– ستۋدەنتتەر قولونەر بايقاۋىنا «اتقا ءمىنۋ مادەنيەتى», « ۇلى دالاداعى ەجەلگى مەتاللۋرگيا», «اڭدار ءستيلى», «التىن ادام», «تۇركى الەمىنىڭ بەسىگى», « ۇلى جىبەك جولى», «قازاقستان – الما مەن قىزعالداقتىڭ وتانى» اتتى ءتۇرلى ينستاللياتسيالاردى جاساپ اكەلدى, – دەيدى باسقارمانىڭ تەحنيكالىق جانە كاسىپتىك ءبىلىم بەرۋ ءبولىمىنىڭ ادىسكەرى ميرا شىڭعىسوۆا.
ءسويتىپ «ۇرپاقتار ساباقتاستىعى» اتالىمىندا تەحنيكالىق سەرۆيس كوللەدجىندە دانەكەرلەۋ ءىسى ماماندىعى بويىنشا وقيتىن 3-كۋرس ستۋدەنتى الەكساندر ترۋنوۆ جەڭىمپاز اتاندى.
كوللەدج ديرەكتورى ءانۋاربەك احمەتشايحوۆتىڭ ايتۋىنشا, وسى وقۋ ورنىندا الەكساندر سياقتى تالاپتى, قولدارىنان ءىس كەلەتىن 300-دەن اسا اۋىل, قالا جاستارى ءبىلىم الۋدا. تۇلەكتەر وڭىردەگى كاسىپورىنداردا ەڭبەك ەتەدى. بارلىق كاسىپورىندارمەن دۋالدى وقىتۋ بويىنشا كەلىسىمشارتتار جاسالعان.
بايقاۋعا قاتىسۋ ءۇشىن الەكساندر وندىرىستىك وقىتۋ شەبەرلەرى الەكساندر نيكولاەۆ, بەيسەنبي ءابىلحاسانوۆتىڭ جەتەكشىلىگىمەن مەتالل قالدىقتارىنان تۇلپار جاساپ شىعىپتى.
كوللەدج الدىندا تۇرعان تۇلپاردىڭ بيىكتىگى 1 مەتر.
– تۇلپاردى جاساۋعا ەكى اپتاداي ۋاقىت كەتتى. جىلقى ءپىشىنىن قۇراستىرۋ جانە كولەم بەرۋ ءۇشىن ءتۇرلى ديامەترلى سىم قولداندىق. كونسترۋكتسيا مەن اياق-قولدىڭ قاتتىلىعى ءۇشىن شارشى قۇبىر پايدالانىلدى. جوبانىڭ بەتى ءتيىستى فورما بەرىلگەن تاباق تەمىر جولاقتارىنان جاسالعان, –دەيدى الەكساندر.
ال «كرەاتيۆتى جوبا» جۇلدەسىن مەتالل قالدىقتارىنان بيىكتىگى 60 سانتيمەتر كيىز ءۇي جاساعان مونتاجداۋ كوللەدجىنىڭ ستۋدەنتى يۋري تۋتاەۆ يەلەندى.
جۇلدەگەرلەر مەن جەڭىمپاز اتانعان 6 قولونەرشى ستۋدەنتتەرگە ديپلومدار تابىس ەتىلدى.
پاۆلودار
