قر پرەزيدەنتى قاسىم-جومارت توقاەۆتىڭ تاپسىرماسىمەن قر پرەمەر-ءمينيسترى اسقار مامين جۇمىس ساپارىمەن الماتىعا باردى, ساپار كەزىندە قالا ءماسليحاتىنىڭ كەزەكتەن تىس وتىرىسىنا قاتىستى.
اسقار مامين ءماسليحات دەپۋتاتتارىنا مەملەكەت باسشىسىنىڭ قالا اكىمى قىزمەتىنە باقىتجان ساعىنتاەۆتى تاعايىنداۋ تۋرالى حاتىن وقىپ بەردى. دەپۋتاتتار ۇسىنىلعان كانديداتۋرانى ءبىراۋىزدان ماقۇلدادى.
الماتىدا قر ۇكىمەتىنىڭ باسشىسى قالا اكتيۆىمەن كەزدەسۋ وتكىزدى.
قر پرەمەر-ءمينيسترى ا. مامين ب. بايبەككە 4 جىلعا جۋىق ۋاقىت بويى اكىم قىزمەتىندە قالانىڭ دامۋىنا قوسقان زور ۇلەسى ءۇشىن العىس ءبىلدىردى.
«باۋىرجان بايبەكتىڭ باسشىلىعىمەن الماتى قالاسىندا ۇلكەن الەۋمەتتىك-ەكونوميكالىق, ينفراقۇرىلىمدىق رەفورمالار, تۋريزم سالاسىنداعى جوبالار جۇزەگە استى. وسىنىڭ ارقاسىندا قالانىڭ دامۋىنا سەرپىن بەرىلدى», — دەدى ا. مامين, ەكونوميكانىڭ نەگىزگى سالالارى بويىنشا وڭ ديناميكا كورسەتىلگەنىن اتاپ ءوتىپ.
مەگاپوليستىڭ جاڭا اكىمىن تانىستىرۋ كەزىندە اسقار مامين باقىتجان ساعىنتاەۆتىڭ جاۋاپتى باسشىلىق قىزمەتتەردەگى ۇلكەن تاجىريبەسىن اتاپ ءوتتى.
«باقىتجان ءابدىر ۇلى – تاجىريبەسى ۇلكەن, كاسىبي باسشى. قر پرەزيدەنتى اكىمشىلىگىنىڭ باسشىسى, مەملەكەتتىك حاتشى, پرەمەر–مينيستر, پرەمەر-ءمينيستردىڭ ءبىرىنشى ورىنباسارى قىزمەتىندە ەلىمىزدىڭ دامۋىنا زور ۇلەس قوستى», — دەدى ا. مامين. ب. ساعىنتاەۆ سونىمەن قاتار «نۇر وتان» پارتياسى توراعاسىنىڭ ءبىرىنشى ورىنباسارى, پاۆلودار وبلىسىنىڭ اكىمى, ەكونوميكالىق دامۋ جانە ساۋدا ءمينيسترى قىزمەتتەرىن اتقاردى.
قر ۇكىمەتىنىڭ باسشىسى پرەزيدەنتتىڭ الماتى قالاسىنىڭ باسشىلىعى الدىندا اۋقىمدى مىندەتتەردى قويىپ وتىرعانىن اتاپ ءوتتى. الماتى — ەلىمىزدىڭ ءىرى ىسكەرلىك, قارجىلىق, يننوۆاتسيالار مەن ينۆەستيتسيالار, سونداي-اق, ءبىلىم بەرۋ جانە مادەني ورتالىعى. الماتى قالاسى رەسپۋبليكانىڭ جالپى ىشكى ءونىمنىڭ بەسىنشى بولىگىن قامتاماسىز ەتەدى.
«حالىقتىڭ الەۋمەتتىك جاعدايىن, تۇرمىس ساپاسىن جاقسارتۋعا باسا كوڭىل ءبولۋ قاجەت. قالا ەكونوميكاسىنىڭ جانە ينفراقۇرىلىمىنىڭ ودان ءارى دامۋىن قامتاماسىز ەتۋ قاجەت», — دەپ اسقار مامين, جاڭا اكىمنىڭ قر تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ الماتى قالاسىن دامىتۋ بويىنشا العا قويعان بارلىق ستراتەگيالىق مىندەتتەردى ءتيىمدى ورىندايتىنىنا جانە مەملەكەت باسشىسى قاسىم-جومارت توقاەۆتىڭ الماتىعا جاقىنداعى جۇمىس ساپارى بارىسىندا بەرگەن تاپسىرمالارىن ناقتى شەشەتىنىنە سەنىم ءبىلدىردى.
