وسى مەرەيلى مەرەكەگە وراي, ءماجىلىس جىل سايىن «پارلامەنت ءسوزى» سىيلىعىن تاپسىرادى. ول بيىل ءۇشىنشى رەت ۇيىمداستىرىلىپ وتىر.
- بۇل تەك سىزدەردىڭ عانا ەمەس, بۇكىل حالقىمىزدىڭ, ەلىمىزدىڭ ورتاق مەرەكەسى دەۋگە بولادى. ءبىزدىڭ قازاق حالقىمىز ءبىر سوزبەن مەملەكەتتىك ماسەلەنى شەشىپ, ءبىر سوزبەن حالىقتىڭ جاعدايىن جەتكىزىپ, ءبىر سوزبەن بۇگىندى ايتىپ, بولاشاقتى بولجاعان. سوندىقتان, ءسوز يەلەرى, ءباسپاسوز قىزمەتكەرلەرى قاي زاماندا بولسىن,قاي قوعامدا بولسىن ەرەكشە قۇرمەتكە يە بولىپ تابىلادى. سول ءۇشىن ەلباسىمىز نۇرسۇلتان ءابىش ۇلى نازارباەۆ تاۋەلسىزدىك العان كۇننەن باستاپ, ءباسپاسوزدىڭ دامۋىنا ەرەكشە نازار اۋدارىپ كەلەدى. سونىڭ ناتيجەسىندە, سىزدەر, ارقاشاندا ەلىمىزگە, حالقىمىزعا ايانباي قىزمەت ەتىپ كەلەسىزدەر, - دەدى نۇرلان نىعماتۋلين.
ءباسپاسوز قىزمەتكەرلەرىنىڭ ەل الدىنداعى ەلەۋلى ەڭبەگىنە وراي, ەندى جىل سايىن 28 ماۋسىم «بۇقارالىق اقپارات قۇرالدارى» كۇنى بولىپ بەلگىلەندى.
ودان ءارى پارلامەنت ءسوزى سىيلىعىن تاپسىرۋ راسىمىنە كىرىسكەن ن.نىعماتۋلين ارنايى قۇرىلعان كوميسسيا جەڭىمپازداردى التى نوميناتسيا بويىنشا انىقتاعانىن اتاپ ءوتتى.
ولار «پارلامەنتتىك جۋرناليستيكانى دامىتۋعا قوسقان ۇلەسى ءۇشىن» نوميناتسياسى – نۇرجان مۇحامەدجانوۆاعا, «زا ۆكلاد ۆ رازۆيتيە پارلامەنتسكوي جۋرناليستيكي» نوميناتسياسى - ەرلان بەكحوجينعا, «ۇزدىك تەلەۆيزيالىق سيۋجەت ءۇشىن» نوميناتسياسى - «كتك» تەلەارناسىنىڭ ءتىلشىسى اسەل اۋدانباەۆاعا, «زا لۋچشي تەلەۆيزيوننىي سيۋجەت» نوميناتسياسى يرينا كامىشوۆاعا, («حابار» تەلەارناسى), «ۇزدىك باسپا جاريالانىمى ءۇشىن» نوميناتسياسى - تولەن تىلەۋبايعا («استانا اقشامى» گازەتىنىڭ شەف-رەداكتورى), «زا لۋچشۋيۋ پەچاتنۋيۋ پۋبليكاتسيۋ» نوميناتسياسى اسقار دجالدينوۆقا, («ۆرەميا» گازەتى), «ۇزدىك ينتەرنەت جانە راديو ماتەريالى ءۇشىن» نوميناتسياسى - «Zakon.kz» جەلىلىك باسىلىمى, باس رەداكتورى قايرات شايحيەۆكە, «زا لۋچشي ينتەرنەت- ي راديوماتەريال» نوميناتسياسى «Tengrinews.kz» ءتىلشىسى اسەل ساتاەۆاعا, «ارنايى رەپورتاج» نوميناتسياسى- «استانا» تەلەارناسىنىڭ ءتىلشىسى ءمولدىر ديۋسەكيناعا, «سپەتسيالنىي رەپورتاج» نوميناتسياسى - گۇلنار ەرمانوۆاعا («حابار 24» تەلەارنا), «ۇزدىك بەينە-سۋرەت ماتەريالى ءۇشىن» نوميناتسياسى - باحتيار وماروۆقا, («Qazaqstan» ۇلتتىق ارناسى), «زا لۋچشي ۆيدەو ي فوتوماتەريال» نوميناتسياسى ۆيكتور دجيگيريسكە (مەدياحولدينگ «اtameken Business»), ال «پارلامەنت ءسوزى» ارنايى سىيلىعى - «سارىارقا» تەلەارناسىنا (قاراعاندى وبلىسى) بەرىلدى.
سالتاناتتى شارا سوڭىندا نۇرلان نىعماتۋلين جۋرناليستەرگە شىعارماشىلىق تابىستار تىلەدى.
