القالى باسقوسۋعا توراعالىق ەتكەن ايماق باسشىسى قۇمار اقساقالوۆ بيىل تۇڭعىش پرەزيدەنتىمىز ن. نازارباەۆتىڭ مەملەكەت باسقارعانىنا 30 جىل تولعانىن, وسى جىلدار ارالىعىندا جاس ەلىمىز الەمگە تانىلىپ, ءبىر شاڭىراق استىندا دوستىعى جاراسقان قازاق حالقى مەن سان الۋان ەتنوس وكىلدەرى ورتاق ماقسات جولىندا جۇمىلا ەڭبەك ەتىپ كەلە جاتقانىن اتاپ كورسەتتى.
«ەلباسىنىڭ تىكەلەي باستاماسىمەن قۇرىلعان قازاقستان حالقى اسسامبلەياسى تاتۋلىقتىڭ تەمىرقازىعى ىسپەتتەس بىرەگەي قوعامدىق ينستيتۋتقا اينالىپ, جارقىن باستامالار مەن يگى ىستەرگە ۇيىتقى بولىپ ءجۇر. تۇركىستان وبلىسى ارىس قالاسىنىڭ تۇرعىندارى باستان وتكەرگەن قايعىلى وقيعاعا ەتنومادەني بىرلەستىكتەر العاشقىلاردىڭ قاتارىندا ءۇن قاتىپ, كومەك كورسەتۋى–سونىڭ ءبىر دالەلى», دەدى قۇمار ىرگەباي ۇلى.
مەملەكەت باسشىسى قاسىم-جومارت توقاەۆ ۇسىنعان ون باعىت بويىنشا جەرگىلىكتى جەرلەردە اتقارىلۋى ءتيىس مىندەتتەرگە توقتالدى. جۇزەگە اسىرىلىپ جاتقان اۋقىمدى ينۆەستيتسيالىق جوبالار اياسىندا جىل سوڭىن دەيىن 30 مىڭنان استام ادام جۇمىسپەن قامتاماسىز ەتىلەدى. قابىلدانعان ءىس-شارالاردىڭ ءبىرى شاعىن جانە ورتا بيزنەستى دامىتۋعا باعىتتالعان. «ەڭبەك» باعدارلاماسى شەڭبەرىندە قازىنادان ءۇش ميلليارد تەڭگە ءبولىنىپ, وعان ەكى ءجۇز تۇرعىن تارتىلعان. كوپبالالى انالار, از قامتىلعان وتباسىلار, مۇمكىندىگى شەكتەۋلى جاندار ءۇشىن دە ەرەكشە باسىمدىق بەرىلىپ وتىر. 3690 وتباسىعا اتاۋلى الەۋمەتتىك جاردەم كورسەتىلسە, 520-ى–كوپبالالى ساناتىنداعىلار. ءوز كاسىبىن اشقىسى كەلەتىندەرگە گرانتتار بەرىلەدى.
اۋىر ونەركاسىپ سالاسىنداعى تەحنولوگيالىق جاڭعىرتۋ جۇمىستارى كەشەندى تۇردە جۇرگىزىلۋدە. پەتروپاۆل جانە س.كيروۆ اتىنداعى زاۋىتتار ونىمدەرىنە سۇرانىس مول. «سىرىمبەت» كەن ورنى قالايىنى وڭدەپ, ەكسپورتقا جونەلتۋمەن اينالىساتىن بولادى. قازىر مۇندا تاۋ-كەن ونەركاسىبىن وركەندەتۋ ماقساتىمەن قوماقتى ينۆەستيتسيا قۇيىلعان. سۋمەن جابدىقتاۋ نىساندارىن قالپىنا كەلتىرۋگە 9,1 ميلليارد تەڭگە قاراستىرىلعان. جەتى ءجۇز شاقىرىم جول جوندەلىپ, 235 مىڭ شارشى مەتر تۇرعىن ءۇي ىسكە قوسىلادى.
ءوڭىر اۋماعىندا جۇمىس ىستەيتىن ەكى جۇزدەن استام ەتنومادەني ۇيىمداردىڭ رۋحاني كەلىسىمدى نىعايتۋعا قوسىپ وتىرعان ۇلەسى ايرىقشا. انالار كەڭەسى, مەدياتسيا كابينەتى, قايىرىمدىلىق كلۋبى قوعامدىق-ساياسي, مادەني شارالاردان شەت قالعان ەمەس. «جاستار جىلى» بويىنشا ەرىكتىلەر قوزعالىسىن دامىتۋعا, فورۋمدار, اكتسيالار, كونفەرەنتسيالار وتكىزۋگە باسا نازار اۋدارىلادى.
جيىندا اقتوبە قالاسىندا وتان الدىنداعى ازاماتتىق بورىشىن وتەۋ كەزىندە لاڭكەستەرگە قارسى جانقيارلىق ەرلىك كورسەتكەنى ءۇشىن «ايبىن» وردەنىمەن ماراپاتتالعان باحتيار قايىربەكوۆ, ەۆرەي مادەني ورتالىعى توراعاسىنىڭ ورىنباسارى ەلحان ەۆداەۆ ءسوز الىپ, كەڭ-بايتاق ەلىمىزدىڭ ءوسىپ-وركەندەۋىنە جاس بۋىن ءوز ۇلەستەرىن قوساتىنىن, اعا ۇرپاق وكىلدەرى سەنىپ تاپسىرعان ەستافەتاعا كىر كەلتىرمەيتىندەرىن جەتكىزدى.
Vytautas Magnus ۋنيۆەرسيتەتىنىڭ دوكتورانتى نازيم نيكيفوروۆتىڭ قازاقستان ازاماتى رەتىندە مەن قاي كەزدە دە مەملەكەتتىڭ ۇزدىكسىز قولداۋىن سەزىنىپ كەلەمىن. ەۋروپانىڭ تانىمال وقۋ ورىندارىنىڭ بىرىندە وقىپ, ءبىلىم الدىم. العا قويعان جوسپارلارىم كوپ, دەگەن جۇرەكجاردى سوزدەرىن جينالعاندار ۇلكەن ىقىلاسپەن قابىلدادى.
وتىرىستا قازاقستان حالقى وبلىستىق اسسامبلەياسى توراعاسىنىڭ ورىنباسارى بولىپ «ۆايناح» شەشەن-ينگۋش قوعامدىق-مادەني بىرلەستىگىنىڭ جەتەكشىسى سايپ بايدۋەۆ سايلاندى.
سولتۇستىك قازاقستان وبلىسى
