستىرىلعان سالتاناتتى ءىس-شارادا ماراپاتتالدى.
«ويىن ويناپ, ءان سالماي, وسەر بالا بولار ما؟» دەگەندەي, قىزىق-دۋمانعا تولى جازعى لاگەر ءوز جۇمىسىن قورىتىندىلاپ, «قيماي قوشتاسامىز!» دەگەن اتاۋمەن جابىلۋ ءراسىمىن وتكىزدى. بۇل كۇنى دە بالالار ءبىر ايدا ءۇيرەنگەن ونەرلەرىن ورتاعا سالدى. اعىلشىن, ورىس تىلدەرىندە تاقپاق ايتىپ, ءان شىرقادى, بي بيلەدى. وسى ورايدا لاگەرىمىزدىڭ جابىلۋىندا دەمەۋشىلىك ەتكەن اۋىل تۇرعىندارىن ەرەكشە اتاپ وتكەن ءجون. «قاجىمۇقان», «مۇرات», «ءلايلا» دۇكەندەرى بالالارعا ءتۇرلى ءتاتتى, دامدىلەرىن ۇسىنسا, اۋىلشارۋاشىلىق فەرماسى دا ءوز ونىمدەرىن ۇسىندى. «قۋانتساڭ, بالانى قۋانت», «جاقسىلىقتى بالاعا جاسا» دەگەن قاعيدانى ۇستانعان كاسىپكەرلەرگە مەكتەپ ۇجىمى دا, اتا-انالار دا ءدان ريزا!
لاعىل سامارقانقىزى,
№4 مەكتەپ لاگەرىنىڭ جەتەكشىسى
