بۇل تۋرالى سىبايلاس جەمقورلىققا قارسى ءىس-قيمىل اگەنتتىگىندە وتكەن ءباسپاسوز ءماسليحاتىندا حابارلاندى. اگەنتتىك وكىلدەرىنىڭ ايتۋلارىنا قاراعاندا, جەرگىلىكتى جەرلەردە ءۇزدىكسىز باقىلاۋ جانە دەلدالدارمەن كۇرەس جۇيەلى بولعانىمەن, ادامي فاكتورلاردى ءتۇبەگەيلى جويۋ مۇمكىن بولماي وتىر.
– بىزدەر تەمىرجول ۆوكزالدارى مەن پويىزداردا قوعام وكىلدەرىن قاتىستىرا وتىرىپ, رەيدتىك شارالاردى ۇزدىكسىز جۇرگىزىپ كەلەمىز. ماسەلەن, 2018 جىلدىڭ قىركۇيەك ايىنان بەرى بارلىق باعىتتار بويىنشا 360 رەت جولعا شىعىپ, پويىزداردا بيلەتسىز ءجۇرۋدىڭ 362 جانە 35 ءراسىمدەلمەگەن جۇك پەن باگاج تاسۋ دەرەگىن انىقتادىق. وكىنىشكە قاراي ۋاكىلەتتى ورگاندار مەن ۇلتتىق تاسىمالداۋشى تاراپىنان باقىلاۋدىڭ ازدىعىنان ادام فاكتورىنا بايلانىستى زاڭ بۇزۋشىلىق دەرەكتەرى كوپ, – دەيدى «ادال جول» جوبالىق كەڭسەسىنىڭ جەتەكشىسى يسلامبەك مايشەكين.سوندىقتان مۇددەلى تاراپتار بۇل ولقىلىقتى جولاۋشىلار تاسىمالى سالاسىن اۆتوماتتاندىرۋ جانە تسيفرلاندىرۋ ارقىلى جويۋعا نيەتتى.
وسىعان بايلانىستى اقپاراتتىق جۇيەنى ەنگىزۋشى «ينستانت پەيمەنتس» جشس وكىلى جاڭا باعدارلاما «ورىن اۋلا» مەحانيزمىن بۇعاتتاۋىمەن ەرەكشەلەنەتىنىن ايتتى. بۇل تەتىكتى قازىرگى ۋاقىتتا كاسسيرلەر قايتارىلعان بيلەتتى وزگە تۇلعانىڭ اتىنا قىمبات باعاسىنا راسىمدەپ بەرۋدە كەڭىنەن پايدالانىپ ءجۇر.
ەندى ءاربىر جولاۋشىنىڭ بىرەۋدىڭ قايتا تاپسىرعان بيلەتىن ساتىپ الۋعا تەڭ قۇقىعى قامتاماسىز ەتىلەدى. جەتىلدىرىلگەن جۇيەدە «ورىن اۋلا» مەحانيزمىنە جول بەرىلمەيدى. اتالعان جۇيە قىسقا ۋاقىت ىشىندە بەس بيلەتتەن ارتىق ساتىپ الۋعا اۆتوماتتى تۇردە شەكتەۋ قويادى.
ءباسپاسوز ءماسليحاتى بارىسىندا بەلگىلى بولعانداي, سىبايلاس جەمقورلىققا قارسى ءىس-قيمىل اگەنتتىگى بيۋدجەت قاراجاتىنىڭ جۇمسالۋىنا بايلانىستى دا بىرقاتار زاڭ بۇزۋشىلىقتاردى اشكەرەلەگەن. بۇل باعىتتاعى قىلمىستار مەملەكەتتىك قىزمەتشىلەرمەن عانا ەمەس, سونداي-اق مەملەكەتتىك كومەكتى جانە ماقساتتى الەۋمەتتىك كومەك الۋعا قۇقىعى جوق ازاماتتارعا دا قاتىستى بولىپ وتىر.
مىسالى, پاۆلودار قالاسىنىڭ №2 سوتى ەڭبەك, الەۋمەتتىك قورعاۋ جانە كوشى-قون كوميتەتىنىڭ پاۆلودار وبلىسى بويىنشا اۋماقتىق دەپارتامەنتىنىڭ ءبولىم باسشىسىنا, «ازاماتتارعا ارنالعان ۇكىمەت» مەملەكەتتىك كورپوراتسياسى ديرەكتورىنىڭ ورىنباسارىنا جانە وسى مەكەمەنىڭ ءبولىم باسشىسىنا وبلىستىڭ ازاماتتارىنان 300 مىڭ تەڭگەدەن باستاپ 1 ملن 200 مىڭ تەڭگە ارالىعىندا سىياقىلار الىپ, وسى سىياقىعا ولارعا زاڭسىز زەينەتاقىلار اۋدارىپ, بيۋدجەتتىڭ 107 ملن تەڭگە قاراجاتىن ىسىراپ ەتكەندەرى ءۇشىن ءارتۇرلى مەرزىمدەرگە سوتتادى.
سونداي-اق قىلمىستىق جاۋاپكەرشىلىككە زاڭسىز زەينەتاقى العان 49 ازامات جانە ولاردىڭ 13 كومەكشىسى تارتىلعان. زاڭسىز زەينەتاقى العان 35 ادام مەملەكەتكە كەلتىرىلگەن زالالدىڭ 73,6 ملن تەڭگەسىن بيۋدجەتكە قايتارۋىنا بايلانىستى ولارعا قاتىستى قىلمىستىق قۋدالاۋ اقتامايتىن نەگىزبەن قىسقارتىلدى.
ال جەزقازعان قالاسىنىڭ سوتى وبلىستىق الەۋمەتتىك قورعاۋ جانە كوشى-قون اۋماقتىق دەپارتامەنتىنىڭ «№3 مەديتسينالىق-الەۋمەتتىك ساراپتاما» ءبولىمى باسشىسىنا ازاماتتارعا II نەمەسە III توپتاعى مۇگەدەك دەگەن انىقتاماسىن بەرۋ جانە ولاردى كەدەرگىسىز مەديتسينالىق كۋالاندىرۋدان وتۋلەرى ءۇشىن جۇيەلى ءتۇردە پارا العاندارى ءۇشىن 20 ملن تەڭگە كولەمىندە ايىپپۇل سالدى.
