ايماقتار • 04 شىلدە، 2019

«جاكە» وزبەكستانعا ەت جىبەرەدى

قاراعاندى وبلىسىنداعى تاسى ورگە دومالاپ تۇرعان شارۋاشىلىقتىڭ ءبىرى – ءىرى قارا مال بورداقىلاۋدى كاسىپ ەتەتىن «جاكە» شارۋا قوجالىعى. كاسىپورىن وسىدان ءۇش جىل بۇرىن بۇقار جىراۋ اۋدانىنىڭ ۇشتوبە اۋىلدىق وكرۋگىندە ىسكە قوسىلعان بولاتىن.

قايرات ءابىلدا

قازىرگى ۋاقىتتا شارۋاشىلىق قاناتىن كەڭگە جايعان كاسىپورىننىڭ مال قورالارى مەن باسقا دا وندىرىستىك ءۇي-جايلارى 20 گەكتار جەردى الىپ جاتىر. بۇل جەردە وتىزعا تارتا ادام ەڭبەك ەتىپ، تارىقتىرمايتىن كولەمدەگى ءتاپ-ءتاۋىر جالاقى الادى. زاماننىڭ تالابىنا ساي قۇرىلعان شارۋاشىلىق امەريكالىق تەحنولوگيا بويىنشا جۇمىس ىستەيدى. مالعا جەم بەرۋ تولىقتاي مەحانيكالاندىرىلعان، ال سۋارۋ ءىسى اۆتوماتتى جۇيەگە كوشىرىلگەن.

جاقىندا «جاكە» شارۋا قوجالىعى وزبەكستان تاراپىمەن كەلىسىمگە كەلىپ، سول ەلگە بيىل سەمىرتىلگەن 28 مىڭ بۇقا جەتكىزەتىن بولدى. تاپسىرىس بەرۋشىنىڭ شارتى بويىنشا، ءاربىر جانۋاردىڭ سالماعى 400 كيلودان كەم تارتپاۋى ءتيىس ەكەن.

بۇل شارۋاشىلىقتا بورداقىعا بايلانعان كەزدەگى مالدىڭ باستاپقى سالماعى 200-250 كيلو بولادى. ءجۇز كۇننىڭ ىشىندە قۇنارلى جەمنەن اۋىزى بوساماعان ءىرى قارانىڭ ارقايسىسى 600-700 كيلوعا دەيىن سالماق تارتىپ، سەمىرەتىن كورىنەدى. ايتا كەتەتىن ءبىر جايت، جەمشوپتى ەگىپ، ونى قايتا وڭدەۋگە دەيىنگى جۇمىس تولىقتاي شارۋاشىلىقتىڭ وزىندىك تەحنيكاسىمەن اتقارىلادى ەكەن.

– ەكى جىل ىشىندە ءبىز ءوندىرىس كولەمىن 5،5 مىڭ باسقا دەيىن ۇلعايتتىق. الداعى ۋاقىتتا بۇل كورسەتكىشتى 10 مىڭ باسقا دەيىن جەتكىزۋىمىز كەرەك. كەلەسى جىلى قۋاتىن تولىق كۇشىنە قوسۋدى جوسپارلاپ وتىرمىز. سول كەزدە جىلىنا بورداقىلانعان 40 مىڭ باس بۇقانى ساتۋعا شىعارامىز، – دەيدى كاسىپورىن وكىلى الماس سىزدىقوۆ.

اتالعان شارۋا قوجالىعى قازىرگى تاڭدا مەملەكەت تاراپىنان اۋىل شارۋاشىلىعىن قولداۋعا باعىتتالعان ءتۇرلى باعدارلامالاردى ءتيىمدى پايدالانادى. مىسالى، كاسىپورىن الداعى ۋاقىتتا «سىباعا» باعدارلاماسى بويىنشا رەسەيدەن 5 مىڭ باس، پولشادان 2 مىڭ باس تۇقىمى ءتاۋىر ءىرى قارا مال ساتىپ الۋدى جوسپارلاپ وتىر. سونىمەن قاتار اتالعان باعدارلاما اياسىندا اسىل تۇقىمدى مالداردىڭ گەنەتيكاسىن جاقسارتۋ جۇمىستارى دا قولعا الىنعان.

تاياۋدا وبلىس اكىمى ەرلان قوشانوۆ شارۋاسى شالقىعان شارۋاشىلىققا بارىپ، كاسىپورىننىڭ تىنىس-ءتىرشىلىگىمەن تانىستى. اڭگىمە بارىسىندا وبلىس باسشىسى وڭىرگە ەت وڭدەۋ كومبيناتىنىڭ وتە قاجەت ەكەنىن باسا ايتتى.

– مۇمكىندىكتەردى پايدالانۋ كەرەك، – دەدى اكىم. – قازىر «قاراپايىم زاتتار ەكونوميكاسى» اتتى جاڭا باعدارلاما پايدا بولدى، ونىڭ اياسىندا مەملەكەتتىك قولداۋ تەتىكتەرى قاراستىرىلعان.

«جاكە» شارۋا قوجالىعى ەت ونىمدەرىن ەلدىڭ ىشكى نارىعىنا دا، شەتەلگە دە شىعارادى. ەكسپورتتىق جەتكىزىلىمدەر بۇگىندە ەكى باعىتتا جۇرگىزىلەدى. شارۋا قوجالىعىنىڭ ونىمدەرى وزبەكستانعا عانا ەمەس، يرانعا دا ساتىلاتىنىن ايتا كەتكەن ءجون.

قازىرگى تاڭدا شارۋا قوجالىعى مال شارۋاشىلىعىنىڭ ءونىمدىلىگىن ارتتىرۋ ماقساتىندا جەرگىلىكتى فەرمەرلەرمەن تىعىز بايلانىس ورناتىپ، ارىپتەستىك نەگىزدەگى ءتيىمدى جوبالاردى قولعا العان.

قاراعاندى وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز