قاسىم-جومارت توقاەۆ قازاقستان استاناسىنا كەلگەن ستانيسلاۆ زاسقا ءىلتيپات ءبىلدىرىپ, ۇجىمدىق قاۋىپسىزدىك شارت ۇيىمىنىڭ وڭىردەگى بەيبىتشىلىك پەن قاۋىپسىزدىكتى ساقتاۋدا ماڭىزى زور ەكەنىن اتاپ ءوتتى. سونداي-اق, قازاقستان ۇجىمدىق قاۋىپسىزدىك شارت ۇيىمىنىڭ باس حاتشىسى لاۋازىمىنا بەلارۋستىڭ كانديداتۋراسىن باسىنان باستاپ قولداعانىن ايتتى.
– ۇجىمدىق قاۋىپسىزدىك شارت ۇيىمى حالىقارالىق ۇيىم رەتىندە ەۋرازيا قۇرلىعىنىڭ اۋقىمدى كەڭىستىگىندە قاۋىپسىزدىكتى قامتاماسىز ەتۋدىڭ ەلەۋلى فاكتورىنا اينالىپ, نىعايدى. ۇجىمدىق قاۋىپسىزدىك شارت ۇيىمى ءبىز ءۇشىن – ماڭىزدى ۇيىم. بەلارۋس سياقتى ءبىز دە ونى دامىتۋعا زور ۇلەس قوستىق. ۇجىمدىق قاۋىپسىزدىك شارت ۇيىمىنىڭ پارلامەنت اسسامبلەياسىندا بەلسەندى جۇمىس ىستەيمىز. ءسىزدىڭ الداعى ۋاقىتتاعى تاعايىندالۋىڭىز ۇيىمنىڭ الەۋەتىن نىعايتۋ تۇرعىسىنان ماڭىزدى ءرول اتقارادى, – دەدى قازاقستان پرەزيدەنتى.
ستانيسلاۆ زاس قاسىم-جومارت توقاەۆقا كەزدەسكەنى ءۇشىن العىس ايتىپ, سايلاۋداعى جەڭىسىمەن جانە قازاقستان رەسپۋبليكاسىنىڭ پرەزيدەنتى قىزمەتىنە كىرىسۋىمەن قۇتتىقتادى.
– قازاقستان حالقى ءسىز سياقتى جان-جاقتى ءارى مول تاجىريبەسى بار مەملەكەت قايراتكەرى بولىپ قالىپتاسقان اقىلدى ادامدى دۇرىس تاڭدادى. قازاقستاننىڭ يگىلىگى جولىنداعى بارلىق ىسىڭىزگە تابىس تىلەيمىن. ءبىز مەملەكەتتەرىمىز بەن حالىقتارىمىز اراسىندا قالىپتاسقان دوستىق قاتىناستاردى جوعارى باعالايمىز جانە قازاقستاننىڭ حالىقارالىق الاڭداردا, سونىڭ ىشىندە ۇجىمدىق قاۋىپسىزدىك شارت ۇيىمىندا بەلارۋسكە كورسەتكەن قولداۋى ءۇشىن ريزاشىلىعىمىزدى بىلدىرەمىز. ءوزارا پايدالى ءىس-قيمىلداردى نىعايتا بەرۋگە تىرىسامىز, – دەدى ستانيسلاۆ زاس.
