د.نازارباەۆا مەيمانمەن كەزدەسۋ بارىسىندا اۋستريا قازاقستاننىڭ ەۋروپالىق وداقتاعى ماڭىزدى جانە سەنىمدى ارىپتەستەرىنىڭ ءبىرى ەكەنىن اتاپ ءوتىپ, بۇل ساپار ەكى ەل اراسىنداعى ءوزارا ءتيىمدى ىنتىماقتاستىققا قوسىمشا سەرپىن بەرەتىنىنە سەنىم ءبىلدىردى.
تاراپتار پارلامەنتارالىق بايلانىستاردى نىعايتۋعا ۋاعدالاستى. سەنات باسشىسى قازاقستان مەن اۋستريا پارلامەنتتەرىندە قۇرىلعان ىنتىماقتاستىق توپتارىنىڭ الەۋەتىن بەلسەندى دامىتۋ, سونداي-اق بىرلەسكەن كونفەرەنتسيالار اياسىندا ءوزارا ءىس-قيمىل قاجەت ەكەنىن ايتتى. ول قازاقستان مەن اۋستريانىڭ كولىك-لوگيستيكا الەۋەتى جونىندەگى كونفەرەنتسيا وتكىزۋدى ۇسىندى. ءبىزدىڭ ەلدەرىمىز ايماقتىق بيزنەس ءۇشىن ءتيىمدى ورنالاسقان جانە لوگيستيكالىق حابقا اينالا الادى. قازاقستان اۋسترياعا ورتالىق ازيا, قىتاي جانە ەاەو اۋقىمدى نارىقتارىنا جول اشادى. «بۇل مۇمكىندىكتەردى ءبىزدىڭ ەلدەرىمىزدىڭ ساۋدا-ەكونوميكالىق ىنتىماقتاستىعىن دامىتۋ ءۇشىن پايدالانۋ قاجەت», - دەدى سەنات توراعاسى.
سەنات باسشىسىنىڭ پىكىرىنشە, اۋىل شارۋاشىلىعى مەن تۋريزم ىنتىماقتاستىقتىڭ باسىم سالالارى بولىپ تابىلادى. كەزدەسۋ بارىسىندا نۇر-سۇلتان مەن ۆەنا اراسىندا تىكەلەي اۋە قاتىناسىن اشۋ قاجەتتىگى اتاپ ءوتىلدى, ول اۋستريالىق تۋريستەردىڭ قازاقستانعا كوبىرەك كەلۋىنە ىقپال ەتەدى.
ي.اپپە قازاقستاننىڭ تاۋەلسىزدىك جىلدارى قول جەتكىزگەن جوعارى جەتىستىكتەرىنە توقتالدى جانە گۋمانيتارلىق ىنتىماقتاستىقتى جالعاستىرۋعا, اتاپ ايتقاندا, قازاقستاندىق ستۋدەنتتەردى اۋستريادا وقىتۋعا مۇددەلى ەكەنىن ايتتى. سونىمەن قاتار, 23-24 قىركۇيەكتە نۇر-سۇلتان قالاسىندا وتەتىن ەۋرازيا ەلدەرى توراعالارىنىڭ «ۇلكەن ەۋرازيا: ۇنقاتىسۋ. سەنىم. ارىپتەستىك» 4-ءشى كەڭەسىنە اۋستريالىق دەلەگاتسيانىڭ قاتىسۋى دا تالقىلاندى.
