ستاتيستيكا كوميتەتىنىڭ دەرەگىنە سۇيەنسەك, جىل باسىندا ەلىمىزدەگى جەڭىل كولىكتەردىڭ جالپى سانى 3,8 ميلليونعا جەتىپتى. سوڭعى 10 جىلدا اۆتوموبيل پاركى 49 پايىزعا ۇلعايعان. تۇرعىنداردىڭ سانىنا شىعار بولساق, ءاربىر 1000 ادامعا 211 كولىكتەن كەلەدى. ءبىر ايتا كەتەرلىگى, كولىك سانى كوبەيگەنىمەن, اۆتوپارك ەسكىرىپ بارادى. ەلدەگى كولىكتەردىڭ 64 پايىزى زاۋىتتان 10 جىلدان استام ۋاقىت بۇرىن شىققان.
بىلتىر ەلىمىزدە تىركەلگەن كولىكتەردىڭ 66 پايىزى, ياعني 512 مىڭعا جۋىعىنىڭ جولدا جۇرگەنىنە 10 جىلدان اسىپتى. مۇنىڭ ءبارىن نەگە ايتىپ وتىرمىز؟ ۇلتتىق بانك بەكىتكەن جاڭا باعدارلاما ءبىر جاعىنان وتاندىق اۆتويندۋسترياعا سەرپىن بەرسە, ەكىنشىدەن, ەسكى كولىكتەردى ازايتىپ, تۇرعىنداردىڭ جاڭا كولىككە مىنۋىنە اسەر ەتۋگە ءتيىس.
– اۆتوكولىكتەردى نەسيەلەۋ اۋقىمىنىڭ ۇلعايۋىنا بۇعان دەيىن بانكتەردىڭ ءوز قاراجاتىنان بەرگەن نەسيەسى اسەر ەتتى. 11 مىڭ اۆتوكولىك الۋشىعا 38,8 ميلليارد تەڭگە نەسيە ۇسىنىلدى. بەلگىلەنگەن جىلدىق سىياقى مولشەرىنىڭ 13-26 پايىز ارالىعىندا, ياعني ءبىرشاما جوعارى ەكەنىنە قاراماستان, اتالعان كاتەگورياداعى نەسيەگە دەگەن سۇرانىس ارتىپ كەلەدى,– دەلىنگەن ۇلتتىق بانك قابىلداعان قۇجاتتا.
سونىمەن جاڭا باعدارلاما بويىنشا وتاندىق اۆتوكولىكتى ساتىپ الۋشى ازاماتتارعا نەسيە مىناداي مەحانيزم بويىنشا بەرىلمەك. بىرىنشىدەن, ۇلتتىق بانك «قازاقستاننىڭ ورنىقتىلىق قورى» اق-تىڭ جارعىلىق كاپيتالىن ساتىلاپ ۇلعايتادى.
ەكىنشىدەن, قازاقستان دامۋ بانكى بۇل قوردان وبليگاتسيا شىعارۋ ارقىلى 20 ميلليارد تەڭگەگە دەيىن قارىز الادى. ول 2019-2023 جىلدار ارالىعىندا تەڭگە ۆاليۋتاسىمەن, جىلىنا 0,15 پايىزدىق سىياقى مولشەرلەمەسىمەن جۇرگىزىلەدى. ودان كەيىن قدب وتاندىق اۆتوكولىكتەر ءتىزىمى مەن ولارعا بەرىلەتىن ليميتتەردى انىقتايدى. قارىزعا العان قاراجاتتى ەكىنشى دەڭگەيلى بانكتەردىڭ ەسەپشوتىنا ورنالاستىرادى. ەكىنشى دەڭگەيلى بانكتەر ەسەپشوتقا سالىنعان قارجىنى 18 ايدا نەسيەگە بەرىپ ۇلگەرۋگە ءتيىس.
ساتىپ الىناتىن كولىكتەرگە قويىلاتىن تالاپتار دا بەلگىلى. ماسەلەن, باعاسى 15 ميلليون تەڭگەدەن اسپاۋعا ءتيىس. نەسيە ەڭ كوبى 7 جىلعا بەرىلەدى. نەسيەنىڭ جىلدىق سىياقى مولشەرى 4 پايىزدان اسپايدى.
ۇلتتىق بانكتىڭ جاڭا باعدارلاماسى وتاندىق اۆتوكولىكتەردىڭ ساتىلىمىنا جانە اۆتوپاركتىڭ جاڭارۋىنا ىقپال ەتۋگە ءتيىس دەپ جوعارىدا ايتىپ وتتىك. وعان قوسا, جىلدىق سىياقى مولشەرىنىڭ تومەندىگىن ەسكەرسەك, اۆتوكولىك ساتىپ الۋشىلار ءۇشىن دە قارجىلىق جاعىنان الدەقايدا ءتيىمدى بولادى دەپ كۇتىلۋدە.
